నన్దియరాజవగ్గో
౧౧. నన్దియరాజస్స వత్థుమ్హి అయమానుపుబ్బీకథా
ఇతో కిర కప్పసతసహస్సమత్థకే పదుముత్తరో నామ సత్థా లోకే ఉదపాది సదేవకం లోకం సంసారకన్తారా ఉత్తారేన్తో. తస్మిం కిర సమయే ఏకో కుటుమ్బికో సత్థు ధమ్మదేసనం సుత్వా పసన్నమానసో బుద్ధపముఖం భిక్ఖుసఙ్ఘం నిమన్తేత్వా మహాదానం సజ్జేత్వా అత్తనో భవనం దేవభవనమివ అలఙ్కరిత్వా బుద్ధారహం మహాసనం పఞ్ఞాపేత్వా గన్త్వా భగవన్తం యాచి కాలోయం భన్తే భగవతో భత్తగ్గస్స ఉపసఙ్కమనాయాతి. అథ భగవా భిక్ఖుసఙ్ఘపరివుతో మహతా బుద్ధానుభావేన గన్త్వా నిసీది పఞ్ఞత్తవరబుద్ధాసనే, తతో కుటుమ్బికో హట్ఠో ఉదగ్గో సపరిసో భగవన్తం పరివిసతి అనేకేహి మధురన్నపానాదీహి. తదా తస్స భగవతో సాసనే ధుతఙ్గధరానం అగ్గో వసభత్థేరోనామ మహాసావకో సపదానవత్తేన పిణ్డాయ చరమానో తస్స కుటుమ్బికస్స గేహద్వారే అట్ఠాసి, అథ సో థేరం దిస్వా భన్తే సత్థా అన్తోగేహే నిసిన్నో, తుమ్హేపి పవిసథాతి యాచి, థేరో అపవిసిత్వావ అగమాసి, కుటుమ్బికో భగవన్తం ఉపసఙ్కమిత్వా తమత్తం వత్వా కిం భన్తే సదేవకే లోకే భగవతాపి ఉత్తరితరో గుణేన సంవిజ్జతీతి ఆహ. అథస్స సత్థా పుత్తోపమం దస్సేత్వా థేరస్స గుణే వణ్ణేన్తో ఏవమాహ.
౧. పాలేన్తి నిమ్మలం కత్వా, పాతిమోక్ఖాదిసంవరం;
సమాదిన్నధుతఙ్గాచ, అప్పిచ్ఛా మునిసూనవో.
౨. నిచ్చ మన్తకయుద్ధమ్హి, నద్ధా యోధావ దప్పితా;
పుఞ్ఞానం వత్థుభూతా తే, దేవమానుసకా దినం.
౩. ధారేమహం వణ్ణవన్తం, సీవేయ్యమ్పిచ చీవరం;
బుద్ధపుత్తా మహానాగా న ధారేన్తి తథావిధం.
౪. ధారేన్తి తే పంసుకూలం, సఙ్ఘాటేత్వా పిలోతికే;
వణచ్ఛాదనచోలంవ, ఇచ్ఛాలోభ వివజ్జితా.
౫. సాదియామి సదా హమ్భో, ఉపాసకనిమన్తనం;
నేవ సాదేన్తి సమ్బుద్ధ, పుత్తో పాసకయాచనం.
౬. సపదానేన యం లద్ధం, లూఖంవాపి పణీతకం;
తేన తుస్సన్తి మే పుత్తా, రసగేధవివజ్జితా.
౭. నిపజ్జామి అహం సాధు, సన్థతే సయనే సుభే;
న తే సేయ్యం పకప్పేన్తి, సంసారభయభీరుకా.
౮. ఠానా సనగమనేన, కప్పేన్తి ఇరియాపథం;
నేకభూమిసమాకిణ్ణ, పాసాదేసు వసామహం.
౯. బుద్ధపుత్తా తథాచ్ఛన్నం, న కదా పవిసన్తి తే;
రుక్ఖమూలే సుసానస్మిం, అబ్భోకాసే రమన్తి తే.
౧౦. భావేత్వా భవనాసాయ, హేతుం భావనముత్తమం;
అహం గామే వసిస్సామి, పాపేన్తో జనతం సివం.
౧౧. రమన్తి మమ పుత్తా తే, పన్తసేనాసనే కకా;
తేసం మహత్తరో సన్తో, థేరోయం వసభో మహా;
ధుతపాపో ధుతఙ్గగ్గో, ఞాతోయం మమ సాసనేతి.
ఏవం భగవా హత్థం ఉక్ఖిపిత్వా చన్దమణ్డలే పహరన్తో వియ థేరస్స గుణే పకాసేసి, తతో సో తస్స గుణకథం సుత్వా సయమ్పితం ఠానన్తరం కామయమానో యన్నూనాహం అనాగతే అఞ్ఞతరస్స సమ్మాసమ్బుద్ధస్స సాసనే ధుతఙ్గధరానం అగ్గో భవిస్సామీతి తం ఠానన్తరం పత్థేన్తో భగవతో పాదమూలే నిపజ్జి, సత్థా తం కారణం ఉపపరిక్ఖిత్వా ఇతో కప్పసతసహస్సమత్థకే గోతమో నామ సత్థా ఉప్పజ్జిస్సతి. త్వం తదా ధుతఙ్గధరానం అగ్గో హుత్వా కస్స పోతి పఞ్ఞాయిస్సతీతి బ్యాకరణ మదాసి. తతో పట్ఠాయ సో సోమనస్సో పుఞ్ఞకమ్మం కత్వా తతో చుతో దేవమనుస్సేసు దేవిస్సరియం అనుభవన్తో విపస్సీసమ్మాసమ్బుద్ధకాలే ఏకసాటకో నామ బ్రాహ్మణో హుత్వా మహాదానం అదాసి. తతో చుతో కస్సపసమ్మాసమ్బుద్ధే పరినిబ్బుతే బారాణసీనగరే బారాణసీసేట్ఠి హుత్వా నిబ్బత్తో దానాదీని పుఞ్ఞాని కత్వా తతో చవిత్వా సంసారే సంసరన్తో దసవస్ససహస్సా యుకేసు మనుస్సేసు బారాణసియం ఏకో కుటుమ్బికో హుత్వా నిబ్బత్తి. సో పనాయం కుటుమ్బికో అరఞ్ఞే జఙ్ఘావిహారం అనువిచరన్తో పచ్చన్తిమే జనపదే అరఞ్ఞాయతనే అఞ్ఞతరం పచ్చేకబుద్ధం అద్దస. సో చ పచ్చేకబుద్ధో తత్థ చీవరకమ్మం కరోన్తో అనువాతే అప్పహోన్తే సంహరిత్వా ఠపేతుం ఆరద్ధో. కుటుమ్బికో తం దిస్వా భన్తే కిం కరోథాతి పుచ్ఛి. సో పచ్చేకబుద్ధో అప్పిచ్ఛతాయ తేన పుట్ఠో న కిఞ్చి వుత్తో హోతి. సో చీవరదుస్సం నప్పహోతీతి ఞత్వా అత్తనో ఉత్తరసాటకం పచ్చేకబుద్ధస్స పాదమూలే ఠపేత్వా అగమాసి. పచ్చేకబుద్ధో తం గహేత్వా అనువాతకం ఆరోపేన్తో