౨౭. సద్ధోపాసకస్స వత్థుమ్హి అయమానుపుబ్బీకథా
అతీతే కిర కస్సపదసబలస్స కాలే ఏకో పురిసో సద్ధో రతనత్తయేసు పసన్నో ఉచ్ఛుయన్తకమ్మేన జీవికం కప్పేన్తో పటివసతి. అథ సో ఏకం గిలానభిక్ఖుం దిస్వా తస్స ఉళుఙ్కమత్తం సప్పిం అదాసి, తథేవేకస్స భిక్ఖుస్స ఏకం గుళపిణ్డం అదాసి, అథాపరస్మిందివసే ఏకం ఛాతజ్ఝత్తం సునఖం దిస్వా తస్స భత్తపిణ్డేన సఙ్గహ మకాసి, అథేకస్స ఇణట్ఠకస్స ఏకం కహాపణం అదాసి, అథేకదివసం ధమ్మం సుణమానో ధమ్మదేసకస్స భిక్ఖుస్స సాటకం పూజేసి, సో ఏత్తకం పుఞ్ఞకమ్మం కత్వా భవేసు చరమానోహం సముద్దపబ్బతాదీసుపి యం యం ఇచ్ఛామి. తం తం సమిజ్ఝతూతి పత్థనం అకాసి, సో అపరభాగే కాలం కత్వా తేహేవ కుసలమూలేహి సుత్తప్పబుద్ధో వియ దేవలోకే నిబ్బత్తిత్వా తత్థ మహన్తం దిబ్బసమ్పత్తిం అనుభవిత్వా తతో చుతో అమ్హాకం భగవతో కాలే సావత్థియం మహద్ధనే మహాసాలకులే నిబ్బత్తిత్వా తతో సో విఞ్ఞుతం పత్తో కాలేన కాలం ధమ్మం సుణన్తో ఘరావాసే ఆదీనవం పబ్బజ్జాయ చ ఆనిసంసం సుత్వా పబ్బజితో న చిరేనేవ అరహత్తం పాపుణి. సో అపరభాగే సత్థారం వన్దిత్వా పఞ్చసతభిక్ఖుపరివారో ఉగ్గనగరం అగమాసి, తత్థ సేట్ఠినో భరియా సద్ధా అహోసి పసన్నా. సా థేరం పఞ్చహి భిక్ఖుసతేహి సద్ధిం భిక్ఖాయ చరన్తం దిస్వా తురితతురితా గన్త్వా థేరస్స పత్తం గహేత్వా సద్ధిం పఞ్చసతేహి భిక్ఖూహి భోజేత్వా థేరం తత్థ నిబద్ధవాసత్థం యాచిత్వా పఞ్చసతకూటాగారాని కారాపేత్వా అలఙ్కరిత్వా పఞ్చసతభిక్ఖూ తత్థ వాసేన్తీ నిబద్ధం చతుపచ్చయేహి ఉపట్ఠానమకాసి. తతో థేరో తం పఞ్చసు సీలేసు పతిట్ఠాపేత్వా తత్థ యథాభిరన్తం విహరిత్వా అఞ్ఞత్త గన్తుకామో అనుపుబ్బేన పట్టనగామం అగమాసి, తత్థ వసిత్వా తతో నావం అభిరుయ్హ పఞ్చసతభిక్ఖూహి పరివుతో సముద్దపిట్ఠేన గచ్ఛతి, సముద్దం తరన్తస్స తస్స సాగరమజ్ఝే ఉదరవాతో సముట్ఠహిత్వా పీళేతి, తం దిస్వా భిక్ఖూ భన్తే ఇదం పుబ్బే కేన వూపసమేస్సతీతి పుచ్ఛింసు, థేరో పుబ్బే మే ఆవుసో ఉలుఙ్కమత్తే సప్పిపీతే రోగో వూపసమ్మతీతి ఆహ, భిక్ఖూ భన్తే సముద్దపిట్ఠే కథం సప్పిం లభిస్సామ, అధివాసేథాతి ఆహంసు, తం సుత్వా థేరేన [థేరోననోఆయస్మన్తా ఇతిసబ్బత్థ] న నో ఆయస్మన్తా సప్పి దుల్లభా, మమ పత్తం గహేత్వా సముద్దోదకం ఉద్ధరిత్వా ఆనేథాతి వుత్తే భిక్ఖూ తథా అకంసు. ఉద్ధటమత్తమేవ తంఉదకం పరివత్తేత్వా సప్పి అహోసి, అథ భిక్ఖూ తం దిస్వా అచ్ఛరియబ్భుతచిత్తా జాతా థేరస్స సప్పిం ఉపనామేసుం, థేరేన సప్పినో [సప్పినా ఇతిసబ్బత్థ] పీతమత్తే సో ఆబాధో వూపసమి, అథస్స భిక్ఖూహి కి మేతం భన్తే అచ్ఛరియం, న నో ఇతో పుబ్బే ఏవరూపం దిట్ఠపుబ్బంతి వుత్తే థేరో తేనహి కతపుఞ్ఞానం పుఞ్ఞవిపాకం పస్సిస్సథాతి వత్వా సముద్దం ఓలోకేసి ఇదం సప్పి హోతూతి. అథస్స చక్ఖుపథే సముద్దే సబ్బోదకం పరివత్తేత్వా సప్పి అహోసి. అథస్స భిక్ఖూ అబ్భుతచిత్తా అఞ్ఞమ్పి ఈదిసం పుఞ్ఞం అత్థి భన్తేతి పుచ్ఛింసు, తతో థేరో తేనహి పస్సథాయస్మన్తా మమ పుఞ్ఞన్తి వత్వా సమన్తా తత్థ తత్థ ఘనసేలపబ్బతే ఓలోకేసి, సబ్బాని తాని గుళపిణ్డాని అహేసుం, తతో చక్ఖుపథే సమన్తా భత్తభాజనాని దస్సేసి సబ్యఞ్జనం సోపకరణం. తతో హిమవన్తం ఓలోకేసి, సబ్బం తం సువణ్ణమయం అహోసి. అథాభిముఖట్ఠానే మహన్తం వనసణ్డం ఓలోకేసి, సకలవనసణ్డంనానావిరాగవత్థేహి సఞ్ఛన్నం అహోసి, భిక్ఖూ తం తం పాటిహారియం దిస్వా అతీవ విమ్హితా భన్తే కేన తే పుఞ్ఞకమ్మేన ఏతాదిసాని పాటిహారియాని భవిస్సన్తీతి పుచ్ఛింసు, థేరో కస్సపదసబలస్స కాలే అత్తనా కతం సబ్బం తం కుసలం పకాసేసి. తేనేత్థ.
౧. ఇమస్మిం భద్దకే కప్పే, కస్సపో నామ నాయకో;
సబ్బలోకహితత్థాయ, లోకే ఉప్పజ్జి చక్ఖుమా.
౨. తదాహం ఉచ్ఛుయన్తమ్హి, నియుత్తో గుళకారకో;
తేన కమ్మేన జీవామి, పోసేన్తో పుత్తదారకే.
౩. కిలన్తిన్ద్రియమద్దక్ఖిం, భిక్ఖుం రోగాతురం తదా;
భిక్ఖాచారకవత్తేన, ఘతత్థం [ఘతమత్తముపాగతం ఇతిసబ్బత్థ] సముపాగతం.
౪. ఉలుఙ్కమత్తం సప్పిస్స, అదదం తస్స భిక్ఖునో;
సద్దహన్తో దానఫలం, దయాయు దగ్గమానసో.
.౫
తేన కమ్మేన సంసారే, సంసరన్తో భవాభవే;
యత్థిచ్ఛామి ఘతం తత్థ, ఉప్పజ్జతి అనప్పకం.
౬. ఇచ్ఛామహం సముద్దస్మిం, ఫలమ్పి ఘతమత్తనో;
తం తం సబ్బం ఘతం హోతి, ఘతదానస్సిదం ఫలం.
౭. సుణాథ మయ్హం అఞ్ఞమ్పి, పుఞ్ఞకమ్మం మనోరమం;
తదా దిస్వానహం భిక్ఖుం, రోగేన పరిపీళితం.
౮. గుళపిణ్డం గహేత్వాన, పత్తే తస్స సమాకిరిం;
తేన సో సుఖితో ఆసి, రోగం బ్యపగతం తదా.
