౧౯. పానీయదిన్నస్స వత్థుమ్హి అయమానుపుబ్బీకథా

జమ్బుదీపే అఞ్ఞతరస్మిం జనపదే కిరే కో మనుస్సో రట్ఠతో రట్ఠం జనపదతో జనపదం విచరన్తో అనుక్కమేన చన్దభాగానదీతీరం పత్వా నావం అభిరుహిత్వా పరతీరం గచ్ఛతి. అథాపరా గబ్భినిత్థీ తాయ ఏవ నావాయ గచ్ఛతి, అథ నావా గఙ్గామజ్ఝప్పత్తకాలే తస్సా కమ్మజవాతా చలింసు. తతో సా విజాయితుమసక్కోన్తీ కిలన్తా పానీయం మే దేథ, పిపాసితామ్హితి మనుస్సే యాచి. తే తస్సా వచనం అసుణన్తా వియ పానీయం నాదంసు, అథ సో జానపదికో తస్సా కరుణాయన్తో [కరుణాయపానీయం, కరుణాయన్తోపానీయం, కరుణాయతోయం ఇతిచకత్థచి] తోయం గహేత్వా ముఖే ఆసిఞ్చి, తస్మిం ఖణే సా లద్ధస్సాసా సుఖేన దారకం విజాయి, అథ తే తీరం పత్వా కతిపయదివసేన అత్తనో అత్తనో ఠానం పాపుణింసు. అథాపరభాగే సో జానపదికో అఞ్ఞతరకిచ్చం పటిచ్చ తస్సా ఇత్థియా వసననగరం పత్వా తత్థ తత్థ ఆహిణ్డన్తో నివాసనట్ఠానం అలభిత్వా నగరద్వారే సాలం గన్త్వా తత్థ నిపజ్జి. తస్మింయేవ దివసే చోరా నగరం పవిసిత్వా రాజగేహే సన్ధిం ఛిన్దిత్వా ధనసారం గహేత్వా గచ్ఛన్తా రాజపురిసేహి అనుబన్ధా గన్త్వా తాయేవ సాలాయ ఛడ్డేత్వా పలాయింసు. అథ రాజపురిసా ఆగన్త్వా చోరే అపస్సన్తా తం జానపదికం దిస్వా అయం చోరోతి గహేత్వా పచ్ఛాబాహం గాళ్హం బన్ధిత్వా పున దివసే రఞ్ఞో దస్సేసుం. రఞ్ఞా కస్మా భణే చోరకమ్మ మకాసీతి పుచ్ఛితో నాహం దేవ చోరో, ఆగన్తుకోమ్హీతి వుత్తే రాజా చోరే పరియేసిత్వా అలభన్తో అయమేవ చోరో, ఇమం మారేథాతి ఆణాపేసి. రాజపురిసేహి తం గాళ్హం బన్ధిత్వా ఆఘాతనం నీతే సా ఇత్థీ తం తథా నీయమానం దిస్వా సఞ్జానిత్వా కమ్పమానహదయా ముహుత్తేన రఞ్ఞో సన్తికం గన్త్వా వన్దిత్వా దేవ ఏసో న చోరో ఆగన్తుకో ముఞ్చథేతం దేవాతి ఆహ. రాజా తస్సా కథం అసద్దహన్తో యజ్జేతం మోచేతు మిచ్ఛసి. తస్సగ్ఘనకం ధనం దత్వా ముఞ్చాపేహీతి, సా సామి మమ గేహే ధనం నత్థి. అపిచ మమ సత్తపుత్తేహి సద్ధిం మం దాసిం కరోహి, ఏతం ముఞ్చ దేవాతి ఆహ, అథ రాజా త్వం ఏతం అధునాగతోతి వదసి. ఏతం నిస్సాయ పుత్తేహి సద్ధిం అత్తానం దాసత్తం సావేసి. కిమేసో తే ఞాతి వా, ఉదాహు ఉపకారకోతి పుచ్ఛన్తో ఆహ.

౧. కింతే భోతి అయం పోసో, తువం పుచ్ఛామి సంసయం;

భాతా వా తే పితా హోతి, పతి వా దేవరో తవ.

౨. ఞాతి సాలోహితో కిన్ను, ఉదాహు ఇణదాయకో;

అథోపకారకో కిన్ను, కస్మాస్స దేసి జీవితంతి.

తతో సా ఆహ.

౩. ఏసో మే పురిసో దేవ, కతపుబ్బోపకారకో;

అతాణమేకికం [అత్తానమేకికం ఇతికత్థచి] చేసో, దుక్ఖితం మరణే ఠితం.

౪. విజాయితు మసక్కోన్తిం, గబ్భినిం దుక్ఖవేదినిం;

తోయేన మం ఉపట్ఠాసి, తేనాహం సుఖితా తదా.

౫. భఙ్గకల్లోలమాలాయ, ఉత్తరన్తం మహణ్ణవం;

పహాయ పాతుం కూపస్స, యాతి లోకో పిపాసితో.

౬. తథేవ విజ్జమానేసు, జనేసు మనుజాధిప,

ఏకస్సేవ మనస్మింహి, గుణం తిట్ఠతి సాధుకం.

౭. పహత్వాన మతం హత్థిం, మంసత్థీ కేచి జన్తునో;

అనుబన్ధన్తి మంసత్థం, ససం ధావన్త మేకకం.

౮. తథేవ విజ్జమానేసు, జనేసు మనుజాధిప;

గుణవన్త మనుబన్ధన్తి, సప్పురిసం కతవేదికం.

౯. తస్మా సప్పురిసే ధమ్మే, పతిట్ఠాస్మి నరాధిప;

అనుస్సరన్తి ఏతేన, కతపుబ్బూ పకారకం.

౧౦. అహఞ్చ మమ పుత్తా చ, ఏతేనమ్హ సుఖాపితా;

జీవితమ్పి పరిచ్చజ్జ, ముచ్చనీయో అయం మయాతి.

తతో రాజా దోవారికం పక్కోసిత్వా తమ్పి పుచ్ఛిత్వా అధునాగతభావం ఞత్వా తస్సా సప్పురిసధమ్మే సన్తుట్ఠో తేసం ఉభిన్నమ్పి మహన్తం యసం అనుప్పదాసి. తే లద్ధయసా త తో పట్ఠాయ దానాదీని పుఞ్ఞకమ్మాని కత్వా సగ్గపరాయణా అహేసున్తి.

౧౧. ధమ్మే పతిట్ఠితమనా అపి మాతుగామా,

ఏవం లభన్తి విభవఞ్చ పసంసనఞ్చ;

ధమ్మఞ్చ సాధుచరితం మనసీకరోన్తో,

ధమ్మేసు వత్తథ సదా సుచిసజ్జనాతి.

పానీయదిన్నస్స వత్థుం నవమం.