౮. చీవరక్ఖన్ధక

జీవకవత్థు

పుచ్ఛా – గహపతిచీవరం ఆవుసో సాదియితుం భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – రాజగహే భన్తే జీవకం కోమారభచ్చం ఆరబ్భ అనుఞ్ఞాతం, జీవకో భన్తే కోమారభచ్చో భిక్ఖూనం గహపతిచీవరం అనుజానితుం భగవన్తం యాచి, తస్మిం భన్తే వత్థుస్మిం అనుఞ్ఞాతం.

పుచ్ఛా – ఛ ఆవుసో రజనాని భగవతా కత్థ అనుఞ్ఞాతాని, కిస్మిం వత్థుస్మిం అనుఞ్ఞాతాని.

విస్సజ్జనా – రాజగహే భన్తే సమ్బహులే భిక్ఖూ ఆరబ్భ అనుఞ్ఞాతాని, సమ్బహులా భన్తే భిక్ఖూ ఛకణేనపి పణ్డుమత్తికాయపి చీవరం రజింసు, చీవరం దుబ్బణ్ణం హోతి, తస్మిం భన్తే వత్థుస్మిం అనుఞ్ఞాతాని.

పుచ్ఛా – అచ్ఛిన్నకాని ఆవుసో చీవరాని ధారేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – రాజగహే భన్తే సమ్బహులే భిక్ఖూ ఆరబ్భ పఞ్ఞత్తం, సమ్బహులా భన్తే భిక్ఖూ అచ్ఛిన్నకాని చీవరాని ధారేసుం దన్తకసావాని, తస్మిం భన్తే వత్థుస్మిం పఞ్ఞత్తం.

పుచ్ఛా – కదా ఆవుసో భగవా అనుఞ్ఞాసి ఛిన్నకం సఙ్ఘాటిం ఛిన్నకం ఉత్తరాసఙ్గం ఛిన్నకం అన్తరవాసకం.

విస్సజ్జనా – దక్ఖిణాగిరితో భన్తే పచ్ఛాగతకాలే భగవా అనుఞ్ఞాసి ఛిన్నకం సఙ్ఘాటిం ఛిన్నకం ఉత్తరాసఙ్గం ఛిన్నకం అన్తరవాసకం.

పుచ్ఛా – అగ్గళం చ ఆవుసో తున్నఞ్చ ఓవట్టికఞ్చ కణ్డుసకఞ్చ దళ్హీకమ్మఞ్చ భగవతా కత్థ అనుఞ్ఞాతం, కం ఆరబ్భ కిస్మిం వత్థుస్మిం అనుఞ్ఞాతం.

విస్సజ్జనా – బారాణసియం భన్తే అఞ్ఞతరం భిక్ఖుం ఆరబ్భ అనుఞ్ఞాతం, అఞ్ఞతరో భన్తే భిక్ఖు అగ్గళం అచ్ఛుపేసి, తస్మిం భన్తే వత్థుస్మిం అనుఞ్ఞాతం.

పుచ్ఛా – వస్సికసాటికా చ ఆవుసో ఆగన్తుకభత్తఞ్చ గమికభత్తఞ్చ గిలానభత్తఞ్చ గిలానుపట్ఠాకభత్తఞ్చ గిలానభేసజ్జఞ్చ ధువయాగు చ భిక్ఖునిసఙ్ఘస్స ఉదకసాటికాచాతి ఇమా అట్ఠ భగవతా కత్థ అనుఞ్ఞాతా, కం ఆరబ్భ కిస్మిం వత్థుస్మిం అనుఞ్ఞాతా.

విస్సజ్జనా – సావత్థియం భన్తే విసాఖం మిగారమాతరం ఆరబ్భ అనుఞ్ఞాతా, విసాఖా భన్తే మిగారమాతా భగవన్తం అట్ఠవరాని యాచి, తస్మిం భన్తే వత్థుస్మిం అనుఞ్ఞాతా.

