౨౫. కవీరపట్టన వత్థుమ్హి అయమానుపుబ్బీకథా

జమ్బుదీపే కిర చోళరట్ఠే కావీరపట్టనం నామ అహోసి. తత్థ మాహిస్సరికా బహూ మిచ్ఛాదిట్ఠికా వసన్తి. తత్థేకస్మిం దేవాలయే చిత్తకమ్మం కరోన్తా ఏకస్మిం ఫలకే ఇస్సరస్స ఓనమిత్వా వన్దనాకారం భగవతో రూపం అకంసు. తస్మిం సమయే తత్థ బహూ ఉపాసకా తం దేవకులం గన్త్వా తత్థ తత్థ చిత్తకమ్మాని ఓలోకేన్తా తస్మిం ఫలకే తం చిత్తకమ్మం అద్దసంసు. దిస్వాన తే అహో అమ్హేహి అపస్సితబ్బం పస్సితం. సదేవకే లోకే సమారకే సబ్రహ్మకే సస్సమణబ్రాహ్మణియాసదేవమనుస్సాయ పజాయ చ అపరిమాణేసు చక్కవాళేసు భగవతో ఉత్తరితరం ఠపేత్వా సమసమోపి నత్థి. సకలేహి సత్తనికాయేహి వన్దనీయో పూజనీయో భగవా. అననురూపం తస్స ఏతేహి కతంతి రోదన్తా పరిదేవన్తా రాజద్వారం గన్త్వా ఉగ్ఘోసేసుం, తం సుత్వా రాజా తే పక్కోసాపేత్వా కస్మా తుమ్హే ఉగ్ఘోసేథాతి పుచ్ఛి, తే ఏవ మాహంసు. దేవ అమ్హాకం భగవా దేవాతిదేవో సక్కాతిసక్కో బ్రహ్మాతిబ్రహ్మా మేరువ అచలో సాగరో గమ్భీరో ఆకాసోవ అనన్తో పథవీవ పత్థటోతిఆదీహి భగవతో గుణం వణ్ణేసుం. తేన వుత్తం అపదానే.

౧. బత్తింసలక్ఖణధరో, సునక్ఖత్తోవ చన్దిమా;

అనుబ్యఞ్జనసమ్పన్నో, సాలరాజావ ఫుల్లితో.

౨. రంసిజాలపరిక్ఖిత్తో, దిత్తోవ కనకాచలో;

బ్యామప్పభాపరివుతో, సతరంసి దివాకరో.

౩. సోణ్ణా ననో జినవరో, సమణీవ సిలుచ్చయో;

కరుణాపుణ్ణహదయో, వివట్టో వియ సాగరో.

౪. లోకవిస్సుతకిత్తీవ, సినేరువ నగుత్తమో;

యససా వితతో ధీరో, ఆకాససదిసో ముని.

౫. అసఙ్గచిత్తో సబ్బత్థ, అనిలో వియ నాయకో;

పతిట్ఠా సబ్బభూతానం, మహీవ మునిసుత్తమో.

౬. అనూపలిత్తో లోకేన, తోయేన పదుమం యథా;

కువాదగచ్ఛదహనో, అగ్గిక్ఖన్ధోవ సోభతి.

౭. అగదో వియ సబ్బత్థ, కిలేసవిసనాసకో;

గన్ధమాదనసేలోవ, గుణగన్ధవిభూసితో.

౮. గుణానం ఆకరో ధీరో, రతనానంవ సాగరో;

సిన్ధూవ వనరాజీనం, కిలేసమలహారకో.

౯. విజయీవ మహాయోధో, మారసేనప్పమద్దనో;

చక్కవత్తీవ సో రాజా, బోజ్ఝఙ్గరతనిస్సరో.

౧౦. మహాభిసక్కసఙ్కాసో, దోసబ్యాధితికిచ్ఛకో;

సల్లకత్తో యథా వేజ్జా, దిట్ఠిగణ్డవిఫాలకో.

౧౧. సత్థా నో భగవా దేవ, మహాబ్రహ్మేహి వన్దితో;

దేవిన్దసురసిద్ధేహి, వన్దనీయో సదా దరా.

౧౨. సబ్బేసు చక్కవాళేసు, యే అగ్గా యే చ పూజితా;

తేసమగ్గో మహారాజ, భగవా నో పతాపవాతి.

