౨౮. కపణస్స వత్థుమ్హి అయమానుపుబ్బీకథా

అమ్హాకం భగవతి పరినిబ్బుతే బారాణసీనగరవాసీ ఏకో దుగ్గతపురిసో పరగేహే భతింకత్వా జీవికం కప్పేతి, తస్మిం సమయే నగరవాసినో యేభుయ్యేన తస్మిం తస్మిం ఠానే మణ్డపాదయో కారాపేత్వా మహాదానం దేన్తి, తం దిస్వా దుగ్గతో ఏవం చిన్తేసి, అహం పుబ్బే అకతపుఞ్ఞత్తా పరగేహే భతిం కత్వా కిచ్ఛేన కసిరేన జీవామి. నివాసనపారుపనమ్పి వాసట్ఠానమత్తమ్మి దుక్ఖతో లభామి. ఇదాని బుద్ధుప్పాదో వత్తతి భిక్ఖుసఙ్ఘోపి.

సబ్బే ఇమే దానం దత్వా సగ్గమగ్గం సోధేన్తి. మయాపి దానం దాతుం వట్టతి. తమ్మే దీఘరత్తం హితాయ సుఖాయ భవిస్సతి. అపి చ మయ్హం తణ్డులనాలిమత్తమ్పి నత్థి, అకతవీరియేన తం మత్థకం పాపేతుం న సక్కా, ఏతదత్థాయాహం ఉయ్యోగం కత్వా దానం దస్సామీతి చిన్తేత్వా తతో పట్ఠాయ భతిం పరియేసమానో గన్త్వా తత్థ తత్థ భతిం కత్వా లద్ధనివాపే చ భిక్ఖాచరియాయ లద్ధతిలతణ్డులాదయో చ ఏకత్థ సంహరిత్వా మనుస్సే సమాదాపేత్వా తస్మిం మణ్డపం కారాపేత్వా వనకుసమాదీహి తం అలఙ్కరిత్వా భిక్ఖూ నిమన్తేత్వా మణ్డపే నిసీదాపేత్వా సబ్బేసం పాయసం [పాయాసం ఇతిసబ్బత్థ] పటియాదేత్వా భోజేసి. అథ సో మరణకాలే అత్తనా కతం తం దానవరం అనుస్సరి. సో తేన కుసలకమ్మేన సుత్తప్పబుద్ధో వియ దేవలోకే నిబ్బత్తి. తస్మిం తేన కతపుఞ్ఞానురూపం మహన్తం కనకవిమానం నిబ్బత్తి. సమన్తా తిగావుతట్ఠానే దేవతా నానా విధాని తురియాని గహేత్వా ఉపహారం కరోన్తి. నిచ్చం దేవచ్ఛరాసహస్సాని [దేవచ్ఛరాసహస్సం ఇతిసబ్బత్థ] తం పరివారేత్వా తిట్ఠన్తి. ఏవం సో మహన్తం సమ్పత్తిం అనుభవతి. అథేకదివసం సువణ్ణసేలవిహారవాసీ మహాసఙ్ఘరక్ఖితత్థేరో పత్తపటిసమ్భిదో దేవచారికం చరమానో తం దేవపుత్తం అనుపమాయ దేవసమ్పత్తియా విరోచమానం దిస్వా ఉపసఙ్కమ్మ ఠితో తేన కతకమ్మం పుచ్ఛి. సోపిస్స యథాభూతం బ్యాకాసి, తేనత్థ.

౧. సబ్బసోవణ్ణయో ఆసి, పాసాదో రతనామయో;

సోణ్ణసిఙ్గసతాకిణ్ణో, దుద్దిక్ఖో చ పభస్సరో.

౨. కూటాగార సతాకిణ్ణో, సోణ్ణమాలాసమాకులో;

ముత్తాకలాపాలమ్బన్తి, తత్థ తత్థ మనోరమా.

