సరణానివగ్గ

పఠమ మహానామసుత్త

పుచ్ఛా – తత్థేవ ఆవుసో తతియే సరణానివగ్గే పోరాణకేహి ధమ్మసంగాహకమహాథేరేహి పఠమం సంగీతం పఠమమహానామసుత్తం భగవతా కత్థ కం ఆరబ్భ కిస్మిం వత్థుస్మిం కథఞ్చ భాసితం.

విస్సజ్జనా – సక్కేసు భన్తే కపిలవత్థుస్మిం నిగ్రోధారామే మహానామం సక్కం ఆరబ్భ భాసితం. మహానామో భన్తే సక్కో భగవన్తం ఏతదవోచ ‘‘ఇదం భన్తే కపిలవత్థు ఇద్ధఞ్చేవ ఫీతఞ్చ బాహుజఞ్ఞం ఆకిణ్ణమనుస్సం సమ్బాధబ్యూహం, సో ఖ్వాహం భన్తే భగవన్తం వా పయిరుపాసిత్వా మనోభావనీయే వా భిక్ఖూ సాయన్హసమయం కపిలవత్థుం పవిసన్తో భన్తేనపి హత్థినా సమాగచ్ఛామి, భన్తేనపి అస్సేన సమాగచ్ఛామి, భన్తేనపి రథేన సమాగచ్ఛామి, భన్తేనపి సకటేన సమాగచ్ఛామి, భన్తేనపి పురిసేన సమాగచ్ఛామి, తస్స మయ్హం భన్తే తస్మిం సమయే ముస్సతేవ భగవన్తం ఆరబ్భ సతి, ముస్సతి ధమ్మం ఆరబ్భ సతి, ముస్సతి సఙ్ఘం ఆరబ్భ సతి, తస్స మయ్హం భన్తే ఏవం హోతి ఇమమ్హి చాహం సమయే కాలం కరేయ్యం, కా మయ్హం గతి, కో అభిసమ్పరాయో’’తి. తస్మిం భన్తే వత్థుస్మిం ‘‘మా భాయి మహానామ, మా భాయి మహానామ, అపాపకం తే మరణం భవిస్సతి అపాపికా కాలం కిరియా’’తి ఏవమాదినా భగవతా భాసితం.

దుతియ సరణానిసక్కసుత్త

పుచ్ఛా – తత్థేవ ఆవుసో ధమ్మసంగాహకమహాథేరేహి పఞ్చమం సంగీతం దుతియసరణానిసక్కసుత్తం భగవతా కత్థ కం ఆరబ్భ కిస్మిం వత్థుస్మిం కథఞ్చ భాసితం.

విస్సజ్జనా – సక్కేసు భన్తే కపిలవత్థుస్మిం నిగ్రోధారామే మహానామంయేవ సక్కం ఆరబ్భ భాసితం.

మహానామో భన్తే సక్కో భగవన్తం ఏతదవోచ ‘‘ఇధ భన్తే సరణాని సక్కో కాలఙ్కతో, సో భగవతా బ్యాకతో ‘సోతాపన్నో అవినిపాతధమ్మో నియతో సమ్బోధిపరాయణో’తి. తత్ర సుదం భన్తే సమ్బహులా సక్కా సఙ్గమ్మ సమాగమ్మ ఉజ్ఝాయన్తి ఖీయన్తి విపాచేన్తి ‘అచ్ఛరియం వత భో, అబ్భుతం వత

భో, ఏత్థ దాని కో న సోతాపన్నో భవిస్సతి, యత్ర హి నామ సరణాని సక్కో కాలఙ్కతో, సో భగవతా బ్యాకతో ‘సోతాపన్నో అవినిపాతధమ్మో నియతో సమ్బోధిపరాయణో’తి, సరణాని సక్కో సిక్ఖాయ అపరిపూరకారీ అహోసీ’’తి తస్మిం భన్తే వత్థుస్మిం ‘‘యో సో మహానామ దీఘరత్తం ఉపాసకో బుద్ధం సరణం గతో, ధమ్మం సరణం గతో, సఙ్ఘం సరణం గతో, సో కథం వినిపాతం గచ్ఛేయ్యా’’తి ఏవమాదినా భగవతా భాసితం.

పఠమ అనాథపిణ్డికసుత్త

పుచ్ఛా – తత్థేవ ఆవుసో పోరాణకేహి ధమ్మసంగాహకమహాథేరేహి ఛట్ఠం సంగీతం పఠమఅనాథపిణ్డికసుత్తం కత్థ కం ఆరబ్భ కిస్మిం వత్థుస్మిం కేన కథఞ్చ భాసితం.

విస్సజ్జనా – సావత్థియం భన్తే అనాథపిణ్డికం గహపతిం ఆరబ్భ ఆయస్మతా సారిపుత్తత్థేరేన ధమ్మసేనాపతినా భాసితం.

ఆయస్మా భన్తే సారిపుత్తత్థేరో ఆయస్మతా ఆనన్దత్థేరేన పచ్ఛాసమణేన సద్ధిం యేన అనాథపిణ్డికస్స గహపతిస్స నివేసనం తేనుపసఙ్కమి, ఉపసఙ్కమిత్వా పఞ్ఞత్తే ఆసనే నిసీది, నిసజ్జ ఖో ఆయస్మా సారిపుత్తో అనాథపిణ్డికం గహపతిం ఆబాధికం దుక్ఖితం బాళ్హగిలానం ఏతదవోచ ‘‘కచ్చి తే గహపతి ఖమనీయం కచ్చి యాపనీయం, కచ్చి దుక్ఖా వేదనా పటిక్కమన్తి, నో అభిక్కమన్తి, పటిక్కమోసానం పఞ్ఞాయతి, నో అభిక్కమో’’తి, న మే భన్తే ఖమనీయం, న యాపనీయం, బాళ్హా మే దుక్ఖా వేదనా అభిక్కమన్తి, నో పటిక్కమన్తి, అభిక్కమోసానం పఞ్ఞాయతి, నో పటిక్కమోతి. తస్మిం భన్తే వత్థుస్మిం ‘‘యథా రూపేన ఖో గహపతి బుద్ధే అప్పసాదేన సమన్నాగతో అస్సుతవా పుథుజ్జనో కాయస్స భేదా పరం మరణా అపాయం దుగ్గతిం వినిపాతం నియరం ఉపపజ్జతి తథారూపో తే బుద్ధే అప్పసాదో నత్థి, అత్థి చ ఖో తే గహపతి బుద్ధే అవేచ్చప్పసాదో ‘ఇతిపి సో భగవా అరహం సమ్మాసమ్బుద్ధో…పే… భగవా’తి తఞ్చ పన తే బుద్ధే అవేచ్చప్పసాదం అత్తని సమనుపస్సతో ఠానసో వేదనా పటిప్పస్సమ్భేయ్యా’’తి ఏవమాదినా ఆయస్మతా సారిపుత్తత్థేరేన ధమ్మసేనాపతినా భాసితం.

యస్స సద్ధా తథాగతే, అచలా సుప్పతిట్ఠితా;

సీలఞ్చ యస్స కల్యాణం, అరియకన్తం పసంసితం.

సఙ్ఘే పసాదో యస్సత్థి, ఉజుభూతఞ్చ దస్సనం;

అదలిద్దోతి తం ఆహు, అమోఘం తస్స జీవితం.

తస్మా సద్ధఞ్చ సీలఞ్చ, పసాదం ధమ్మదస్సనం;

అనుయుఞ్జేథ మేధావీ, సరం బుద్ధానసాసనం.