పుఞ్ఞాభిసన్దవగ్గ

మహానామసుత్త

పుచ్ఛా – తత్థేవ ఆవుసో పుఞ్ఞాభిసన్దవగ్గో పోరాణకేహి ధమ్మసంగాహకమహాథేరేహి సత్తమం సంగీతం మహానామసుత్తం భగవతా కత్థ కం ఆరబ్భ కిస్మిం వత్థుస్మిం కథఞ్చ భాసితం.

విస్సజ్జనా – సక్కేసు భన్తే కపిలవత్థుస్మిం మహానామం సక్కం ఆరబ్భ భాసితం.

మహానామో భన్తే సక్కో భగవన్తం ఏతదవోచ ‘‘కిత్తావతా ను ఖో భన్తే ఉపాసకో హోతీ’’తి. తస్మిం భన్తే వత్థుస్మిం ‘‘యతో ఖో మహానామ బుద్ధం సరణం గతో హోతి, ధమ్మం సరణం గతో హోతి, సఙ్ఘం సరణం గతో హోతీ’’తి ఏవమాదినా భగవతా భాసితం.

కిత్తావతా ను ఖో భన్తే ఉపాసకో హోతి.

కాళిగోధసుత్త

పుచ్ఛా – తత్థేవ ఆవుసో పోరాణకేహి ధమ్మసంగాహకమహాథేరేహి నవమం సంగీతం కాళిగోధసుత్తం భగవతా కత్థ కం కారబ్భ కథఞ్చ భాసితం.

విస్సజ్జనా – సక్కేసు భన్తే కాళిగోధం నామ సాకియానిం ఆరబ్భ ‘‘చతూహి ఖో గోధే ధమ్మేహి సమన్నాగతా అరియసావికా సోతాపన్నా హోతి అవినిపాతధమ్మా నియతా సమ్బోధిపరాయణా’’తి ఏవమాదినా భగవతా భాసితం.

లాభా తే గోధే, సులద్ధం తే గోధే, సోతాపత్తిఫలం తయా గోధే –

నన్దియసక్కసుత్త

పుచ్ఛా – తేనావుసో జానతా…పే… సమ్మాసమ్బుద్ధేన సోతాపత్తిసంయుత్తే పుఞ్ఞాభిసన్దవగ్గే దసమం నన్దియసక్కసుత్తం కత్థ కం ఆరబ్భ కిస్మిం వత్థుస్మిం కథఞ్చ భాసితం.

విస్సజ్జనా – సక్కేసు భన్తే కపిలవత్థుస్మిం నిగ్రోధారామే నన్దియం సక్కం ఆరబ్భ భాసితం. నన్దియో భన్తే సక్కో భగవన్తం ఏతదవోచ ‘‘యస్సేవ ను ఖో భన్తే అరియసావకస్స చత్తారి సోతాపత్తియఙ్గాని సబ్బేన సబ్బం సబ్బథాసబ్బం నత్థి, స్వేవ ను ఖో భన్తే అరియసావకో పమాదవిహారీ’’తి. తస్మిం భన్తే వత్థుస్మిం ‘‘యస్స ఖో నన్దియ చత్తారి సోతాపత్తియఙ్గాని సబ్బేనసబ్బం సబ్బథాసబ్బం నత్థి, తమహం బాహిరో పుథుజ్జనపక్ఖే ఠితోతి వదామీ’’తి ఏవమాదినా భగవతా భాసితం.