౧౦. రూపదేవియా వత్థుమ్హి అయమానుపుబ్బీకథా

అతీతే కిర విపస్సిస్స భగవతో కాలే తస్మిం నగరే ఏకా గామదారికా విహారే ఆహిణ్డన్తీ ఏకం గిలానభిక్ఖుం దిస్వా కమ్పమానహదయా ఉపసఙ్కమిత్వా వన్దిత్వా భన్తే కోతే ఆబాధో సరీరం పీళేతీతి పుచ్ఛి. తేనాపి భగిని ఖరాబాధో మే పీళేతీతి వుత్తే సా తేనహి భన్తే అహం తం రోగం వూపసమేస్సామీతి నిమన్తేత్వా గేహం గన్త్వా తం పవత్తిం మాతాపితున్నం కథేత్వా తేహి అనుఞ్ఞాతా పున దివసే నానగ్గరసేన భేసజ్జాహారం సమ్పాదేసి, తతో సో భిక్ఖు పునదివసే చీవరం పారుపిత్వా భిక్ఖాయ చరన్తో తస్సా గేహం గన్త్వా అట్ఠాసి. సా థేరం ఆగతం దిస్వా సోమనస్సజాతా పత్తం గహేత్వా ఆసనం పఞ్ఞాపేత్వా అదాసి. తత్థ నిసిన్నం తం ఆహారేన సాధుకం పరివిసిత్వా సక్కార మకాసి. అథస్సా సద్ధాబలేన భుత్తమత్తేయేవ సో ఆబాధో వూపసమి. తతో సో వూపసన్తరోగో దుతియదివసే తస్సా గేహం నా గమాసి. అథ సా విహారం గన్త్వా తం వన్దిత్వా కస్మానాగతత్థాతి పుచ్ఛిత్వా తేన మే భగిని బ్యాధి వూపసమి, తస్మా నాగతోస్మీతి వుత్తే సా సాధు భన్తేతి సోమనస్సజాతా గేహమేవ అగమాసి. సా తేన పుఞ్ఞకమ్మేన కాలం కత్వా దేవలోకే నిబ్బత్తి. తస్సా తత్థ ద్వాదసయోజనికం కనకవిమానం నిబ్బత్తి. సా తత్థ దేవిస్సరియం అనుభవన్తీ ఛబుద్ధన్తరం ఖేపేత్వా అమ్హాకం భగవతో కాలే జమ్బుదీపే దేవపుత్తనగరే ఉదిచ్చబ్రహ్మణకులే జేట్ఠబ్రాహ్మణస్స భరియాయ కుచ్ఛిమ్హి పటిసన్ధిం గణ్హి, సా పరిపాక మన్వాయ మాతుకుచ్ఛితో నిక్ఖమి. తస్సా మాతుకుచ్ఛితో నిక్ఖన్తకాలతో పట్ఠాయ దివసే దివసే అట్ఠట్ఠనాలిమత్తం తణ్డులం నిబ్బత్తతి. తస్సా రూపసమ్పత్తిం దిస్వా పసన్నా మాతాపితరో రూపదేవీతి నామ మకంసు. పచ్ఛా తం పతిరూపేన దారకేన నియోజేసుం. అథస్సా తణ్డుల- నాలిమత్తం గహేత్వా పచితుం ఆరద్ధే ఇచ్ఛితిచ్ఛితమంసాదిబ్యఞ్జనఞ్జ సప్పినవనీతదధిఖీరాదిగోరసఞ్చ జీరమరిచాదికటుకభణ్డఞ్చ కదలిపనసమధుగుళాదిఉపకరణఞ్చ భాజనాని పూరేత్వా నిబ్బత్తతి, తాయ హత్థేన గహితం కిఞ్చి ఖాదనీయం భోజనీయంవా పూతిభావం న గచ్ఛతి, భత్తుక్ఖలిం గహేత్వా సకలనగరవాసినో భోజేన్తియాపి ఏకకటచ్ఛుమత్తం భత్తం గహితట్ఠానం న పఞ్ఞాయతి. ఏవం అపరిక్ఖయపుఞ్ఞా అహోసి, సకలదేవపుత్తనగరే చన్దసురియావ పాకటా అహోసి, అథ సా పఞ్చసతభిక్ఖూ నిమన్తేత్వా నిచ్చం సకనివేసనేయేవ భోజేతి, తదా తేసం అన్తరే పటిసమ్భిదాపత్తో మహాసఙ్ఘరక్ఖితత్థేరోనామ ఇమిస్సా పుఞ్ఞానుభావం దిబ్బచక్ఖునా దిస్వా న జానాతి ఏసా అత్థనా పుబ్బే కతకమ్మం. యన్నూనాహం అస్సా పకాసేయ్యన్తి ఏకదివసం తస్సా నివేసనే భుఞ్జిత్వా అనుమోదనం కరోన్తో జానాసి భగిని తయా పుబ్బే కతకమ్మన్తి పుచ్ఛి, న జానామి భన్తే. సోతుమిచ్ఛామీతి, అథస్సా సో పుబ్బకమ్మం పకాసేన్తో.

