౨౬. చోరఘాతకవత్థుమ్హి అయమానుపుబ్బీకథా

ఏకస్మిం కిర సమయే అమ్హాకం భగవా సావత్థియం ఉపనిస్సాయ జేతవనే విహరతి ధమ్మదేసనాయ మహాజనస్స సగ్గమోక్ఖసమ్పదం దదమానో. తస్మింసమయే పఞ్చసతా చోరా అటవితో నగరం ఆగన్త్వా రత్తిభాగే చోరకమ్మం కత్వా తేన పుత్తదారే పోసేన్తి. అథేకదివసం చోరా చోరకమ్మత్థాయ నగరం పవిసన్తా నగరద్వారే ఏకం దుక్ఖితం జనపదమనుస్సం పస్సిత్వా హమ్భో కత్థ వసతీతి పుచ్ఛింసు, సో అత్తజనా జనపదవాసిభావం పకాసేసి. అథస్స తే కస్మా భో ఇమినా దుక్ఖవాసేన వసిస్ససి, ఏహి అమ్హేహి సద్ధిం చోరకమ్మం కరోన్తో వత్థాలఙ్కారసమ్పన్నో పుత్తదారం పోసేహి. ఇమినా కపణవాసేన న వసాతి ఆహంసు. సో పనిమే యుత్తం కథేన్తీతి తేసం వచనం సమ్పటిచ్ఛి. అథ తే ఏవం సతి అమ్హేహి సద్ధిం ఆగచ్ఛాహీతి వత్వా నం గహేత్వా అన్తోనగరం పవిట్ఠా తత్థ తత్థ విలుమ్పన్తా చోరకమ్మం అకంసు. తదా జానపదికో లద్ధవిభవో ఇమమేవ వరతరన్తి తేహి సద్ధిం చోరకమ్మం కరోన్తో జీవికం కప్పేసి, అథేకదివసం రాజపురిసా కతకమ్మే తే సబ్బేవ గహేత్వా పచ్ఛాబాహం గాళ్హం బన్ధిత్వా కోసలరఞ్ఞో దస్సేసుం, రాజా తే దిస్వా ఏవమాహ, భణే తుమ్హాకం అన్తరే యో ఏతేసం మారేత్వా జీవితక్ఖయం పాపేస్సతి, తస్స జీవితదానం దమ్మీతి, తం సుత్వా తే చోరా సబ్బే అఞ్ఞమఞ్ఞఞాతిసుహదసమ్బన్ధభావేన తం న ఇచ్ఛింసు. సో పన జనపదవాసీ మనుస్సో అహమేతే సబ్బే మారేస్సామీతి రఞ్ఞో వత్వా తేనానుఞ్ఞాతో తే సబ్బే మారేసి. తం దిస్వా తుట్ఠో రాజా తస్స చోరఘాతకమ్మం అదాసి. సో చోరే చ వజ్ఝప్పత్తే చ మారేన్తో పఞ్చవీసతివస్సాని వసన్తో అపరభాగే మహల్లకో అహోసి. అథ సో మన్దబలత్తా కతిపయపహారేనాపి చోరం మారేతుం న సక్కోతి, రాజా తం ఞత్వా అఞ్ఞస్స చోరఘాతకమ్మం అదాసి. అథ సో చోరఘాతకమ్మా [చోరఘాతకమ్మ ఇతిపికత్థచి] పరిహీనో అత్తనో గేహే వసతి. తదా అఞ్ఞతరో మనుస్సో మన్తం పరివత్తేత్వా నాసావాతేన మనుస్సమారణకమన్తం జానాతి. తథాహి హత్థపాదకణ్ణనాససీసాదీసు యంకిఞ్చి ఛేజ్జభేజ్జం కత్తుకామో మన్తం పరివత్తేత్వా నాసావాతం విస్సజ్జేతి. తం తం ఠానం ఛిజ్జతి భిజ్జతి, ఏవం మహానుభావో సో మన్తో, అథ సో తం పురిసం ఉపట్ఠహిత్వా మన్తం లభిత్వా రఞ్ఞో సాసనం పేసేసి. అహం ఇతో పుబ్బే మహల్లకత్తా చోరానం హత్థపాదాదయో దుక్ఖేన ఛేజ్జ భేజ్జం కరోమి, మారేతబ్బేపి దుక్ఖేన మారేమి. ఇదాని పనాహం తథా న కరోమి, మమ మన్తానుభావేన ఛేజ్జభేజ్జకమ్మం కరిస్సామీతి. రాజా తం సాసనం సుత్వా సాధూతి తం పక్కోసాపేత్వా ఠానన్తరం తస్సేవ పాకతిక మకాసి. సో తతో పట్ఠాయ తం కమ్మం కరోన్తో పున పఞ్చవస్సాని అతిక్కామేసి. సో మహల్లకో ఖీణాయుకో దుబ్బలో మరణమఞ్చపరాయణో హుత్వా మరణవేదనాదుక్ఖేన మహన్తేన భయానకేన సద్దేన విస్సరం విరవన్తో నిమీలితేన చక్ఖునా భయానకం నరకగ్గిజాలాపజ్జలన్తఅయకూటముగ్గరధరే నిరయపాలే చ పస్సన్తో నిపన్నో హోతి, తతో తస్స పటివిస్సకగేహే మనుస్సా తస్స భయానకసద్దసవణేన గేహం ఛట్టేత్వా పలాయింసు. తస్మిం కిర దివసే మహాసారిపుత్తత్థేరో దిబ్బచక్ఖునా లోకం ఓలోకేన్తా తం చోరఘాతకం తదహేవ కాలంకత్వా నిరయే నిబ్బత్తమానం దిస్వా మయి తత్థ గతే పనేస మయి పసాదేన సగ్గే నిబ్బత్తతీతి ఞత్వా అజ్జ మయా తస్సానుగ్గహం కాతుం వట్టతీతి పుబ్బణ్హసమయం నివాసేత్వా తస్స ఘరద్వార మగమాసి. అథ సో థేరం దిస్వా కుద్ధో కోపేన తటతటాయమానదేహో అజ్జ తం విజ్ఝిత్వా ఫాలేత్వా మారేస్సామీతి నిపన్నోవ మన్తం పరివత్తేత్వా నాసావాతం విస్సజ్జేసి, థేరో తస్మిం ఖణే నిరోధసమాపన్నో నిరోధా వుట్ఠాయ సురియో వియ విరోచమానో అట్ఠాసి, అథ సో థేరస్స తయో వారే తథేవ కత్వా కిఞ్చి కాతుం అసక్కోన్తో అతివియ విమ్హితచిత్తో థేరే చిత్తం పసాదేత్వా అత్తనో పటియత్తం పాయసం థేరస్స దాపేసి, థేరో మఙ్గలం వడ్ఢేత్వా విహారమేవ అగమాసి, చోరఘాతకో థేరస్స దిన్నదానం అనుస్సరన్తో తస్మిం ఖణే కాలం కత్వా సగ్గే నిబ్బత్తి. అహో వీతరాగానం బుద్ధపుత్తానం ఆనుభావో. ఏవం నరకే నిబ్బత్తమానోపిస్స బలేన సగ్గే నిబ్బత్తోతి. తథాహి.

