౨. పారివాసికక్ఖన్ధక

పుచ్ఛా – పారివాసికస్స ఆవుసో పకతత్తానం భిక్ఖూనం అభివాదనాదీని సాదియన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే పారివాసికే భిక్ఖూ ఆరబ్భ పఞ్ఞత్తం, పారివాసికా భన్తే భిక్ఖూ సాదియింసు పకతత్తానం భిక్ఖూనం అభివాదనాదీని, తస్మిం భన్తే వత్థుస్మిం పఞ్ఞత్తం.

పుచ్ఛా – పారివాసికేన ఆవుసో భిక్ఖునా కతిసు వత్తేసు సమ్మా వత్తితబ్బం.

విస్సజ్జనా – పారివాసికేన భన్తే భిక్ఖునా చతునవుతియా వత్తేసు సమ్మా వత్తితబ్బం.

పుచ్ఛా – పారివాసికం పుచ్ఛిస్సం, సనిదానం సనిద్దేసం. సముక్కట్ఠపదానం ఆవుసో కతి ఆపత్తియో.

విస్సజ్జనా – పారివాసికం విస్సజ్జిస్సం, సనిదానం సనిద్దేసం. సముక్కట్ఠపదానం భన్తే ఏకా ఆపత్తి.