౨౨. మిచ్ఛదిట్ఠికస్స వత్థుమ్హి అయమానుపుబ్బీకథా

భగవతి ధరమానే రాజగహనగరే కిర ఏకో బ్రహ్మభత్తికో మిచ్ఛాదిట్ఠికో పటివసతి, తత్థేవ సమ్మాదిట్ఠికోపి. తేసం ఉభిన్నమ్పి ద్వే పుత్తా అహేసుం. తే ఏకతో కీళన్తా వడ్ఢన్తి. అథాపరభాగే గుళకీళంకీళన్తానం సమ్మాదిట్ఠికస్స పుత్తో ‘‘నమో బుద్ధయా’’తి వత్వా గుళ్హం ఖిపన్తో దివసే దివసే జినాతి. మిచ్ఛాదిట్ఠికస్స పుత్తో ‘‘నమో బ్రహ్మునో’’తి వత్వా ఖిపన్తో పరాజేతి, తతో మిచ్ఛాదిట్ఠికస్స పుత్తో నిచ్చం జినన్తం సమ్మాదిట్ఠికం కుమారం దిస్వా సమ్మ త్వం నిచ్చమేవ జినాసి, కిం వత్వా గుళం ఖిపసీతి పుచ్ఛి. సోహం సమ్మ ‘‘నమో బుద్ధాయా’’తి వత్వా ఖిపామీతి ఆహ. సోపి తతో పట్ఠాయ ‘‘నమో బుద్ధాయా’’తి వత్వా ఖిపతి, అథ తే యేభుయ్యేన దూతే సమసమావ హోన్తి. అపరభాగే మిచ్ఛాదిట్ఠికస్స పుత్తో పితరా సద్ధిం దారూనమత్థాయ వనం గన్త్వా సకటేన దారుం గహేత్వా ఆగచ్ఛన్తో నగరద్వారసమీపే సకటం విస్సజ్జేత్వా తిణే ఖాదనత్థాయ గోణే విస్సజ్జేసి, గోణా తిణం ఖాదన్తో అఞ్ఞేహి గోరూపేహి సద్ధిం అన్తోనగరం పవిసింసు. అథస్స పితా గోణే పరియేసన్తో సకటం ఓలోకేహీతి పుత్తం నివత్తేత్వా నగరం పవిట్ఠో అహోసి, అథ సాయణ్హే జాతే మనుస్సా నగరద్వారం పిదహింసు, తతో కుమారో బహినగరే దారుసకటస్స హేట్ఠా సయన్తో నిద్దూపగతో అహోసి. అథ తస్సా రత్తియా సమ్మాదిట్ఠికో చ మిచ్ఛాదిట్ఠికో చాతి ద్వే యక్ఖా గోచరం పరియేసమానా సకటస్స హేట్ఠా నిపన్నం కుమారం అద్దసంసు, తేసు మిచ్ఛాదిట్ఠికో ఇమం ఖాదామీతి ఆహ. అథాపరో మా ఏవ మకాసి, ‘‘నమో బుద్ధాయా’’తి వాచకో ఏసోతి, ఖాదామేవేతన్తి వత్వా ఇతరేన యావతతియం వారియమానోపి గన్త్వా తస్స పాదే గహేత్వా ఆకడ్ఢి. తస్మిం ఖణే దారకో పుబ్బపరిచయేన ‘‘నమో బుద్ధాయా’’తి ఆహ తం సుత్వా యక్ఖో భయప్పత్తో లోమహట్ఠో హత్థం విస్సజ్జేత్వా పటిక్కమ్మ అట్ఠాసి. అహో అచ్ఛరియం బుద్ధానుభావం అబ్భుతం, ఏవం అత్తం అనీయ్యాతేత్వా పరిచయేన ‘‘నమో బుద్ధాయా’’తి వుత్తస్సపి భయం ఛమ్భితత్తం ఉపద్దవం వా న హోతి. పగేవ అత్తం నీయ్యాతేత్వా యావజీవం బుద్ధం సరణం గతస్సాతి. వుత్తఞ్హి.

౧. యథాపి సిఖినో నాదం, భుజఙ్గానం భయావహం;

ఏవం బుద్ధోతి వచనం, అమనుస్సానం భయావహం.

