సచ్చసంయుత్త

తిరచ్ఛానకథాసుత్త

పుచ్ఛా – సచ్చసంయుత్తే ఆవుసో పోరాణకేహి ధమ్మసంగాయకమహాథేరేహి దసమం సంగీతం తిరచ్ఛానకథాసుత్తం భగవతా కత్థ కం ఆరబ్భ కథఞ్చ భాసితం.

విస్సజ్జనా – సావత్థియం భన్తే సమ్బహులే భిక్ఖూ ఆరబ్భ మా భిక్ఖవే అనేకవిహితం తిరచ్ఛానకథం కథేయ్యాథ. సేయ్యథిదం, రాజకథం చోరకథం మహామత్తకథం సేనాకథం భయకథం యుద్ధకథం అన్నకథం పానకథం వత్థకథం సయనకథం ఏవమాదినా భన్తే భగవతా భాసితం.

ఇదం దుక్ఖన్తి కథేయ్యాథ.

తస్మాతిహ భిక్ఖవే ఇదం దుక్ఖన్తి యోగో కరణీయో…పే… అయం దుక్ఖనిరోధగామినీ పటిపదాతి యోగో కరణీయో.

ధమ్మచక్కపవత్తనసుత్త

పుచ్ఛా – తత్థేవ ఆవుసో ధమ్మచక్కప్పవత్తనవగ్గే పోరాణకేహి ధమ్మసంగాహకమహాథేరేహి పఠమం సంగీతం ధమ్మచక్కపవత్తనసుత్తం భగవతా కత్థ కం ఆరబ్భ కథఞ్చ భాసితం.

విస్సజ్జనా – బారాణసియం భన్తే ఇసిపతనే మిగదాయే పఞ్చవగ్గియే భిక్ఖూ ఆరబ్భ ‘‘ద్వే మే భిక్ఖవే అన్తా పబ్బజితేన నసేవితబ్బా. కతమే ద్వే, యో చాయం కామేసు కామసుఖల్లికానుయోగో హీనో గమ్మో పోథుజ్జనికో అనరియో అనత్థసంహితో, యో చాయం అత్తకిలమథానుయోగో దుక్ఖో అనరియో అనత్థసంహితో, ఏతే ఖో భిక్ఖవే ఉభో అన్తే అనుపగమ్మ మజ్ఝిమాపటిపదా తథాగతేన అభిసమ్బుద్ధా’’తి ఏవమాదినా భగవతా భాసితం.

ఆసవక్ఖయసుత్త

పుచ్ఛా – తత్థేవ ఆవుసో కోటిగామవగ్గే పోరాణకేహి ధమ్మసంగాహకమహాథేరేహి పఞ్చమం సంగీతం ఆసవక్ఖయసుత్తం భగవతా కత్థ కం ఆరబ్భ కథఞ్చ భాసితం.

విస్సజ్జనా – సావత్థియం భన్తే సమ్బహులే భిక్ఖూ ఆరబ్భ ‘‘జానతోహం భిక్ఖవే పస్సతో ఆసవానం ఖయం వదామి, నో అజానతో అపస్సతో. కిఞ్చ భిక్ఖవే జానతో పస్సతో ఆసవానం ఖయో హోతి, ఇదం దుక్ఖన్తి భిక్ఖవే జానతో పస్సతో ఆసవానం ఖయో హోతి, అయం దుక్ఖసముదయోతి, అయం దుక్ఖనిరోధోతి, అయం దుక్ఖనిరోధగామినీపటిపదాతి జానతో పస్సతో ఆసవానం ఖయో హోతి. ఏవం ఖో భిక్ఖవే జానతో ఏవం పస్సతో ఆసవానం ఖయో హోతి. తస్మాతిహ భిక్ఖవే ‘‘ఇదం దుక్ఖ’’న్తి యోగో కరణీయో, అయం దుక్ఖసముదయోతి, అయం దుక్ఖనిరోధోతి, అయం దుక్ఖనిరోధగామినీపటిపదాతి యోగో కరణీయో’’తి ఏవం ఖో భగవతా భాసితం.

సీసపావనసుత్త

పుచ్ఛా – తత్థేవ ఆవుసో సీసపావనవగ్గే పోరాణకేహి ధమ్మసంగాహకమహాథేరేహి పఠమం సంగీతం సీసపావనసుత్తం భగవతా కత్థ కం ఆరబ్భ కథఞ్చ భాసితం.

విస్సజ్జనా – కోసమ్బియం భన్తే సీసపావనే సమ్బహులే భిక్ఖూ ఆరబ్భ ‘‘తం కిం మఞ్ఞథ భిక్ఖవే, కతమం నుఖో బహుతరం యాని వా మయా పరిత్తాని సీసపాపణ్ణాని పాణినా గహితాని యదిదం ఉపరి సీసపావనే’’తి ఏవమాదినా భగవతా భాసితం.

పఞ్చగతిపేయ్యాలవగ్గ

పుచ్ఛా – తత్థేవ ఆవుసో పోరాణకేహి ధమ్మసంగాహకమహాథేరేహి పరియోసానభావేన సంగీతో పఞ్చగతిపేయ్యాలవగ్గే, భగవతా కత్థ కం ఆరబ్భ కథఞ్చ భాసితో.

విస్సజ్జనా – వేసాలియం భన్తే సమ్బహులే భిక్ఖూ ఆరబ్భ ‘‘తం కిం మఞ్ఞథ భిక్ఖవే, కతమం ను ఖో బహుతరం, యో వాయం మయా పరిత్తో నఖసిఖాయం పంసు ఆరోపితో, అయం వా మహాపథవీ’’తి ఏవమాదినా భగవతా భాసితో.

పుచ్ఛా – కే ఆవుసో సిక్ఖన్తి.

విస్సజ్జనా – సేక్ఖా చ భన్తే పుథుజ్జనకల్యాణకా చ సిక్ఖన్తి.

పుచ్ఛా – కే ఆవుసో సిక్ఖితసిక్ఖా.

విస్సజ్జనా – అరహన్తో భన్తే సిక్ఖితసిక్ఖా.

పుచ్ఛా – కత్థ ఆవుసో ఠితం.

విస్సజ్జనా – సిక్ఖాకామేసు భన్తే ఠితం.

పుచ్ఛా – కే ఆవుసో ధారేన్తి.

విస్సజ్జనా – యేసం భన్తే వత్తతి తే ధారేన్తి.

పుచ్ఛా – కస్స ఆవుసో వచనం.

విస్సజ్జనా – భగవతో భన్తే వచనం అరహతో సమ్మాసమ్బుద్ధస్స.

పుచ్ఛా – కేన ఆవుసో ఆభతం.

విస్సజ్జనా – పరమ్పరాయ భన్తే ఆభతం.