౧౦. భిక్ఖునిక్ఖన్ధక

పుచ్ఛా – అట్ఠహి ఆవుసో గరుధమ్మేహి ఉపసమ్పదా భగవతా కత్థ అనుఞ్ఞాతా, కస్స అనుఞ్ఞాతా, కిస్మిఞ్చ వత్థుస్మిం అనుఞ్ఞాతా.

విస్సజ్జనా – వేసాలియం భన్తే మహాపజాపతియా గోతమియా అనుఞ్ఞాతా, మహాపజాపతి భన్తే గోతమీ సూనేహి పాదేహి రజోకిణ్ణేన గత్తేన దుక్ఖీ దుమ్మనా అస్సుముఖీ రుదమానా బహిద్వారకోట్ఠకే అట్ఠాసి, అథ ఖో భన్తే ఆయస్మా ఆనన్దో మహాపజాపతిం గోతమిం తం కారణం పుచ్ఛిత్వా భగవన్తం చతుక్ఖత్తుం యాచి మాతుగామస్స తథాగతప్పవేదితే ధమ్మవినయే ఆగారస్మా అనాగారియం పబ్బజ్జం, తస్మిం భన్తే వత్థుస్మిం అనుఞ్ఞాతా.

పుచ్ఛా – భిక్ఖూహి ఆవుసో భిక్ఖునియో ఉపసమ్పాదేతుం భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – వేసాలియం భన్తే మహాపజాపతిం గోతమిం ఆరబ్భ అనుఞ్ఞాతం, మహాపజాపతి భన్తే గోతమీ భగవన్తం ఏతదవోచ ‘‘కథాహం భన్తే ఇమాసు సాకియానీసు పటిపజ్జామీ’’తి, తస్మిం భన్తే వత్థుస్మిం అనుఞ్ఞాతం.

పుచ్ఛా – ఏకతో ఉపసమ్పన్నాయ ఆవుసో భిక్ఖునిసఙ్ఘే విసుద్ధాయ భిక్ఖుసఙ్ఘే ఉపసమ్పాదేతుం భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – సావత్థియం భన్తే సమ్బహులే భిక్ఖూ ఆరబ్భ అనుఞ్ఞాతం, సమ్బహులా భన్తే భిక్ఖూ భిక్ఖునీనం అన్తరాయికే ధమ్మే పుచ్ఛింసు, ఉపసమ్పదాపేక్ఖాయో విత్థాయింసు, మఙ్కూ అహేసుం, న సక్ఖింసు విస్సజ్జేతుం, తస్మిం భన్తే వత్థుస్మిం అనుఞ్ఞాతం.

పుచ్ఛా – భిక్ఖునిక్ఖన్ధకం పుచ్ఛిస్సం, సనిదానం సనిద్దేసం. సముక్కట్ఠపదానం ఆవుసో కతి ఆపత్తియో.

విస్సజ్జనా – భిక్ఖునిక్ఖన్ధకం విస్సజ్జిస్సం, సనిదానం సనిద్దేసం. సముక్కట్ఠపదానం భన్తే ద్వే ఆపత్తియో.