౧. ఏకనవుతే ఇతో కప్పే,

విపస్సీనామ నాయకో;

అహోసి లోకే లోకేక,

నాయకో ఛిన్నబన్ధనో.

౨. తదా తస్మిం పురే రమ్మే, ఆసి త్వం గామదారికా;

ఆహిణ్డన్తీ విహారస్మిం, అద్దక్ఖి జినసావకం.

౩. రోగాతురం కిసం పణ్డుం, అస్ససన్తం ముహుం ముహుం;

దిస్వాన కమ్పితా చిత్తా, నిమన్తేత్వాన తం మునిం.

౪. భేసజ్జఞ్చేవ భత్తఞ్చ, అదా త్వం తేన సో యతి;

అబ్యాబాధో అనీఘోచ, అహోసి అనుపద్దవో.

౫. తతో త్వం తేన కమ్మేన, సుకతేన తతో చుతా;

జాతాసి దేవలోకస్మిం, సబ్బకామసమిద్ధినీ.

౬. తత్థ తే పుఞ్ఞతేజేన, పాసాదో రతనామయో;

మణిథూపిసతాకిణ్ణో, కూటాగారేహి లఙ్కతో.

౭. నేకగబ్భసతాకిణ్ణో, సయనాసనమణ్డితో;

అచ్ఛరాసతసంకిణ్ణో, నచ్చగీతాదిసంకులో.

౮. రమ్భామ్బజమ్బుసన్నీర, పూగపున్నాగపాటలీ;

నాగాదితరుసణ్డేహి, మణ్డితుయ్యానపన్తిహి.

౯. పదుముప్పలకళార, కున్దకాననమణ్డితే;

మధుమత్తాలిపాలీహి, సారసీసరసంకులే.

౧౦. దేవపుత్తేహి నేకేహి, తథా దేవచ్ఛరాహిచ;

నిచ్చుస్సవే మహాభోగే, విమానే మననన్దనే.

౧౧. త్వమేవం దేవలోకమ్హి, విన్దమానా మహాయసం;

అద్ధానం వీతినామేత్వా, నిబ్బుతే గోతమే జినే.

౧౨. జమ్బుదీపే ఇదాని త్వం, నిబ్బత్తా ఉదితే కులే;

పుఞ్ఞపఞ్ఞాగుణావాసా, రూపేనగ్గా పియంవదా.

౧౩. ఏతం తే దేవలోకస్మిం, దేవిస్సరియమబ్భుతం,

ఇమం తే ఇధ లోకస్మిం, సబ్బం మానుసికం సుఖం.

౧౪. విపస్సిమునినో కాలే, త్వం తస్సేకస్స భిక్ఖునో;

అదా దానం గిలానస్స, తస్స తం ఫలమీదిసం.

౧౫. కాతబ్బఞ్హి సదా పుఞ్ఞం, ఇచ్ఛన్తేన సుఖప్పదం;

తస్మా త్వం సబ్బదా భద్దే, ఉస్సుక్కా కుసలే భవాతి.

ఏవం సో తస్స పురిమత్తభావే కతకమ్మం పకాసేత్వా ఇదాని పుఞ్ఞకమ్మే అప్పమాదా భవాతి అనుసాసి. సా థేరస్స ధమ్మదేసనం సుత్వా పరమసోమనస్సా తతో పట్ఠాయ దానాదీసు నిరతా పుఞ్ఞాని కరోన్తీ తేనేవ సోమనస్సేన సోతాపన్నా అరియసావికా అహోసీతి.

౧౬. ఇతి తరుణకుమారీ పుఞ్ఞకమ్మేసు సారం,

అవిదితగుణమత్తా దత్వ భిక్ఖుస్స దానం;

దివిమనుజసుఖం సాలత్థ తుమ్హే భవన్తా,

విదితకుసలపాకా కిం న లబ్భేథ సన్తిం.

రూపదేవియా వత్థుం దసమం.

ధమ్మసోణ్డకవగ్గో పథమో.