నమో తస్స భగవతో అరహతో సమ్మాసమ్బుద్ధస్స

సుత్తన్తపిటక

అఙ్గుత్తరనికాయే

సంగాయనస్స పుచ్ఛా విస్సజ్జనా

పుచ్ఛా – పఠమమహాసంగీతికాలే ఆవుసో ధమ్మసంగాహకా మహాకస్సపాదయో మహాథేరవరా పోరాణసంగీతికారా పఠమం వినయపిటకం సంగాయిత్వా సుత్తన్తపిటకే చ దీఘమజ్ఝిమసంయుత్తసఙ్ఖాతే తయో నికాయే సంగాయిత్వా తదనన్తరం కిం నామ పావచనం సంగాయింసు.

విస్సజ్జనా – పఠమమహాసంగీతికాలే భన్తే ధమ్మసంగాహకా మహాకస్సపాదయో మహాథేరవరా పోరాణసంగీతికారా పఠమం వినయం సంగాయిత్వా సుత్తన్తపిటకే చ దీఘమజ్ఝిమసంయుత్తసఙ్ఖాతే తయో నికాయే సంగాయిత్వా తదనన్తరం నవహి చ సుత్తసహస్సేహి పఞ్చహి చ సుత్తసత్తేహి సత్తపఞ్ఞాసాయ చ సుత్తేహి పటిమణ్డితం వీసతిభాణవారసతపరిమాణం అఙ్గుత్తరనికాయం నామ పావచనం సంగాయింసు.

పుచ్ఛా – అఙ్గుత్తరనికాయేపి ఆవుసో ఏకకనిపాతో దుకనిపాతో తికనిపాతోతిఆదినా నిపాతపకరణపరిచ్ఛేదవసేన ఏకాదసవిధా. తత్థ కతరం నిపాతపకరణం సంగాయింసు.

విస్సజ్జనా – అఙ్గుత్తరనికాయే భన్తే ఏకాదససు నిపాతపకరణపరిచ్ఛేదేసు ఏకకనిపాతం పఠమం సంగాయింసు.

౧. రూపాదివగ్గ

పుచ్ఛా – ఏకకనిపాతేపి ఆవుసో రూపాదివగ్గో నీవరణప్పహానవగ్గో అకమ్మనియవగ్గోతిఆదినా వగ్గభేదవసేన బహువిధా. తత్థ కతరం వగ్గం పఠమం సంగాయింసు.

విస్సజ్జనా – ఏకకనిపాతే భన్తే రూపాదివగ్గో నీవరణప్పహానవగ్గోతిఆదినా వీసతియా వగ్గేసు రూపాదివగ్గం పఠమం సంగాయింసు.

పుచ్ఛా – సాధు సాధు ఆవుసో, మయమ్పి దాని ఆవుసో తతోయేవ పట్ఠాయ సంగాహనత్థాయ సంగీతిపుబ్బఙ్గమాని ధమ్మపుచ్ఛనవిస్సజ్జనకిచ్చాని ఆవహితుం సమారభామ. తేనావుసో భగవతా జానతా పస్సతా అరహతా సమ్మాసమ్బుద్ధేన అఙ్గుత్తరనికాయే ఏకకనిపాతే రూపాదివగ్గే పురిమాని పఞ్చ సుత్తాని కత్థ కం ఆరబ్భ కథఞ్చ భాసితాని.

విస్సజ్జనా – సావత్థియం భన్తే సమ్బహులే భిక్ఖూ ఆరబ్భ రూపాదిగరుకానం పఞ్చన్నం పురిసానం అజ్ఝాసయవసేన ‘‘నాహం భిక్ఖవే అఞ్ఞం ఏకరూపమ్పి సమనుపస్సామి, యం ఏవం పురిసస్స చిత్తం పరియాదాయ తిట్ఠతి, యథయిదం భిక్ఖవే ఇత్థిరూపం, ఇత్థిరూపం భిక్ఖవే పురిసస్స చిత్తం పరియాదాయ తిట్ఠతీ’’తి ఏవమాదినా భగవతా భాసితాని.

నాహం భిక్ఖవే అఞ్ఞం ఏకరూపమ్పి సమనుపస్సామి, యం ఏవం పురిసస్స చిత్తం పరియాదాయ తిట్ఠతి, యథయిదం భిక్ఖవే ఇత్థిరూపం, ఇత్థిరూపం భిక్ఖవే పురిసస్స చిత్తం పరియాదాయ తిట్ఠతి.