పుచ్ఛా – భగవతా ఆవుసో మాతాపితూనం దానం అనుజానిత్వా సద్ధాదేయ్యం వినిపాతేన్తస్స దుక్కటం కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే అఞ్ఞతరం భిక్ఖుం ఆరబ్భ పఞ్ఞత్తం, అఞ్ఞతరస్స భన్తే భిక్ఖునో బహుం చీవరం ఉప్పన్నం అహోసి, సో చ తంచీవరం మాతాపితూనం దాతుకామో అహోసి, తస్మిం భన్తే వత్థుస్మిం పఞ్ఞత్తం.

మాతాపితరోతి ఖో భిక్ఖవే దదమానే కిం వదేయ్యామ, అనుజానామి భిక్ఖవే మాతాపితూనం దాతుం, న చ భిక్ఖవే సద్ధాదేయ్యం వినిపాతేతబ్బం, యో వినిపాతేయ్య ఆపత్తి దుక్కటస్స –

పుచ్ఛా – అఞ్ఞత్ర వస్సం వుట్ఠేన ఆవుసో అఞ్ఞత్ర చీవరభాగం సాదియన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే ఆయస్మన్తం ఉపనన్దం సక్యపుత్తం ఆరబ్భ పఞ్ఞత్తం, ఆయస్మా భన్తే ఉపనన్దో సక్యపుత్తో అఞ్ఞత్ర వస్సం వుట్ఠో అఞ్ఞత్ర చీవరభాగం సాదియి, తస్మిం భన్తే వత్థుస్మిం పఞ్ఞత్తం.

పుచ్ఛా – అనాథకం ఆవుసో భిక్ఖుం గిలానం న ఉపట్ఠహన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే అఞ్ఞతరం భిక్ఖుం ఆరబ్భ పఞ్ఞత్తం, భగవతి భన్తే సావత్థియం విహరతి అఞ్ఞతరస్స భిక్ఖునో కుచ్ఛివికారాబాధో అహోసి, సో సకే ముత్తకరీసే పలిపన్నో సయి, తస్మిం భన్తే వత్థుస్మిం పఞ్ఞత్తం.

పుచ్ఛా – నగ్గియం ఆవుసో తిత్థియసమాదానం సమాదియన్తస్స థుల్లచ్చయం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే అఞ్ఞతరం భిక్ఖుం ఆరబ్భ పఞ్ఞత్తం, అఞ్ఞతరో భన్తే భిక్ఖు నగ్గియం తిత్థియసమాదానం సమాదియి, తస్మిం భన్తే వత్థుస్మిం పఞ్ఞత్తం.

పుచ్ఛా – సబ్బనీలకాని వా ఆవుసో చీవరాని సబ్బపీతకాని వా సబ్బలోహితకాని వా సబ్బమఞ్జిట్ఠకాని వా సబ్బకణ్హానివాతి ఏవరూపాని చీవరాని ధారేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే ఛబ్బగ్గియే భిక్ఖూ ఆరబ్భ పఞ్ఞత్తం, ఛబ్బగ్గియా భన్తే భిక్ఖూ సబ్బనీలకాదీని చీవరాని ధారేసుం, తస్మిం భన్తే వత్థుస్మిం పఞ్ఞత్తం.

పుచ్ఛా – కఞ్చుకం వా ఆవుసో వేఠనం వా ధారేన్తస్స దుక్కటం భగవతా కత్థ పఞ్ఞత్తం, కం ఆరబ్భ కిస్మిం వత్థుస్మిం పఞ్ఞత్తం.

విస్సజ్జనా – సావత్థియం భన్తే ఛబ్బగ్గియేవ భిక్ఖూ ఆరబ్భ పఞ్ఞత్తం, ఛబ్బగ్గియా భన్తే భిక్ఖూ కఞ్చుకమ్పి ధారేసుం వేఠనమ్పి ధారేసుం, తస్మిం భన్తే వత్థుస్మిం పఞ్ఞత్తం.

పుచ్ఛా – చీవరసఞ్ఞుత్తం పుచ్ఛిస్సం, సనిదానం సనిద్దేసం. సముక్కట్ఠపదానం ఆవుసో కతి ఆపత్తియో.

విస్సజ్జనా – చీవరసఞ్ఞుత్తం విస్సజ్జిస్సం, సనిదానం సనిద్దేసం. సముక్కట్ఠపదానం భన్తే తిస్సో ఆపత్తియో.