చీవరం కత్వా పారుపి. కుటుమ్బికో జీవితపరియోసానే కాలం కత్వా తావతింసభవనే నిబ్బత్తిత్వా తత్థ యావతాయుకం దిబ్బసమ్పత్తిం అనుభవిత్వా తతో చవిత్వా బారాణసితో తియోజనమత్తకే ఠానే అఞ్ఞతరస్మిం నగరే నిబ్బత్తి, తస్స మాతాపితరో నన్దియోతి [నన్దీతినామం ఇతిసబ్బత్థ] నామం అకంసు, తస్స సత్త భాతరో అహేసుం, సేసా ఛ భాతరో నానాకమ్మన్తేసు బ్యావటా మాతాపితున్నం పోసేన్తి. నన్దియో పన అకమ్మసీలో గేహేయేవ వసతి. తస్మా తస్స సేసా కుజ్ఝన్తి. మాతాపితరోపి నన్దియం ఆమన్తేత్వా ఓవదన్తి. సో తుణ్హీ హోతేవ. అథాపరస్మిం సమయే గామే నక్ఖత్తం సఙ్ఘుట్ఠం, తదా సో మాతరం ఆహ. అమ్మ సాటకం దేహి, నక్ఖత్తం కీళిస్సామీతి, సా ధోత- వత్థం నీహరిత్వా అదాసి, అమ్మ థూలం ఇదన్తి, సా అఞ్ఞం నీహరిత్వా అదాసి, తమ్పి పటిక్ఖిపి. అథ నం మాతా ఆహ. తాత యాదిసే మయం గేహే జాతా, నత్థి ఇతో సుఖుమతరస్స పటిలాభాయ పుఞ్ఞన్తి, లభనట్ఠానం గమిస్సామి అమ్మాతి. పుత్త అహం అజ్జేవ తవ బారాణసీనగరే రజ్జపటిలాభం ఇచ్ఛామీతి ఆహ. సో సాధు అమ్మాతి మాతరం వన్దిత్వా పదక్ఖిణం కత్వా పక్కామి. మాతుయా పనస్స ఏవం అహోసి. కహం సో గమిస్సతి, పుబ్బేవియ ఇధవా ఏత్థవా గేహే నిసీదిత్వా ఆగచ్ఛతీతి, సో పన పుఞ్ఞనియామేన చోదియమానో గామతో నిక్ఖమిత్వా బారాణసిం గన్త్వా సేనగుత్తస్స గేహే పటివసతి, అథేకదివసం సో తస్స కమ్మకారేహి సద్ధిం సల్లపన్తో నిసీదిత్వా పచలాయన్తో సుపినం అద్దస. ముఖేన అన్తం నిక్ఖమిత్వా సకలజమ్బుదీపే పత్థరిత్వా అన్తోకుచ్ఛిమేవ పావిసి. పబుద్ధో సో భీతో మహాసద్దమకాసి. అథ నం మహాసేనగుత్తో పుచ్ఛి. నన్దియో సుపినం అద్దసన్తి ఆహ. అథ తేన కీదిసన్తి పుట్ఠో కథేసి, తతో సేనగుత్తో తం అత్తనో కులూపగం పరిబ్బాజికం పుచ్ఛి కో తస్స విపాకోతి. పరిబ్బాజికా యది భో ఇత్థీ పస్సతి. సత్తదివసబ్భన్తరేయేవ అభిసేకం లభతి, యది పురిసో పస్సతి, తథేవ రాజా హోతీతి కథేసి. సేనగుత్తో తస్సా తం కథం సుత్వా ఇమం మమ ఞాతిం కరోమీతి అత్తనో సత్త ధీతరే పక్కోసిత్వా పటిపాటియా పుచ్ఛి. నన్దియస్స సన్తికే వసథాతి, సేసా సబ్బా న ఇచ్ఛింసు, న మయం జానామ ఏతం అధునాగతం కులవన్తం వా దుక్కులవన్తంవాతి. అథ కణిట్ఠికం పుచ్ఛి. సా యస్స మం మాతాపితరో దస్సన్తి. తేసం వచనం న భిన్దిస్సామీతి సమ్పటిచ్ఛి, అథ సేనగుత్తో నన్దియం పక్కోసిత్వా అత్తనో ధీతరం దత్వా తస్స మహాసమ్పత్తి మదాసి. తతో సత్తమే దివసే నన్దియో తత్థ తత్థ ఆహిణ్డన్తో రఞ్ఞో మఙ్గలుయ్యానం పస్సిస్సామీతి గన్త్వా ధఙ్గలసిలాపట్టేససీసం పారుపిత్వా నిపజ్జి, సో చ బారాణసీరఞ్ఞో కాలఙ్కతస్స సత్తమో దివసో హోతి. అమచ్చాచ పురోహితోచ రఞ్ఞో సరీరకిచ్చం కారేత్వా రాజఙ్గణే నిసీదిత్వా మన్తయింసు. రఞ్ఞో ఏకావ ధీతా అత్థి, పుత్తో పనస్స నత్థి. అరాజికం రజ్జం న తిట్ఠతి. ఫుస్సరథం విస్సజ్జేస్సామాతి. తే కుముదపత్తవణ్ణే చత్తారో సిన్ధవే యోజేత్వా సేతచ్ఛత్తపముఖంపఞ్చవిధరాజకకుధభణ్డం రథస్మింయేవ ఠపేత్వా రథం విస్సజ్జేత్వా పచ్ఛతో తురియాని పగ్గణ్హాపేసుం. రథో పాచీద్వారేన నిక్ఖమిత్వా ఉయ్యానాభిముఖో అహోసి. పరిచయేన ఉయ్యానాభిముఖో గచ్ఛతి. నివత్తేమాతి కేచి ఆహంసు. పురోహితో మా నివారయిత్థాతి ఆహ. రథో కుమారకం పదక్ఖిణం కత్వా ఆరోహణసజ్జో హుత్వా అట్ఠాసి. పురోహితో పారుపణకణ్ణం అపనేత్వా పాదతలాని ఓలోకేన్తో తిట్ఠతు అయం దీపో. ద్విసహస్సదీప పరివారేసు చతూసు మహాదీపేసు ఏకరజ్జం కాతుం సమత్థోతివత్వా తస్స ధితిం ఉపధారేతుం తిక్ఖత్తుం తురియాని పగ్గణ్హాపేసి. అథ కుమారో ముఖం వివరిత్వా ఓలోకేత్వా కేన కారణేన ఆగతత్థాతి ఆహ, దేవ తుమ్హాకం రజ్జం పాపుణాతీతి, రాజా కహన్తి, దేవత్తం గతో సామీతి, కతి దివసా అతిక్కన్తాతి, అజ్జ సత్తమో దివసోతి. పుత్తో వా ధీతా వా నత్థీతి, ధీతా అత్థి దేవ. పుత్తో న విజ్జతీతి, తేనహి కరిస్సామి రజ్జన్తి, తే తావదేవ అభిసేకమణ్డపం కారేత్వా రాజధీతరం సబ్బాలఙ్కారేహి అలఙ్కారిత్వా ఉయ్యానం నేత్వా కుమారస్స