అయుత్తం దేవ దేవకులేహి కతంతి ఆహంసు. తం సుత్వా రాజా భో సబ్బేపి మనుస్సా అత్తనో అత్తనో దేవతానం మహన్తభావం కథేన్తి. తుమ్హాకం పన సత్థునో మహన్తభావం కథం అమ్హాకం జానాపేథాతి, ఉపాసకా న గరు త్వం మహారాజ ఫలకం ఆహరాపేత్వా సుద్ధవత్థేన వేఠేత్వా తం అత్తనో ముద్దికాయ లఞ్ఛిత్వా సురక్ఖితసుగోపితే ఏకస్మిం దేవకులే ఠపేత్వా సత్తాహచ్చయేన ఆహరాపేత్వా తం ఓలోకేథ, తదా నో సత్థునో మహన్తానుభావం జానాథాతి ఆహంసు, అథ రాజా తేసం వుత్తనియామేనేవ కారాపేత్వా అన్తోదేవకులే ఠపేత్వా సబ్బద్వారాని పిదహిత్వా లఞ్ఛేత్వా రక్ఖేయ్యాథాతి నియోజేసి. తతో తే ఉపాసకా సబ్బే సన్నిపతిత్వా సత్తాహం దానం దేన్తా సీలం రక్ఖన్తా ఉపోసథకమ్మం కరోన్తా సబ్బసత్తేసు మేత్తిం భావేన్తా సబ్బసత్తానం అత్తనా కతపుఞ్ఞేసు పత్తిం దేన్తా తిణ్ణం రతనానం పూజం కరోన్తా ఏవం ఉగ్ఘోసేసుం. అమ్హాకం కతకుసలనిస్సన్దేన లోకే మహిద్ధికా మహానుభావా సబ్బే దేవా చ లోకం పాలేన్తా చత్తారో మహారాజానో చ అమ్హాకం సత్థునో ఉపట్ఠానాయ [ఉపట్ఠాయ ఇతిసబ్బత్థ] ఠితభావం దస్సేన్తూతి సచ్చకిరియం అకంసు. అథ తేసం పుఞ్ఞానుభావేన తస్మిం ఖణే సక్కస్స దేవరఞ్ఞో పణ్డుకమ్బలసిలాసనం ఉణ్హాకారం దస్సేసి. తతో సో మనుస్సలోకం ఓలోకేన్తో మిచ్ఛాదిట్ఠీహి కతం తం విప్పకారం దిస్వా సంవిగ్గో ఆగన్త్వా ఇస్సరం భగవతో పాదే వన్దిత్వా సయితాకారం కత్వా తం పవత్తిం ఉపాసకానం కథేత్వా సకట్ఠానమేవ అగమాసి. తతో సత్తమే దివసేపాతోవ తే సబ్బేపి రఞ్ఞో సన్తికం గన్త్వా వన్దిత్వా ఏవమాహంసు. దేవ ఇస్సరో అమ్హాకం భగవతో పాదే సిరసా వన్దిత్వా నిపన్నోతి. అథ రాజా తేసం కథం సుత్వా నగరే భేరిం చరాపేత్వా మహాజనే సన్నిపాతేత్వా తేహి పరివుతో దేవకులం గన్త్వా లఞ్ఛం భిన్దాపేత్వా ద్వారం వివరిత్వా ఫలకం ఆహరాపేత్వా వేఠితసాటకే మోచాపేసి. అథ రాజా చ మహాజనో చ తం మహన్తం పాటిహారియం దిస్వా మిచ్ఛాదిట్ఠిం పహాయ సబ్బే సత్థునో సరణ మగమంసు. అథ రాజా తం దేవకులం భిన్దాపేత్వా మహన్తం రమణీయం విహారం కారాపేత్వా యావజీవం పుఞ్ఞకమ్మం కత్వా దేవలోకే నిబ్బత్తి.

౧౩. అనబ్భుతం సత్థు ధరీయమానే,

కరోన్తి దిస్వా కుసలాని ఇద్ధిం;

యే తం మునిన్దే పరినిబ్బుతమ్హి,

కరోన్తి పుఞ్ఞాని మహబ్భూతం యేతి.

కావీరపట్టనవత్థుం పఞ్చమం.