౨౦. సహాయస్స పరిచ్చత్తజీవితకస్స వత్థుమ్హి అయమానుపుబ్బీకథా

భగవతి పరినిబ్బుతే సావత్థియం సోమబ్రాహ్మణో సోమదత్తబ్రాహ్మణోతి ద్వే బ్రాహ్మణా వసన్తి. తత్థ సోమదత్తబ్రాహ్మణేన సద్ధిం సోమబ్రాహ్మణో యేభుయ్యేన దూతం కీళతి. అథేకదివసం సోమదత్తో సోమబ్రాహ్మణం తేన పరాజేత్వా తస్స ఉత్తరాసఙ్గఞ్చ లఞ్ఛనముద్దికఞ్చ గహేత్వా అత్తనో గేహం గచ్ఛన్తో సోమబ్రాహ్మణస్స ఏహి గేహం గచ్ఛా- మాతి ఆహ. తతో సోమో నాహం సమ్మ ఏకసాటకో హుత్వా అన్తరవీథిం ఓతరితుం సక్కోమి. గమనతో ఏత్థేవ మే ఠానం వరతరన్తి ఆహ, సోమదత్తేన ఏవం సతి సమ్మ ఇమం ఉత్తరాసఙ్గం గణ్హాతి తస్స తం దత్వా ఇదాని సమ్మ ఏహీతి వుత్తోపి నాగచ్ఛతి. పున తేన భో కస్మా నాగచ్ఛసీతి పుట్ఠో సమ్మ మమ హత్థే ముద్దికం అపస్సన్తా మే పుత్తదారాదయో మయా సద్ధిం కలహం కరోన్తీతి ఆహ, అథ సో ఏవం సన్తే యదా తే పహోతి. తదా మయ్హం దేహీతి ముద్దికమ్పి దత్వా తం గహేత్వా గేహం అగమాసి. అథ తే ఏత్తకేన సహాయా అహేసుం. అపరభాగే సోమదత్తబ్రాహ్మణం అయం పరదారకమ్మం అకాసీతి మనుస్సా గహేత్వా రఞ్ఞో దస్సేసుం. రాజా తస్స రూపసమ్పత్తిం దిస్వా రాజాణం అకత్వా మా భో పున ఏవమకాసీతి ఓవదిత్వా విస్సజ్జేసి. రాజా నం యావతతియవారం ఓవదన్తో విస్సజ్జేత్వా చతుత్థేవారే గచ్ఛథేతం ఆఘాతనం నేత్వా మారేథాతి ఆణాపేసి. ఏవం పాపకమ్మే నిరతా అనేకాకారేన ఓవదన్తాపి న సక్కా నివారేతుం. తథాహి.

౧. సోణా చేవ సిగాలా చ, వాయసా నీలమక్ఖికా;

ఇచ్చేతే కుణపే సత్తా, న సక్కా తే నిసేధితుం.

౨. తథా పాణాతిపాతేసు, పరదారే సురాయ చ;

ముసావాదేసు థేయ్యేసు, సత్తసత్తా న వారియాతి.

తతో రాజపురిసా తం బన్ధిత్వా పక్కమింసు. తదా సోమబ్రాహ్మణో సోమదత్తం తథా నీయమానం దిస్వా కమ్పమానహదయో రాజపురిసానం సన్తికం గన్త్వా ఇమం భో ముహుత్తం మా మారేథ. యావ రాజానం జానాపేస్సామీతి వత్వా రఞ్ఞో సన్తికం గన్త్వా వన్దిత్వా ఠితో దేవ మమ జీవితం సోమదత్తస్స బ్రాహ్మణస్స దస్సామి. ఏతం ముఞ్చథ. యది మారేతుకామా, మం మారేథాతి ఆహ. రాజా తుణ్హీ [తుట్ఠో ఇతికత్థచి] అహోసి, రాజపురిసా సోమదత్తం ముఞ్చిత్వా సోమబ్రాహ్మణం ఆఘాతనం నేత్వా మారేసుం, అహో కతఞ్ఞునో కతవేదితా.

హోతి చేత్థ.

౩. కకూపకార మత్తానం, సరన్తా కేచి మానుసా;

జీవితం దేన్తి సోమోవ, సోమదత్తస్స అత్తనోతి.

సో తేన జీవితదానేన దేవలోకే నిబ్బత్తిత్వా మహన్తే కనకవిమానే దేవచ్ఛరాసహస్సపరివుతో దిబ్బసమ్పత్తిమనుభోన్తో పటివసతి. తదా సోమదత్తబ్రాహ్మణో ఏసో మం మరణప్పత్తం మోచేసీతి వత్వా తస్సత్థాయ దానం దత్వా పత్తిం అదాసి. తావదేవస్స తతో బహుతరం దేవిస్సరియం అహోసి దేవానుభావఞ్చ. తతో సో సోమదేవో అత్తనో దేవిస్సరియం ఓలోకేన్తో సహాయస్స అత్తనో జీవితదానం అద్దస. దిస్వా అత్తభావం విజహిత్వా మాణవకవణ్ణేన సోమదత్తబ్రాహ్మణం ఉపసఙ్కమిత్వా పటిసన్థారం కత్వా అత్తానం దేవలోకే నిబ్బత్తభావం పకాసేత్వా తం గహేత్వా అత్తనో ఆనుభావేన దేవలోకం నేత్వా యథాకామం సమ్పత్తి మనుభవాతి వత్వా సత్తాహం దేవస్సరియం దత్వా సత్తమే దివసే నేత్వా తస్స గేహేయేవ పతిట్ఠాపేసి. తత్థ హి దిబ్బసమ్పత్తి మనుభూతస్స మనుస్ససమ్పత్తి పటిక్కులా హోతి. తతో సో దిబ్బసమ్పత్తిమనుస్సరన్తో కిసో దుబ్బలో ఉప్పణ్డుప్పణ్డుకజాతో అహోసి. అథేకదివసం దేవపుత్తో తం ఓలోకేన్తో తథా దుక్ఖప్పత్తం దిస్వా న సక్కా మనుస్సేన దిబ్బసమ్పత్తిమనుభవితున్తి ఇచ్ఛితిచ్ఛితసమ్పత్తిదాయకం ఏకం చిన్తామణిం దత్వా తస్స భరియమ్పి అత్తనో ఆనుభావేన రూపవన్థం యసవన్తం వణ్ణవన్తం అతిక్కన్తమనుస్సిత్థివణ్ణం అకాసి, అపరభాగే తే జయమ్పతికా పచ్చక్ఖతో దిట్ఠదిబ్బసమ్పత్తివిభవా దానం దత్వా సీలం రక్ఖిత్వా సహాయదేవపుత్తస్స సన్తికేయేవ నిబ్బత్తింసూతి.

౪. మన్దేన నన్దితమనా ఉపకారకేన,

పాణమ్పి దేన్తి సుజనా ఇతి చిన్తయిత్వా;

మిత్తద్దు మా భవథ భో ఉపకారకస్స;

పాసంసియా భవథ సాధుజనేహి నిచ్చంతి.

సహాయస్స పరిచ్చత్తజీవితకస్స వత్థుం దసమం.

నన్దియరాజవగ్గో దుతియో.