అభిసేకం అకంసు, అథస్స కతాభిసేకస్స సతసహస్సగ్ఘనకం వత్థం ఆనేసుం, సో కిమిదం తాతాతి ఆహ, నివాసనవత్థం దేవాతి, నను తాతా థూలంతి, మనుస్సానం పరిభోగవత్థేసు ఇతో సుఖుమతరం నత్థి దేవాతి, తుమ్హాకం రాజా ఏవరూపం నివాసేసీతి, ఆమ దేవాతి. న మఞ్ఞే పుఞ్ఞవా తుమ్హాకం రాజాతి వత్వా హన్ద సువణ్ణభిఙ్కారం ఆహరథ, లభిస్సామ వత్థన్తి, తే సువణ్ణభిఙ్కారం ఆహరింసు, సో ఉట్ఠాయ హత్థే ధోవిత్వా ముఖం విక్ఖాలేత్వా హత్థేన ఉదకం ఆదాయ పురత్థిమదిసాయ అబ్భుక్కిరి, తావదేవ ఘనపథవిం భిన్దిత్వా సోళసకప్పరుక్ఖా ఉట్ఠహింసు, పున ఉదకం హత్థేన గహేత్వా దక్ఖిణం పచ్ఛిమం ఉత్తరన్తి ఏవం చతస్సోపి దిసా అబ్భుక్కిరి, సబ్బదిసాసు సోళస సోళస హుత్వా చతుసట్ఠికప్పరుక్ఖా ఉట్ఠహింసు, సో ఏకం దిబ్బదుస్సం నివాసేత్వా ఏకం పారుపిత్వా నన్దియరఞ్ఞో విజితే సుత్తకన్తికా ఇత్థియో మా సుత్తం కన్తన్తూతి భేరిం చరాపేథాతి వత్వా ఛత్తం ఉస్సాపేత్వా అలఙ్కతపటియత్తో హత్థిక్ఖన్ధవరగతో నగరం పవిసిత్వా పాసాదమభిరుయ్హ మహాసమ్పత్తిం అనుభవి. అహో తదా పచ్చేకబుద్ధస్స దిన్నానువాతకస్స విపాకో. తేనాహు పోరాణా.
౧౨. యథా సాసపమత్తమ్హా, బీజా నిగ్రోధపాదపో;
జాయతే సతసాఖడ్ఢో, మహానీలమ్బుదోపమో.
౧౩. తథేవ పుఞ్ఞకమ్మమ్హా, అణుమ్హా విపులం ఫలం;
హోతీతి అప్పపుఞ్ఞన్తి, నావమఞ్ఞేయ్య పణ్డితోతి.
ఏవం గచ్ఛన్తే కాలే ఏకదివసం దేవీ రఞ్ఞో సమ్పత్తిం దిస్వా అహో తపస్సీతి కారుఞ్ఞాకారం దస్సేసి. కిమిదం దేవీతి చ పుట్ఠా అతిమహతీ తే దేవ సమ్పత్తి. అతీతమద్ధానం కల్యాణం కతత్తా. ఇదాని అనాగతస్సత్థాయ కుసలం కరోథాతి ఆహ. కస్స దస్సామ. సీలవన్తా నత్థీతి. అసుఞ్ఞో దేవ జమ్బుదీపో అరహన్తేహి, తుమ్హే దానం సజ్జేథ, అహం అరహన్తే లచ్ఛామీతి ఆహ. పునదివసే రాజా మహారహం దానం సజ్జాపేసి. దేవీ సచే ఇమిస్సా దిసాయ అరహన్తో అత్థి, ఇధా గన్త్వా అమ్హాకం భిక్ఖం గణ్హన్తూతి ఉత్తరహిమవన్తాభిముఖీ పుప్ఫాని ఉద్ధం ఖిపిత్వా ఉరేన నిపజ్జి. అథ తాని పుప్ఫాని ఆకాసతో గన్త్వా హిమవన్తపదేసే వసన్తానం పదుమవతియా పుత్తానం పఞ్చసతానంపచ్చేకబుద్ధానం జేట్ఠకమహాపదుమపచ్చేకబుద్ధస్స పాదమూలే పతింసు. తథాహి.
౧౪. అహో పస్సథ భో దాని, విమ్హయం పుఞ్ఞకమ్మునో;
అచేతనాపి పుప్ఫాని, దూతకిచ్చేసు బ్యావటా.
౧౫. కత్తుకామేన లోకస్మిం, సకలం అత్తనో వసం;
సబ్బత్థామేన కత్తబ్బం, పుఞ్ఞం పఞ్ఞవతా సదాతి.
తతో మహాపదుమపచ్చేకబుద్ధో తం ఞత్వా సేసభాతరే ఆమన్తేసి. మారిసా నన్దియరాజా తుమ్హే నిమన్తేసి. అధివాసేథ తస్స నిమన్తనన్తి. తే అధివాసేత్వా తావదేవ ఆకాసేనా గన్త్వా ఉత్తరద్వారే ఓతరింసు. మనుస్సా పఞ్చసతా దేవ పచ్చేకబుద్ధా ఆగతాతి రఞ్ఞో ఆరోచేసుం, రాజా సద్ధిం దేవియా గన్త్వా వన్దిత్వా పత్తే గహేత్వా పచ్చేకబుద్ధే పాసాదం ఆరోపేత్వా తత్థ తేసం దానం దత్వా భత్తకిచ్చావసానే రాజా సఙ్ఘత్థేరస్స దేవీ సఙ్ఘనవకస్స చ పాదమూలే నిపజ్జిత్వా అయ్యా పచ్చయేహి న కిలమిస్సన్తు, మయం పుఞ్ఞేన న హాయిస్సామ, అమ్హాకం ఇధ వాసాయ పటిఞ్ఞం దేథాతి పటిఞ్ఞం కారేత్వా ఉయ్యానే నివాసట్ఠానాదయో కారేత్వా యావజీవం పచ్చకబుద్ధే ఉపట్ఠహిత్వా తేసు పరినిబ్బుతేసు సాధుకీళనం కారేత్వా చన్దనా గరుఆదీహి సరీరకిచ్చం కారేత్వా ధాతుయో గహేత్వా చేతియం పతిట్ఠాపేత్వా ఏవరూపానమ్పి మహానుభావానం మహేసీనం మరణం భవిస్సతి, కిమఙ్గం పన మాదిసానన్తి సంవేగజాతో జేట్ఠపుత్తం రజ్జే పతిట్ఠాపేత్వా సయం పబ్బజం పబ్బజి, దేవీపి రఞ్ఞే పబ్బజితే అహం కింకరిస్సామీతి పబ్బజిత్వా ద్వేపి ఉయ్యానే వసన్తా ఝానాభిఞ్ఞం నిబ్బత్తేత్వా ఝానసుఖేన వీతినామేన్తా ఆయుపరియోసానే బ్రహ్మలోకే నిబ్బత్తింసు. తే అమ్హాకం భగవతో కాలే బ్రాహ్మణకులే నిబ్బత్తిత్వా బుద్ధసాసనే పబ్బజింసు, తదా నన్దియరాజా ధుతఙ్గధరానం అగ్గో మహాకస్సపత్థేరోనామ హుత్వా చన్దో వియ సురియో వియచ లోకే పాకటో హుత్వా భగవతి పరి- నిబ్బుతే బుద్ధసాసనం అతివియ సోభేతి. భరియాపిస్స భద్దకాపిళానీ నామ అహోసీతి.