౯. తేన మే గుళదానేన, సంసరం దేవమానుసే;
యత్థత్థోస్మి గుళేనాహం, తత్థ తం సులభం మమ.
౧౦. సేలాచ విపులా మయ్హం, హోన్తి చిత్తానువత్తకా;
మహన్తగుళపిణ్డావ, గుళదానే ఇదం ఫలం.
౧౧. అథాపి మే కతం పుఞ్ఞం, సుణాథ సాధు భిక్ఖవో;
ఛాతజ్ఝత్తం ఫన్దమానం, దిస్వాన సునఖం తదా.
౧౨. భత్తపీణ్డేన సఙ్గణ్హిం, తమ్పి దానం ఫలావహం;
తతో పట్ఠాయ నాహోసి, అన్నపానేన ఊనతా.
౧౩. సులభన్నపానో సుఖితో, అహోసింజాతిజాతియం;
అజ్జాపి యది ఇచ్ఛామి, భోజనేన పయోజనం.
౧౪. చక్ఖుపథే సమన్తా మే, జాయన్తుక్ఖలియో బహూ;
అథాపరమ్పి కుసలం, అకాసింతం సణాథ మే.
౧౫. ఇణట్ఠకస్స పోసస్స, అదాసేకం కహాపణం;
తేన మే పుఞ్ఞకమ్మేన, అనోమభవసమ్పదం.
౧౬. పచురం జాతరూపఞ్చ, లభామి జాతిజాతియం;
సచజ్జ ధనకామోహం, ఘనసేలోపి పబ్బతో;
హోతి హేమమయం సబ్బం, ఇణతో మోచనే ఫలం.
౧౭. అఞ్ఞమ్పి మమ పుఞ్ఞం భో, సుణాథ సుతిసోభనం;
కస్సపస్స భగవతో, సాసనేకం బహుస్సుతం.
౧౮. దేసేన్తం మునినో ధమ్మం, సుత్వా పీణితమానసో;
పూజేసింసాటకం మయ్హం, ధమ్మస్స ధమ్మసామినో.
౧౯. తేనాహం పుఞ్ఞకమ్మేన, సంసరం దేవమానుసే;
లభామి పచురం వత్థం, యం లోకస్మిం వరం పరం.
౨౦. ఇచ్ఛమానో సచే అజ్జ [జానమానోపహంఅజ్జ; జానధానోచహంఅజ్జ ఇతికత్థచి], హిమవన్తమ్పి పబ్బతం;
నానావిరాగవత్థేహి, ఛాదయిస్సం సమన్తతో.
౨౧. సచే ఇచ్ఛామి అజ్జేవ, వత్థేనచ్ఛాదయా మితే;
జన్తవో చతుదీపస్మిం, వత్థదానస్సిదం ఫలం.
౨౨. ఏతేసం పుఞ్ఞకమ్మానం, వాహసా కామభూమియం;
సమ్పత్తి మనుభుత్వాన, సావత్థిపుర ముత్తమే.
౨౩. జాతో కులే మహాభోగే,
వుద్ధిప్పత్తో సుఖేధితో;
తస్స ధమ్మం సుణిత్వాన,
పబ్బజిత్వాన సాసనే.
౨౪. లోకుత్తరం అగ్గరసం, భుఞ్చన్తో మునివాహసా;
కిలేసే పజహిత్వాన, అరహత్తమపాపుణిం.
౨౫. కుసలం నా వమన్తబ్బం, ఖుద్దకన్తి కదాచిపి;
అనన్తఫలదం హోతి, నిబ్బాణమ్పి దదాతి తం.
అథస్స ధమ్మదేసనం సుత్వా భిక్ఖూ చ మహాజనో చ దానాదికుసలకమ్మం కత్వా యేభుయ్యేన సగ్గపరాయణా అహేసుంతి.
౨౬. మనోపసాదేనపి అప్పపుఞ్ఞం,
ఏవం మహన్తం భవతీతి ఞత్వా;
మా అప్పపుఞ్ఞన్తి పమజ్జథమ్భో;
సరాథ దేవిం ఇధ లాజదాయిం.
సద్ధోపాసకస్స వత్థుం సత్తమం.