౩. నేకగబ్భసతాకిణ్ణో, సయనాసనమణ్డితో;

విభత్తో భబ్బభాగేహి, పుఞ్ఞవడ్ఢకినా కతో.

౪. నచ్చన్తి పమదా తత్థ, భేరిమణ్డలమజ్ఝగా;

గాయన్తి కాచి కీళన్తి, వాదేన్తి కాచి తన్తియో.

౫. తతో తిగావుతే ఠానే, పాసాదస్స సమన్తతో;

సహచ్ఛరా దేవపుత్తా, గహేత్వా ఆతతాదయో.

౬. మోదన్తి పరివారేత్వా, నచ్చగీతాదినా సదా;

ఉల్లఙ్ఘన్తిచ సేలేన్తి, సిలాఘన్తి సమన్తతో.

౭. ఏవం మహిద్ధికో దాని, తువం వన్దోవ భాసతి;

పుచ్ఛామి తం దేవపుత్త, కిం కమ్మమకరీ పురా.

దేవపుత్తో ఆహ.

౮. అహోసిం దుగ్గతో పుబ్బే, బారాణసీపురుత్తమే;

దానం దేన్తి నరా తత్థ, నిమన్తేత్వాన భిక్ఖవో.

౯. జీవన్తో భతియా సోహం, దానం దేన్తే మహాజనే;

తుట్ఠహట్ఠే పముదితే, ఏవం చిన్తేసహం తదా.

౧౦. సమ్పన్నవత్థాలఙ్కారా, దానం దేన్తి ఇమే జనా;

పరత్థపి పహట్ఠావ, సమ్పత్తిమనుభోన్తి తే.

౧౧. బుద్ధుప్పాదో అయం దాని, ధమ్మో లోకే పవత్తతి;

సుసీలా దాని వత్తన్తి, దక్ఖిణేయ్యా జినోరసా.

౧౨. అనావట్ఠితో [అవట్ఠితోచ; అన్ధట్ఠితోచ ఇతిపికత్తచి] సంసారో, అపాయా ఖలు పూరితా;

కల్యాణవిముఖా సత్తా, కామం గచ్ఛన్తి దుగ్గతిం.

౧౩. ఇదాని దుక్ఖితో హుత్వా, జీవామి కసిరేనహం;

దలిద్దో కపణో దీనో, అప్పభోగో అనాలయో.

౧౪. ఇదాని బీజం రోపేమి, సుఖేత్తే సాధుసమ్మతే;

అప్పేవనామ తేనాహం, పరత్థ సుఖితో సియా.

౧౫. ఇతి చిన్తియ భిక్ఖిత్వా, భతిం కత్వాన నేకధా;

మణ్డపం తత్థ కారేత్వా, నిమన్తేత్వాన భిక్ఖవో.

౧౬. ఆయాసేన అదాసాహం, పాయసం అమతాయ సో;

తేన కమ్మవిపాకేన, దేవలోకే మనోరమే.

౧౭. జాతోమ్హి దిబ్బకామేహి, మోదమానో అనేకధా;

దీఘాయుకో వణ్ణవన్తో, తేజస్సీచ అహోసహన్తి.

ఏవం దేవపుత్తో అత్తనా కతపుఞ్ఞకమ్మం విత్తారేన కథేసి, థేరోపి మనుస్సలోకం ఆగన్త్వా మనుస్సానం అత్తనా పచ్చక్ఖతో దిట్ఠదిబ్బసమ్పత్తిం పకాసేసి. తం సుత్వా మహాజనో కుసలకమ్మం కత్వా యేభుయ్యేన సగ్గే నిబ్బత్తోతి.

౧౮. అనాలయో దుగ్గతదీనకోపి,

దానం దదన్తో ధిగతో విసేసం;

సగ్గా పవగ్గం యది పత్థయవ్హో,

హన్త్వాన మచ్ఛేరమలం దదాథాతి.

కపణస్స వత్థుం అట్ఠమం.