౧౬. దత్వా పురేకో విపినే చరన్తో,
పచ్చేకబుద్ధస్సనువాతమత్తం;
కత్వా సరట్ఠం కురుదీపసోభం,
మహానుభావో వసుధా ధిపోసి.
౧౭. తుమ్హేచ భోన్తో ఖలు సీలవన్తే,
దదాథ దానాని అనప్పకాని;
తం వో పతిట్ఠాచ భవన్తరస్మిం,
చిన్తామణిం కప్పతరుంవ సారన్తి.
నన్దియరాజస్స వత్థుం పథమం.
౧౨. అఞ్ఞతరమనుస్సస్స వత్థుమ్హి అయమానుపుబ్బీకథా
అమ్హాకం భగవతి పరినిబ్బుతే పాటలిపుత్తసమీపే అఞ్ఞతరస్మిం గామే అఞ్ఞతరో దుగ్గతమనుస్సో వసతి, సో పనేకదివసం అఞ్ఞతరం గామం గచ్ఛన్తో ద్వే సాటకే నివాసేత్వా మహన్తం అటవింపాపుణి, తదేవం గచ్ఛన్తం దిస్వా ఏతస్స వత్థం గణ్హిస్సామీతి ఏకో చోరో అనుబన్ధి, సో దూరతోవ ఆగచ్ఛన్తం చోరం దిస్వా చిన్తేసి, అహమేతస్మా పలాయితుం వా తేన సద్ధింయుజ్ఝితుం వా న సక్కోమి, అయమాగన్త్వా అవస్సం అనిచ్ఛన్తస్సాపి మే వత్థం గణ్హిస్సతి. మయాపిస్స నిరత్థకేన హరితుం న సక్కా, దానవసేనస్స దస్సామీతి సన్నిట్ఠాన మకాసి, అథ చోరో ఆగన్త్వా వత్థకం పరామసి, అథ సో పురిసో చిత్తం పసాదేత్వా ఇమం మమ వత్థదానం భవభోగసుఖత్థాయ పచ్చయో హోతూతి వత్థం దత్వా దుచ్ఛాదితత్తా మహామగ్గం పహాయ అఞ్ఞేన జఙ్ఘామగ్గేన గచ్ఛన్తో ఆసివిసేన దట్ఠో కాలం కత్వా హిమవన్తప్పదేసే ద్వాదసయోజనికే కనకవిమానే నేకచ్ఛరాసహస్సపరివుతో నిబ్బత్తి. విమానం పనస్స పరివారేత్వా తియోజనికే ఠానే కప్పరుక్ఖా నిబ్బత్తింసు, సో మహన్తం దిబ్బసమ్పత్తిం దిస్వా సోమనస్సం పవేదేన్తో ఆహ.
౧. పరిణామితమత్తేన, దానస్స సకసన్తకం;
దదాతి విపులం భోగం, దిబ్బమిస్సరియం వరం.
౨. ద్వాదసయోజనుబ్బేధం, దుద్దిక్ఖం చక్ఖుమూసనం;
కూటా గారవరుపేతం, సబ్బసోవణ్ణయం సుభం.
౩. మమ పుఞ్ఞేన నిబ్బత్తం, నేకరాగద్ధజాకులం,
తథేవ పరిసుద్ధేహి, వితానేహి చ లఙ్కతం.
౪. పాసాదపరియన్తమ్హి, దిబ్బవత్థాని లమ్బరే;
వాతేరితా తే సోభన్తి, అవ్హేన్తావ సుధాసినో.
౫. పాసాదస్స సమన్తా మే, భూమిభాగే తియోజనే;
ఇచ్ఛితిచ్ఛితదాతారో, జాతాసుం సురపాదపా.
౬. తత్థ నచ్చేహి గీతేహి, వాదేహి తురియేహి చ;
నే కచ్ఛరాసహస్సేహి, మోదామి భవనే మమ.
౭. న సమ్మా దిన్నవత్థస్స, అక్ఖేత్తే ఫలమీ దిసం;
ఖేత్తే సమ్మా దదన్తస్స, కో ఫలం వణ్ణయిస్సతీతి.
౮. ఏవం విధమ్పి కుసలం మనుజో కరిత్వా,
పప్పోతి దిబ్బవిభవం మునివణ్ణనీయం;
మన్త్వాన భో దదథ దానవరం సుసీలే,
సద్ధాయ సుద్ధమనసాస్స విసేసభాగీతి.
అఞ్ఞతరమనుస్సస్స వత్థుం దుతియం.