౧. దానం తాణం మనుస్సానం, దానం దుగ్గతివారణం;

దానం సగ్గస్స సోపానం, దానం సన్తికరం పరం.

౨. ఇచ్ఛితిచ్ఛితదానేన, దానం చిన్తామణీ వియ;

కప్పరుక్ఖోవ సత్తానం, దానం భద్దఘటోవియ.

౩. సీలవన్తస్స దానేన, చక్కవత్తిసిరిమ్పి చ;

లభన్తి సక్కసమ్పత్తిం, తథా లోకుత్తరం సుఖం.

౪. పాపకమ్మేసు నిరతో, ఠితోయం నరకాయనే [నరకావనే ఇతిపికత్థచి];

సారిపుత్తస్స థేరస్స, పిణ్డపాతస్స వాహసా.

౫. అపాయం పరివజ్జేత్వా, నేకదుక్ఖసమాకులం;

దేవసఙ్ఘపరిబ్బూళ్హో, గతో దేవపురం వరం.

౬. తస్మా సుఖేత్తే సద్ధాయ, దేథ దానాని కామదం;

దానం దేన్తేహి సీలమ్పి, పాలనీయంతిసున్దరన్తి [పాలనంచాతిసున్దరం ఇతిపికత్థచి].

అథ భిక్ఖూ ధమ్మసభాయం సన్నిపతిత్వా నిసిన్నా భగవన్తం పుచ్ఛింసు, కింభన్తే సో పాపో చతూసు అపాయేసు కతరస్మిం నిబ్బత్తోతి. అథ సత్థా అజ్జేస భిక్ఖవే సారిపుత్తస్స దిన్నదానానుభావేన దేవలోకే నిబ్బత్తో, తస్సేవ నిస్సన్దేన అనాగతే పచ్చేకబుద్ధో భవిస్సతీతి బ్యాకాసీతి.

౭. భో సారిపుత్తే నిహితప్పదానం,

ఖణేన పాపేతి హి సగ్గమగ్గం;

తస్మా సుఖేత్తేసు దదాథ దానం,

కామత్థ చే సగ్గమోక్ఖం పరత్థ.

చోరఘాతకవత్థుం ఛట్ఠమం.