౨. యథా మన్తస్స జప్పేన, విలయం యాతి కిబ్బిసం;

ఏవం బుద్ధోతి వచనేన, అపయన్తి [పహాయన్తి ఇతిసబ్బత్థ] పిసాచకా.

౩. అగ్గిం దిస్వా యథా సిత్థం, దూరతోవ విలీయతి;

దిస్వానేవం సరణగతం, పేతా పేన్తివ [పేతాపేన్తావ ఇతికత్థచి] దూరతో.

౪. పవరం బుద్ధఇచ్చేత, మక్ఖరద్వయమబ్భుతం;

సబ్బో పద్దవనాసాయ, థిరపాకార ముగ్గతం.

౫. సత్తరతనపాసాదం, తమేవ వజిరం గుహం;

తమేవ నావం దీపం తం, తమేవ కవచం సుభం.

౬. తమేవ సిరసి భాసన్తం, కిరీటం రతనామయం;

లలాటే తిలకం రమ్మం, కప్పూరం నయనద్వయే.

౭. తాడఙ్కం కణ్ణయుగలే, సోణ్ణమాలా గలే సుభా;

ఏకావళి తారహార, భారా జత్తుసు లఙ్కతా.

౮. అఙ్గదం బాహుమూలస్స, కరగ్గే వలయం తథా;

అఙ్గులిస్వఙ్గులియఞ్చ, ఖగ్గం మఙ్గలసమ్మతం.

౯. సోణ్ణా తపత్త ముణ్హీసం, సబాణంవ సరాసనం;

తమేవ సబ్బాలఙ్కారం, తమేవ దురితాపహం.

౧౦. తస్మా హి పణ్డితో పోసో,

లోకలోచనసత్థునో;

సరణం తస్స గన్తేవ,

గుణనామం ఏహిపస్సికం.

౧౧. నమోతి వచనం పుబ్బం, బుద్ధాయేతి గిరం తదా;

సుపన్తేన కుమారేన, మిచ్ఛాదిట్ఠికసూనునా.

౧౨. సుత్వా వుత్తం పిసా చాపి, మనుస్సకుణపే రతా;

న హింసన్తి అహో బుద్ధ, గుణసారమహన్తతాతి.

అథ సమ్మాదిట్ఠికయక్ఖో మిచ్ఛాదిట్ఠికస్స యక్ఖస్స ఏవమాహ, అయుత్తం భో తయా కతం. బుద్ధగుణే పహారో దిన్నో, దణ్డకమ్మం తయా కాతబ్బంతి, తేన కింమయా సమ్మ కాతబ్బన్తి వుత్తే బుభుక్ఖితస్స ఆహారం దేహీతి ఆహ. తతో సో సాధూతి వత్వా యావాహం ఆగచ్ఛామి, త్వం తావేత్థ వచ్ఛాహీతి వత్వా బిమ్బిసారరఞ్ఞో కఞ్చనతట్టకే వడ్ఢితం రసభోజనం ఆహరిత్వా కుమారస్స పితువణ్ణేన దారకం భోజేత్వా పున కుమారేన వుత్తబుద్ధవచనఞ్చ అత్తనా కతవాయామం చాతి సబ్బం తట్టకే లిఖిత్వా ఇదం రఞ్ఞోయేవ పఞ్ఞాయతూతి అధిట్ఠాయ అగమంసు, అథ పభాతాయ రత్తియా రఞ్ఞో భోజనకాలే రాజపురిసా తత్థ తట్టకం అదిస్వా నగరం ఉపపరిక్ఖన్తా సకటే దారకఞ్చ తట్టకఞ్చ దిస్వా తట్టకేన సద్ధిం తం గహేత్వా రఞ్ఞో దస్సేసుం. రాజా తట్టకే అక్ఖరాదీని దిస్వా వాచేత్వా తస్స గుణే పసన్నో మహన్తేన యసేన సద్ధిం సేట్ఠిట్ఠానమదాసి.

౧౩. జినస్స నామం సుపినేన పేవం,

న హోతి భీతిం లపనేన యస్మా;

తస్మా మునిన్దం సతతం సరాథ,

గుణే సరన్తా సరణఞ్చ యాథాతి.

మిచ్ఛాదిట్ఠికస్స వత్థుం దుతియం.