౧౩. విసమలోమకుమారస్స వత్థుమ్హి అయమానుపుబ్బీకథా
అతీతే కిర ఇమస్మిం జమ్బుదీపే కస్సపో నామ సమ్మాసమ్బుద్ధో పారమియో పూరేత్వా సబ్బఞ్ఞుతం పత్తో లోకస్స దుక్ఖాపనుదో సుఖావహో పటివసతి లోకం నిబ్బాణమహానగరవరే పరిపూరేన్తో. తస్మిం సమయే అఞ్ఞతరో పురిసో సత్థు ధమ్మదేసనం సుత్వా పసన్నో భిక్ఖుసఙ్ఘస్స దానం దేన్తో సీలం రక్ఖన్తో ఉపోసథకమ్మం కరోన్తో నానావిధాని పుఞ్ఞకమ్మాని కత్వా సుత్తప్పబుద్ధోవియ గన్త్వా దేవలోకే నిబ్బత్తి సబ్బరతనమయే దిబ్బవిధానే దేవచ్ఛరాసహస్సపరివుతో. తత్థ యావతాయుకం ఠత్వా తతో చుతో అమ్హాకం భగవతి పరినిబ్బుతే జమ్బుదీపే పాటలిపుత్తనగరే ఆణాచక్కవత్తిధమ్మాసోకమహానరిన్దస్స అగ్గమహేసియా కుచ్ఛిమ్హి నిబ్బత్తి. తస్స నామం కరోన్తో సీసే లోమం విసమం హుత్వా జాతత్థా విసమలోమకుమారోతి సఞ్జానింసు. సో కమేన విఞ్ఞుతం పత్తో బలసమ్పన్నో అహోసి. మహాథామో అభిరూపోచ అహోసి. దస్సనీయో పాసాదికో యసపరివారసమ్పన్నో పటివసతి. తతో అపరేన సమయేన ధమ్మాసోకమహానరిన్దో చతురాసీతిసహస్సరాజపరివుతో అనన్తబలవాహనో కీ ళా ప రో హిమవన్తం గన్త్వా యథాభిరన్తం కీళిత్వా ఆగచ్ఛన్తో చన్దభాగం నామ గఙ్గం సమ్పాపుణి. సా పన యోజనవిత్థతా తిగావుతగమ్భీరా అహోసి. తదా సా అధునాగతేహి ఓఘేహి మహాఫేణసమాకులా బహూమియో ఉభోకూలే ఉత్తరన్తీ మహావేగా [మహావేగాగచ్ఛన్తీ ఇతిసబ్బత్థ] గచ్ఛన్తి. తదా రాజా గఙ్గం దిస్వా కో నామేత్థ పురిసో ఏవంవిధం మహాగఙ్గం తరితుం సమత్థో భవిస్సతీతి ఆహ. తం సుత్వా విసమలోమ కుమారో ఆగన్త్వా వన్దిత్వా అహం దేవ గఙ్గం తరిత్వా గన్తుఞ్చ ఆగన్తుఞ్చ సక్కోమీతి ఆహ. రాజా సాధూతి సమ్పటిచ్ఛి. అథ కుమారో గాళ్హం నివాసేత్వా మకరదన్తియా కేసే బన్ధిత్వా గఙ్గాకూలే ఠితో అట్ఠారసహత్థం అబ్భుగ్గన్త్వా ఉసభమత్తట్ఠానే పతిత్వా తరితు మారభి. తతో చణ్డసోతం ఛిన్దిత్వా తరన్తో గమనా గమనకాలే గణ్హనత్థాయ ఆగతే చణ్డసుంసుమారే పాణినా పహరిత్వా చుణ్ణవిచుణ్ణం కరోన్తో వీససతం మారేత్వా ఉత్తారేత్వా తలముగ్గమ్మ రాజానం వన్దిత్వా అట్ఠాసి. రాజా తం కారణం దిస్వా భయప్పత్తో ఏసో ఖో మం మారేత్వా రజ్జమ్పి గహితుం సమత్థో. ఏతం మారేతుం వట్టతీతి చిన్తేత్వా నగరం సమ్పత్తో కుమారం పక్కోసాపేత్వా అమచ్చే ఆహ. ఇమం భణే బన్ధనాగారే కరోథాతి. తే తథా కరింసు, అథస్స బన్ధనాగారే వసన్తస్స చత్తారో మాసా అతిక్కన్తా. తతో రాజా చతుమాసచ్చయేన దీఘతో సట్ఠిహత్థప్పమాణే సట్ఠివేళుకలాపే ఆహరాపేత్వా గణ్ఠియో సోధాపేత్వా అన్తో అయోసారం పూరేత్వా రాజఙ్గణే ఠపాపేత్వా విసమలోమకుమారం బన్ధనాగారతో ఆహారాపేత్వా [ఆణాపేత్వా ఇతిసబ్బత్థ] అమచ్చే ఏవమాహ. భణే స్వాయం కుమారో ఇమినా ఖగ్గేన ఇమే వేళుకలాపే చతురఙ్గులం కత్వా ఛిన్దతు. నో చే ఛిన్దితుం సక్కోతి. తం మారేథాతి ఆహ, తం సుత్వా కుమారో అహం బన్ధనాగారే చి ర వు త్థో జిఘచ్ఛాపీళితో ఆహారేన కిలమిం, యన్నూనాహం ఆహారం భుఞ్చిత్వా ఛిన్దేయ్యన్తి. తే నత్థి దాని తుయ్హం ఆహారన్తి ఆహంసు. తేనహి పోక్ఖరణియా పానీయం పివిస్సామీతి ఆహ. తే సాధూతి పోక్ఖరణిం నేసుం. కుమారో పోక్ఖరణిం ఓతరిత్వా నహాయిత్వా నిముగ్గో యావదత్థం కలలం భుఞ్చిత్వా పానీయం పివిత్వా ఉట్ఠాయ అసిపత్తం గహేత్వా మహాజనానం [మహాజనానంపస్సన్తమేవ ఇతిసబ్బత్థ] పస్సన్తానమేవ అట్ఠాసీతిహత్థట్ఠానం ఆకాసం ఉల్లఙ్ఘిత్వా సబ్బవేళుకలాపే చతురఙ్గులమత్తేన ఖణ్డాఖణ్డం కురుమానో ఓతరిత్వా మూలే థూలఅయసలాకం పత్వా కిణీతి సద్దం సుత్వా అసిపత్తం విస్సజ్జేత్వా రోదమానో అట్ఠాసి. తతో రాజపురిసేహి కిమత్తం రోదసీతి వుత్తే ఏత్తకానం పురిసానమన్తరే మయ్హం ఏకోపి సుహదో నత్తి. సచే భవేయ్య, ఇమేసం వేళుకలాపానమన్తరే అయో సారం అత్థిభావం కథేయ్య, అహం పన జానమానో ఇమే వేళు కలాపే అఙ్గులఙ్గులేసు ఛిన్దేయ్యన్తి ఆహ. తతో రాజా కుమారేన కతకమ్మం ఓలోకేత్వా పసన్నో ఉపరాజట్ఠానం బహుఞ్చ విభవం దాపేసి, ఏవమస్స బలసమ్పత్తిలాభో నామ న జాతిగోత్తకులపదేసాదీనం బలం. న పాణాతిపాతాదిదుచ్చరితానం బలం. కస్సేతం బలన్తి. కస్సపసమ్మాసమ్బుద్ధకాలే భిక్ఖుసఙ్ఘస్స దిన్నదానాదిసుచరితకమ్మవిపాకం. తేన వుత్తం.
౧. కస్సపస్స మునిన్దస్స, కాలే అఞ్ఞతరో నరో;
సమ్బుద్ధముపసంకమ్మ, సుత్వా ధమ్మం సుదేసితం.
౨. పటిలద్ధసద్ధో హుత్వా, సీలవన్తాన భిక్ఖునం;
మధురన్నపానే పచురే, అదాసి సుమనో తదా.
౩. అదాసి చీవరే పత్తే, తథేవ కాయబన్ధనే;
అదా ఖీరసలాకఞ్చ, బహూ కత్తరయట్ఠియో.