పుచ్ఛా – తత్థేవ ఆవుసో పచ్ఛిమాని పఞ్చ సుత్తాని భగవతా కత్థ కం ఆరబ్భ కథఞ్చ భాసితాని.

విస్సజ్జనా – తస్మింయేవ భన్తే సావత్థియం సమ్బహులే భిక్ఖూ ఆరబ్భ రూపాదిగరుకానం పఞ్చన్నం ఇత్థీనం అజ్ఝాసయవసేన ‘‘నాహం భిక్ఖవే అఞ్ఞం ఏకరూపమ్పి సమనుపస్సామి, యం ఏవం ఇత్థియా చిత్తం పరియాదాయ తిట్ఠతి, యథయిదం భిక్ఖవే పురిసరూపం, పురిసరూపం భిక్ఖవే ఇత్థియా చిత్తం పరియాదాయ తిట్ఠతీ’’తి ఏవమాదినా భగవతా భాసితాని.

నాహం భిక్ఖవే అఞ్ఞం ఏకరూపమ్పి సమనుపస్సామి, యం ఏవం ఇత్థియా చిత్తం పరియాదాయ తిట్ఠతి, యథయిదం భిక్ఖవే పురిసరూపం, పురిసరూపం భిక్ఖవే ఇత్థియా చిత్తం పరియాదాయ తిట్ఠతి.

నీతత్థవసేన, నేయ్యత్థవసేన

పుచ్ఛా – ఇమస్మిం ఆవుసో రూపాదివగ్గే భగవతా నీతత్థవసేన కిం కథితం, నేయ్యత్థవసేన పన కిం ఞాపితం.

విస్సజ్జనా – ఇమస్మిం భన్తే రూపాదివగ్గే భగవతా నీతత్థవసేన వట్టం కథితం. నేయ్యత్థవసేన పన వివట్టమ్పి ఞాపితం.

౨. నీవరణప్పహానవగ్గ

పుచ్ఛా – దుతియో పన ఆవుసో నీవరణప్పహానవగ్గో భగవతా కత్థ కథఞ్చ భాసితో.

విస్సజ్జనా – సావత్థియం భన్తే ‘‘నాహం భిక్ఖవే అఞ్ఞం ఏకధమ్మమ్పి సమనుపస్సామి, యేన అనుప్పన్నో వా కామచ్ఛన్దో ఉప్పజ్జతి, ఉప్పన్నో వా కామచ్ఛన్దో భియ్యోభావాయ వేపుల్లాయ సంవత్తతి, యథయిదం భిక్ఖవే సుభనిమిత్తం, సుభనిమిత్తం భిక్ఖవే అయోనిసో మనసికరోతో అనుప్పన్నోచేవ కామచ్ఛన్దో ఉప్పజ్జతి, ఉప్పన్నో చ కామచ్ఛన్దో భియ్యోభావాయ వేపుల్లాయ సంవత్తతీ’’తి ఏవమాదినా భగవతా భాసితో.

పుచ్ఛా – ఇమస్మిం పన ఆవుసో దుతియే నీవరణప్పహానవగ్గే భగవతా కిం కథితం.

విస్సజ్జనా – ఇమస్మిం పన భన్తే దుతియే నీవరణప్పహానవగ్గే భగవతా వట్టమ్పి వివట్టమ్పి కథితం.

౩. అకమ్మనియవ

పుచ్ఛా – తేనావుసో…పే… సమ్మాసమ్బుద్ధేన అఙ్గుత్తరనికాయే ఏకకనిపాతే తతియే అకమ్మనియవగ్గే కీదిసీ ధమ్మదేసనాయో దేసితా.

విస్సజ్జనా – తతియే భన్తే అకమ్మనియవగ్గే ‘‘నాహం భిక్ఖవే అఞ్ఞం ఏకధమ్మమ్పి సమనుపస్సామి, యం ఏవం అభావితం అకమ్మనియం హోతి, యథయిదం భిక్ఖవే చిత్తం, చిత్తం భిక్ఖవే అభావితం అకమ్మనియం హోతి. నాహం భిక్ఖవే అఞ్ఞం ఏకధమ్మమ్పి సమనుపస్సామి, యం ఏవం భావితం కమ్మనియం హోతి, యథయిదం భిక్ఖవే చిత్తం. చిత్తం భిక్ఖవే భావితం కమ్మనియం హోతీ’’తి ఏవమాదికా భగవతా ధమ్మదేసనాయో దేసితా.

౪. అదన్తవగ్గ

పుచ్ఛా – చతుత్థే పనావుసో అదన్తవగ్గే భగవతా కీదిసీ ధమ్మదేసనాయో దేసితా.

విస్సజ్జనా – చతుత్థే భన్తే అదన్తవగ్గే ‘‘నాహం భిక్ఖవే అఞ్ఞం ఏకధమ్మమ్పి సమనుపస్సామి, యం ఏవం అదన్తం మహతో అనత్థాయ సంవత్తతి, యథయిదం భిక్ఖవే చిత్తం, చిత్తం భిక్ఖవే అదన్తం మహతో అనత్థాయ సంవత్తతి. నాహం భిక్ఖవే అఞ్ఞం ఏకధమ్మమ్పి సమనుపస్సామి, యం ఏవం దన్తం మహతో అత్థాయ సంవత్తతి, యథయిదం భిక్ఖవే చిత్తం, చిత్తం భిక్ఖవే దన్తం మహతో అత్థాయ సంవత్తతీ’’తి ఏవమాదికా భగవతా ధమ్మదేసనాయో దేసితా.

౫. పణిహితఅచ్ఛవగ్గ

పుచ్ఛా – పఞ్చమే ఆవుసో పణిహితఅచ్ఛవగ్గే భగవతా కీదిసీ ధమ్మదేసనాయో దేసితా.

విస్సజ్జనా – పఞ్చమే భన్తే పణిహితఅచ్ఛవగ్గే ‘‘సేయ్యథాపి భిక్ఖవే సాలిసూకం వా యవసూకం వా మిచ్ఛాపణిహితం హత్థేన వా పాదేన వా అక్కన్తం హత్థం వా పాదం వా భేచ్ఛతి, లోహితం వా ఉప్పాదేస్సతీతి నేతం ఠాన విజ్జతి. తం కిస్సహేతు, మిచ్ఛాపణిహితత్తా భిక్ఖవే సూకస్స. ఏవమేవ ఖో భిక్ఖవే సో వత భిక్ఖు మిచ్ఛాపణిహితేన చిత్తేన అవిజ్జం భేచ్ఛతి, విజ్జం ఉప్పాదేస్సతి, నిబ్బానం సచ్ఛికరిస్సతీతి నేతం ఠానం విజ్జతి, తం కిస్స హేతు, మిచ్ఛాపణిహితత్తా భిక్ఖవే చిత్తస్సా’’తి ఏవమాదికా భగవతా ధమ్మదేసనాయో దేసితా.

౬. అచ్ఛరాసఙ్ఘాతవగ్గ

పుచ్ఛా – అచ్ఛరాసఙ్ఘాతవగ్గే ఆవుసో పఠమ దుతియసుత్తాని భగవతా కథం భాసితాని.

విస్సజ్జనా – అచ్ఛరాసఙ్ఘాతవగ్గే భన్తే భగవతా ‘‘పభస్సరమిదం భిక్ఖవే చిత్తం, తఞ్చ ఖో ఆగన్తుకేహి ఉపక్కిలేసేహి ఉపక్కిలిట్ఠం, తం అస్సుతవా పుథుజ్జనో యథాభూతం నప్పజానాతి, తస్మా ‘అస్సుతవతో పుథుజ్జనస్స చిత్తభావనా నత్థీ’తి వదామి. పభస్సరమిదం భిక్ఖవే చిత్తం, తఞ్చ ఖో ఆగన్తుకేహి ఉపక్కిలేసేహి విప్పముత్తం, తం సుభవా అరియసావకో యథాభూతం పజానాతి. తస్మా ‘సుతపతో అరియసావకస్స చిత్తభావనా అత్థీ’తి వదామీ’’తి. ఏవం ఖో భగవతా భాసితాని.

తతియసుత్త

పుచ్ఛా – తత్థేవ ఆవుసో తతియసుత్తాదీని భగవతా కథం భాసితాని.