౪. అదా సుపస్సయం దానం, మఞ్చపీఠాదికం తథా;
పావార కమ్బలాదీని, అదా సీతనివారణే.
౫. అదా భేసజ్జదానాని, ఆరోగ్యత్థాయ భిక్ఖునం;
ఏవం నానావిధం పుఞ్ఞం, కత్వాన తిదివం గతో.
౬. తత్థ దిబ్బవిమానమ్హి, ఉప్పన్నో సో మహిద్ధికో;
దేవచ్ఛరాపరివుతో, దేవసేనాపురక్ఖతో.
౭. దిబ్బేహి నచ్చగీతేహి, దిబ్బవాదితతన్తిహి;
మోదమానో అనేకేహి, దిబ్బసమ్పత్తియా సహ.
౮. యావతాయుం తహిం ఠత్వా, జమ్బుదీపే మనోరమే;
పురే పాటలిపుత్తమ్హి, ధమ్మాసోకస్స రాజినో.
౯. పుత్తో హుత్వాన నిబ్బత్తి, మహాథామో మహాబలో;
మహాయసో మహాభోగో, ఆసి బుద్ధాదిమామకో.
౧౦. కాతబ్బం కుసలం తస్మా, భవసమ్పత్తి మిచ్ఛతా;
పాలేతబ్బ మథో సీలం, భావేతబ్బఞ్చ భావనన్తి.
తతో కుమారో ఉపరాజట్ఠానం లభిత్వా సమ్పత్తింఅనుభవమానో మోగ్గలిపుత్తతిస్సత్థేరమాదిం కత్వా మహాభిక్ఖుసఙ్ఘస్స చీవరపిణ్డపాతసేనాసనగిలానపచ్చయదానా దివసేన సక్కారం కత్వా సీలం రక్ఖిత్వా ఉపోసథకమ్మం కత్వా ఆయుపరియోసానే యథాకమ్మం గతోతి.
౧౧. ఏవంవిధం సుచరితం సుమనో కరిత్వా,
భాగిస్స నేకవిభవస్స భవాభవేసు;
తుమ్హేపి భో సుచరితం విభవానురూపం,
కత్వాన నిబ్బుతిపదం కరగం కరోథాతి.
విసమలోమకుమారస్స వత్థుం తతియం.
౧౪. కఞ్చనదేవియా వత్థుమ్హి అయమానుపుబ్బీకథా
జమ్బుదీపే కిర దేవపుత్తనగరం నామ దస్సనీయం ఏకం నగరం అహోసి. తస్మిం సమయే మనుస్సా యేభుయ్యేన పత్తమహం నామ పూజం కరోన్తి, భగవతా పరిభుత్తపత్తం గహేత్వా కతానేకపూజావిధానా ఉస్సవం కరోన్తి. తం పత్తమహన్తి వుచ్చతి. తస్మిం సమయే దేవపుత్తనగరే రాజా సబ్బరతనమయం రథం సబ్బాలఙ్కారేహి అలఙ్కారాపేత్వా కుముదపత్తవణ్ణే చత్తారో సిన్ధవే యోజేత్వా సుసిక్ఖితసిప్పాచరియేహి సత్తరతనపరినిట్ఠితే అసీతిహత్థవేళగ్గే సత్థునా పరిభుత్తం సేలమయపత్తం ముత్తాజాలాదీహి అలఙ్కరిత్వా వేళగ్గం ఆరోపేత్వా వేళుం రథే ఠపాపేత్వా నగరం దేవనగరం వియ అలఙ్కరిత్వా ధజపతాకాదయో ఉస్సాపేత్వా తోరణగ్ఘ కపన్తియోచ పుణ్ణఘటదీపమాలాదయోచ పతిట్ఠాపేత్వా అనేకేహి పూజావిధానేహి నగరం పదక్ఖిణం కారేత్వా నగరమజ్ఝే సుసజ్జితరతనమణ్డపే పత్తధాతుం ఠపేత్వా సత్తమే దివసే మహాధమ్మసవణం కారాపేసి. తదా తస్మిం జనపదే బహూ మనుస్సాచ దేవతాచ యక్ఖరక్ఖసనాగసుపణ్ణాదయోచ మనుస్సవేసేన యేభుయ్యేన తం సమాగమం ఓతరన్తి, ఏవమచ్ఛరియం తం పూజావిధానం అహోసి.
తదా ఏకో నాగరాజా ఉత్తమరూపధరం అగతపుబ్బపురిసం ఏకం కుమారికం ధమ్మపరిసన్తరే నిసిన్నం దిస్వా తస్సా పటిబద్ధచిత్తో అనేకాకారేహి తం యా చి త్వా తస్సా అలద్ధమానో కుజ్ఝిత్వా నాసావాతం విస్సజ్జేసి ఇమం మారేస్సామీతి. తం తస్సా సద్ధాబలేన కిఞ్చి ఉపద్దవం కాతుం సమత్థో నాహోసి. అథస్సా నాగో పాదతో పట్ఠాయ యావసకలసరీరం భోగేన వేఠేత్వా సీసే ఫణం కత్వా భాయాపేన్తో అట్ఠాసి. అనఞ్ఞవిహితాయ తాయ ధమ్మసవణబలేన అణుమత్తమ్పి దుక్ఖం నాహోసి. పభాతాయ రత్తియా తం దిస్వా మనుస్సా కిమేతన్తి కారణం పుచ్ఛింసు, సాపి తేసం కథేత్వా ఏవం సచ్చకిరియమకాసి. తథాహి.
౧. బ్రహ్మచారీ అహోసాహం, సఞ్జాతా ఇధ మానుసే;
తేన సచ్చేన మం నాగో, ఖిప్పమేవ పముఞ్చతు.
౨. కామాతురస్స నాగస్స, నోకాసమకరింయతో;
తేన సచ్చేన మం నాగో, ఖిప్పమేవ ముఞ్చతు.
౩. విసవాతేన ఖిత్తస్స, కుపితస్సోరగస్సహం;
అకుద్ధా తేన సచ్చేన, సో మం ఖిప్పం పముఞ్చతు.
౪. సద్ధమ్మం సుణమానాహం, గరుగారవభత్తియా;
అస్సోసిం తేన సచ్చేన, ఖిప్పం నాగో పముఞ్చతు.
౫. అక్ఖరంవా పదంవాపి, అవినాసేత్వావ ఆదితో;
అస్సోసిం తేన సచ్చేన, ఖిప్పం నాగో పముఞ్చతూతి.
సచ్చకిరియావసానే నాగరాజా తస్సా అతీవ పసన్నో భోగం వినివేఠేత్వా ఫణసతం మాపేత్వా తం ఫణగబ్భే నిసీదాపేత్వా బహూహి నాగమానవకేహి సద్ధిం ఉదకపూజం నామ పూజ మకాసి, తం దిస్వా బహూ నగరవాసినో అచ్ఛరియబ్భుతజాతా అట్ఠారసకోటిధనేన పూజ మకంసు. తథాహి.
౬. నత్థి సద్ధాసమో లోకే, సుహదో సబ్బకామదో;
పస్సథస్సా బలం సద్ధా, పూజేన్తేవం నరో రగా.
౭. ఇధ లోకేవ సాలత్థ, భవభోగ మనప్పకం;
తస్మా సద్ధేన కాతబ్బం, రతనత్తయగారవన్తి.
అథేవం సా పటిలద్ధమహావిభవా యావజీవం కోమారియ బ్రహ్మచారిణీ హుత్వా ఆయుపరియోసానే కాలం కత్వా తస్మింయేవ నగరే రఞ్ఞో అగ్గమహేసియా కుచ్ఛిమ్హి పటిసన్ధిం గణ్హిత్వా దసమాసచ్చయేన మాతుకుచ్ఛితో నిక్ఖమి. నిక్ఖన్తదివసే పనస్సా సకలదేవపుత్తనగరే రతనవస్సం వస్సి. తేనస్సా కఞ్జనదేవీతి నామం కరింసు. సమన్తపాసాదికా అహోసి. అభిరూపా దేవచ్ఛరపటిభాగా. ముఖతో ఉప్పలగన్ధో వాయతి. సరీరతో చన్దనగన్ధో వాయతి. సకలసరీరతో బాలసురియో వియ రంసియో నిచ్ఛారేన్తీ చతురతనగబ్భే పదీపకిచ్చం నామ నత్థి. సబ్బో గబ్భో సరీరా లోకేన ఏకో భాసో హోతి, తస్సా రూపసమ్పత్తి సకలజమ్బుదీపే పాకటా అహోసి. తతో సకలజమ్బుదీపవాసీ రాజానో తస్సా అత్థాయ పితురఞ్ఞో పణ్ణాకారాని పహిణింసు. సా పన పఞ్చకామే అననులిత్తా పితరం అనుజానాపేత్వా భిక్ఖునూ పస్సయం గన్త్వా పబ్బజిత్వా విపస్సనం వడ్ఢేత్వా సహ పటిసమ్భిదాహి అరహత్తం పాపుణీతి.
౮. సుత్వాన సాదరవసేన కుమారికేవం;
ధమ్మఞ్హి సీలమమలం పరిపాలయన్తీ;
లద్ధాన నేకవిభవం విభవం పయాతా,
మా భో పమజ్జథ సదా కుసలప్పయోగేతి.
కఞ్చనదేవియా వత్థుం చతుత్థం.
౧౫. బ్యగ్ఘస్స వత్థుమ్హి అయమానుపుబ్బీకథా
జమ్బుదీపే చూలరట్ఠా సన్నే బారాణసీనగరే ఏకం పంసుపబ్బతం వినివిజ్ఝిత్వా మహామగ్గో హోతి, తత్థ వేమజ్ఝే ఏకో బ్యగ్ఘో అత్తనో అన్ధపితరం పబ్బతగుహాయం కత్వా పోసేన్తో వసతి. తస్సేవ పబ్బతస్స వనద్వారే తుణ్డిలో నామ ఏకో సువపోతకో రుక్ఖస్మిం వసతి. తే ఉభోపి అఞ్ఞమఞ్ఞం పియసహాయా అహేసుం, తస్మిం సమయే పచ్చన్తగామవాసీ ఏకో మనుస్సో అత్తనో మాతుగామేన సద్ధిం కలహం కత్వా బారాణసిం గచ్ఛన్తో తం వనద్వారం సమ్పాపుణి. అథ సువపోతకో పరిహీనత్తభావం దుక్ఖితం తం దిస్వా కమ్పమానహదయో తం పక్కోసిత్వా భో కుహిం గచ్ఛసీతి ఆహ, తేన పరఖణ్డం గచ్ఛామీతి వుత్తే తుణ్డిలో భో ఇమస్మిం వనఖణ్డమజ్ఝే ఏకో బ్యగ్ఘో వసతి. కక్ఖలో ఫరుసో సమ్పత్తసమ్పత్తే మారేత్వా ఖాదతి. మా త్వం తేన గచ్ఛాతి ఆహ. స్వాయం దుబ్భగో మనుస్సో హితకామస్స తస్స వచనం అనాదియిత్వా గచ్ఛామేవాతి ఆహ. తుణ్డిలో తేనహి సమ్మ యది అనివత్తమానో గచ్ఛసి. ఏసో బ్యగ్ఘో మమ సహాయో. మే వచనం తవ సన్తికా సుత్వా న గణ్హాతీతి. తస్స తం అనాదియన్తో సో సువరాజే పదుట్ఠచిత్తో ముగ్గరేన పహరిత్వా మారేత్వా అరణిం అగ్గిం కత్వా మంసం ఖాది. అసప్పురిససంసగ్గో నామే స ఇధ లోకపరలోకేసు దుక్ఖావహోయేవ. తథాహి.
౧. మయా కతం మయ్హమిదం, ఇతి వేస్సానరం నరో;
సమాలిఙ్గతి సప్పేమో, దహతేవస్స విగ్గహం.
౨. మధుఖీరాదిదానేన, పేమసా పరిపాలితో;
సోరగో కుపితోవస్స, డసతేవస్స విగ్గహం.
౩. ఏవం నిహీనజచ్చేన, పాపేన అకతఞ్ఞునా;
నరా ధమేన దీనేన, కతోపి ఖణసఙ్గమో.
౪. అసాధుకో అయంతేవం, జానమానేన జన్తునా;
ముహుత్తమ్పి న కాతబ్బో, సఙ్గమో సో అనత్థదోతి.