విస్సజ్జనా – తత్థేవ భన్తే తతియసుత్తాదీని పఞ్చసుత్తాని ‘‘అచ్ఛరాసఙ్ఘాతమత్తమ్పి చే భిక్ఖవే భిక్ఖు మేత్తాచిత్తం ఆసేవతి, భావేతి, మనసికరోతి. అయం వుచ్చతి భిక్ఖవే భిక్ఖు అరిత్తజ్ఝానో విహరతి సత్థుసాసనకరో ఓవాదపతికరో అమోఘం రట్ఠపిణ్డం భుఞ్జతి, కో పన వాదో యే నం బహులీకరోన్తి. యేకేచి భిక్ఖవే ధమ్మా అకుసలా అకుసలభాగియా అకుసలపక్ఖికా, సబ్బేతే మనోపుబ్బఙ్గమా, మనో తేసం ధమ్మానం పఠమం ఉప్పజ్జతి, అన్వదేవ అకుసలాధమ్మా, యేకేచి భిక్ఖవే ధమ్మా కుసలా కుసలభాగియా కుసలపక్ఖికా, సబ్బేతే మనోపుబ్బఙ్గమా, మనో తేసం ధమ్మానం పఠమం ఉప్పజ్జతి, అన్వదేవ కుసలా ధమ్మా’’తి ఏవం ఖో భన్తే భగవతా భాసితాని.

అట్ఠమసుత్త

పుచ్ఛా – తత్థేవ ఆవుసో అట్ఠమ నవమ దసమసుత్తాని చ వీరియారమ్భాదివగ్గే దససుత్తాని చ కల్యాణమిత్తాదివగ్గే పఠమసుత్తఞ్చ భగవతా కథం భాసితాని.

విస్సజ్జనా – తత్థేవ భన్తే అట్ఠమ నవమ దసమసుత్తాని చ వీరియారమ్భాదివగ్గే దససుత్తాని చ కల్యాణమిత్తాదివగ్గే పఠమసుత్తఞ్చ ‘‘నాహం భిక్ఖవే అఞ్ఞం ఏకధమ్మమ్పి సమనుపస్సామి, యేన అనుప్పన్నా వా అకుసలా ధమ్మా ఉప్పజ్జన్తి, ఉప్పన్నా వా కుసలా ధమ్మా పరిహాయన్తి, యథయిదం భిక్ఖవే పమాదో, పమత్తస్స భిక్ఖవే అనుప్పన్నా చేవ అకుసలా ధమ్మా ఉప్పజ్జన్తి, ఉప్పన్నా చ కుసలా ధమ్మా పరిహాయన్తీ’’తి ఏవమాదినా భన్తే భగవతా భాసితాని.

దుతియసుత్త

పుచ్ఛా – కల్యాణమిత్తాదివగ్గే ఆవుసో దుతియ తతియసుత్తాని భగవతా కథం భాసితాని.

విస్సజ్జనా – కల్యాణమిత్తాదివగ్గే భన్తే దుతియ తతియసుత్తాని ‘‘నాహం భిక్ఖవే అఞ్ఞం ఏకధమ్మమ్పి సమనుపస్సామి, యేన అనుప్పన్నా వా అకుసలా ధమ్మా ఉప్పజ్జన్తి, ఉప్పన్నా వా కుసలా ధమ్మా పరిహాయన్తి, యథయిదం భిక్ఖవే అనుయోగో అకుసలానం ధమ్మానం అననుయోగో కుసలానం ధమ్మాన’’న్తి ఏవమాదినా భగవతా భాసితాని.

ఛట్ఠసుత్త

పుచ్ఛా – తత్థేవ ఆవుసో ఛట్ఠసుత్తాదీని చ పమాదాదివగ్గే పఠమసుత్తఞ్చ భగవతా కథం భాసితాని.

విస్సజ్జనా – తత్థేవ భన్తే ఛట్ఠసుత్తాదీని చ పమాదాదివగ్గే పఠమసుత్తఞ్చ ‘‘అప్పమత్తికా ఏసా భిక్ఖవే పరిహాని యదిదం ఞాతిపరిహాని. ఏతం పతికిట్ఠం భిక్ఖవే పరిహానీనం యదిదం పఞ్ఞాపరిహానీతి. అప్పమత్తికా ఏసా భిక్ఖవే వుద్ధి యదిదం ఞాతివుద్ధి. ఏతదగ్గం భిక్ఖవే వుద్ధీనం యదిదం పఞ్ఞావుద్ధి. తస్మాతిహ భిక్ఖవే ఏవం సిక్ఖితబ్బం ‘పఞ్ఞావుద్ధియా వద్ధిస్సామా’తి. ఏవఞ్హి వో భిక్ఖవే సిక్ఖితబ్బ’’న్తి ఏవమాదినా భన్తే భగవతా భాసితాని.