తతో సో అసప్పురిసో మంసం ఖాదిత్వా గచ్ఛన్తో వనఖణ్డమజ్ఝం సమ్పాపుణి. అథ బ్యగ్ఘో తం దిస్వా మహానాదం కరోన్తో గహణత్థాయ ఉట్ఠాసి. సో బ్యగ్ఘం దిస్వా భయప్పత్తో తుణ్డిలస్స వచనం సరిత్వా అహం భో తవ సహాయతుణ్డిలస్స సన్తికా ఆగతోమ్హీతి ఆహ, తం సుత్వా బ్యగ్ఘో అత్తమనో ఏహి సమ్మాతి తం పక్కోసిత్వా అత్తనో వసనట్ఠానం నేత్వా ఖాదితబ్బాహారేన తం సన్తప్పేత్వా పితుసన్తికే నిసీదాపేత్వా పున వనఖణ్డ మగమాసి. అథస్స పితా పుత్తస్స గతకాలే తేన సద్ధిం సల్లపన్తో తస్స వచనానుసారేన తుణ్డిలం మారేత్వా ఖాదితభావం అఞ్ఞాసి. తతో సో పుత్తస్స ఆగతకాలే తవ సహాయో తేన మారితోతి ఆహ. తం సుత్వా బ్యగ్ఘో అనత్తమనో వేగేన తస్స వసనట్ఠానం గన్త్వా సమ్మ తుణ్డిలాతి సద్దం కత్వా అపస్సన్తో లుఞ్చితపత్తంచస్స దిస్వా నిస్సంసయం తేన మారితో మే సహాయోతి సోచన్తో పరిదేవన్తో ఆగఞ్ఛి. అథ సో అసప్పురిసో తస్మిం తత్థ గతే తస్స పితరం పాసాణేన పహరిత్వా మారేత్వా బ్యగ్ఘంచ దాని మారేస్సామీతి బ్యగ్ఘాగమనమగ్గం ఓలోకేన్తో నిలీనో అట్ఠాసి. తస్మిం ఖణే బ్యగ్ఘోపి ఆగఞ్ఛి. సో తస్సా గతకాలే తస్స తేజేన భీతో గన్త్వా జీవితం మే సామి దేహీతి పాదమూలే ఉరేన నిపజ్జి, బ్యగ్ఘో పన తేన కతకమ్మం దిస్వా తస్మిం చిత్తం నిబ్బాపేత్వా మమ సహాయస్స సాసనమాదాయాగతస్స దుబ్భితుం న యుత్తన్తి చిన్తేన్తో తం సమస్సాసేత్వా గచ్ఛ సమ్మాతి సుఖం పేసేసి. ఏవఞ్హి సప్పురిససమాగమో నామ ఇధ లోకపరలోకేసు సుఖావహోయేవ, వుత్తంహి.
౫. సబ్భిరేవ సమాసేథ, సబ్భి కుబ్బేథ సన్థవం;
సబ్బత్థ సన్థవో తేన, సేయ్యో హోతి న పాపియో.
౬. సుఖావహో దుక్ఖనుదో, సదా సబ్భి సమాగమో;
తస్మా సప్పురిసేహేవ, సఙ్గమో హోతు జన్తునం.
తతో సో బ్యగ్ఘో తేన మేత్తచిత్తానుభావేన కాలం కత్వా సగ్గే నిబ్బత్తోతి.
౭. ఏవంవిధోపి ఫరుసో పరమంసభోజీ;
బ్యగ్ఘో దయాయుపగతో సుగతిం సుమేధో;
తస్మా కరోథ కరుణం సతతం జనానం,
తం వో దదాతి విభవఞ్చ భవేసు భోగన్తి.
బ్యగ్ఘస్స వత్థుం పఞ్చమం.
౧౬. ఫలకఖణ్డదిన్నస్స వత్థుమ్హి అయమానుపుబ్బీకథా
సావత్థియం కిరేకో మనుస్సో ఉత్తరాపథం గచ్ఛామీతి అద్ధానమగ్గపటిపన్నో గిమ్హానమాసే మజ్ఝణ్హే బహలాతపేన కిలన్తో హుత్వా రుక్ఖచ్ఛాయం పవిసిత్వా తమ్బులం ఖాదన్తో ఫలకే నిసీది. అథ ఉత్తరాపథేనాగచ్ఛాన్తో ఏకో తథేవ ఆతపేన కిలన్తో ఆగన్త్వా పురిమస్స సన్తికే నిసీదిత్వా భో పానీయం అత్థీతి పుచ్ఛి. ఇతరో పానీయం నత్థీతి ఆహ. అథస్స సో మయ్హమ్పి భో తమ్బులం దేహి పిపాసితోమ్హితి వత్వాపి న లభి. చతుకహాపణేన ఏకం తమ్బులపణ్ణం కిణిత్వా లద్ధో తత్థేవ నిసీదిత్వా ఖాదిత్వా పిపాసం వినోదేత్వా తేన ఉపకారేన తస్స సినేహం కత్వా అత్తనో గమనట్ఠాన మగమాసి, అథా పరభాగే సో పట్టనం గన్త్వా నావాయ వణిజ్జత్థాయ గచ్ఛన్తో సముద్దమజ్ఝం పాపుణి. తతో సత్తమే దివసే నావా భిజ్జి. మనుస్సా మచ్ఛకచ్ఛపానం భక్ఖా జాతా. సో ఏవ పురిసో అరోగో హుత్వా ఏకం ఫలకఖణ్డం ఉరే కత్వా సముద్దం తరతి. అథే తరోపి తథేవ నావాయ భిన్నాయ సేసో హుత్వా సముద్దం తరన్తో పురిమేన సమాగమి. అథ తే సత్తదివసం సముద్దే తరన్తా అఞ్ఞమఞ్ఞం సఞ్జానింసు. తేసు కహాపణే దత్వా తమ్బులం గహితో ఏకం ఫలకఖణ్డం ఉరే కత్వా తరతి. ఇతరస్సేతం నత్థి. అథ సో కహాపణే గహేత్వా దిన్నతమ్బులమత్తస్సో పకారం సరిత్వా అత్తనో ఫలకఖణ్డం తస్స అదాసి. సో తస్మిం సయిత్వా తరన్తో తం పహాయ అగమాసి, అపరో అనాధారకేన తరన్తో ఓస్సట్ఠవిరియో ఉదకే ఓసీదితుమారతి. తస్మిం ఖణే సముద్దే అధివత్థా మణిమేఖలా నామ దేవధీతా ఓసీదన్తం తం దిస్వా సప్పురిసోతి తస్స గుణానుస్సరన్తీ వేగేనా గన్త్వా తం అత్తనో ఆనుభావేన సముద్దతీరం పాపేసి. ఇతరంపి సా ఏతస్సేవ గుణానుభావేన తీరం పాపేసి. అథ ఫలకేనోతిణ్ణపురిసో తం దిస్వా విమ్హితో కథం పురతో అహోసి సమ్మాతి పుచ్ఛి. సో న జానామి. అపిచ ఖో సుఖేనేవ తీరం పత్తోస్మీతి ఆహ. అథ దేవధీతా దిస్సమానకసరీరేనేవ అత్తనా ఆనీతభావం ఆరోచేన్తీ ఆహ.
౧. యో మాతరం పితరంవా, ధమ్మేన ఇధ పోసతి;
రక్ఖన్తి తం సదా దేవా, సముద్దే వా థలేపి వా.
౨. యో చే బుద్ధఞ్చ ధమ్మఞ్చ, సంఘఞ్చ సరణం గతో;
రక్ఖన్తి తం సదా దేవా, సముద్దే వా థలేపి వా.
౩. పఞ్చవిధం అట్ఠవిధం, పాతిమోక్ఖఞ్చ సంవరం;
పాలేతి యో తం పాలేన్తి, దేవా సబ్బత్థ సబ్బదా.
౪. కాయేన వాచా మనసా, సుచరిత్తం చరతీ ధ యో;
పాలేన్తి తం సదా దేవా, సముద్దే వా థలేపి వా.