పమాదాదివగ్గ

పుచ్ఛా – తేనావుసో…పే… సమ్మాసమ్బుద్ధేన పమాదాదివగ్గే దుతియసుత్తాదీని కథం భాసితాని.

విస్సజ్జనా – నాహం భిక్ఖవే అఞ్ఞం ఏకధమ్మమ్పి సమనుపస్సామి, యో ఏవం మహతో అనత్థాయ సంవత్తతి, యథయిదం భిక్ఖవే పమాదో. పమాదో భిక్ఖవే మహతో అనత్థాయ సంవత్తతి. నాహం భిక్ఖవే అఞ్ఞం ఏకధమ్మమ్పి, యో ఏవం మహతో అత్థాయ సంవత్తతి, యథయిదం భిక్ఖవే అప్పమాదో, అప్పమాదో భిక్ఖవే మహతో అనత్థాయ సంవత్తతీతి ఏవమాదినా భన్తే భగవతా భాసితాని.

దుతియ పమాదాదివగ్గ

పుచ్ఛా – దుతియే పనావుసో పమాదాదివగ్గే పఠమసుత్తాదీని భగవతా కథం భాసితాని.

విస్సజ్జనా – దుతియే భన్తే పమాదాదివగ్గే అజ్ఝత్తికం భిక్ఖవే అఙ్గన్తి కరిత్వా నాఞ్ఞం ఏకఙ్గమ్పి సమనుపస్సామి, యం ఏవం మహతో అనత్థాయ సంవత్తతి, యథయిదం భిక్ఖవే పమాదో. పమాదో భిక్ఖవే మహతో అనత్థాయ సంవత్తతి. అజ్ఝత్తికం భిక్ఖవే అఙ్గన్తి కరిత్వా నాఞ్ఞం ఏకఙ్గమ్పి సమనుపస్సామి, యం ఏవం మహతో అత్థాయ సంవత్తతి, యథయిదం భిక్ఖవే అప్పమాదో. అప్పమాదో భిక్ఖవే మహతో అత్థాయ సంవత్తతీతి ఏవమాదినా భన్తే భగవతా భాసితాని.

దససుత్త

పుచ్ఛా – తత్థేవ ఆవుసో తేత్తింసమాదీనిచ దససుత్తాని అధమ్మవగ్గే చ దససుత్తాని భగవతా కథం భాసితాని.

విస్సజ్జనా – తత్థేవ భన్తే తేత్తింసమాదీని దససుత్తాని చ అధమ్మవగ్గే దససుత్తాని చ యే తే భిక్ఖవే భిక్ఖూ అధమ్మం ‘‘ధమ్మో’’తి దీపేన్తి, తే భిక్ఖవే భిక్ఖూ బహుజనఅహితాయ పటిపన్నా బహుజనఅసుఖాయ బహునో జనస్స అనత్థాయ అహితాయ దుక్ఖాయ దేవమనుస్సానం. బహుఞ్చ తే భిక్ఖవే భిక్ఖూ అపుఞ్ఞం పసవన్తి, తే చిమం సద్ధమ్మం అన్తరధాపేన్తీతి ఏవమాదినా చ, యే తే భిక్ఖవే భిక్ఖూ అధమ్మం ‘‘అధమ్మో’’తి దీపేన్తి, తే భిక్ఖవే భిక్ఖూ బహుజనహితాయ పటిపన్నా బహుజనసుఖాయ బహుజనో జనస్స అత్థాయ హితాయ సుఖాయ దేవమనుస్సానం. బహుఞ్చ తే భిక్ఖవే భిక్ఖూ పుఞ్ఞం పసవన్తి, తే చిమం సద్ధమ్మం ఠపేన్తీతి ఏవమాదినా చ భన్తే భగవతా భాసితాని.

ఏకపుగ్గలవగ్గ

పుచ్ఛా – ఏకపుగ్గలవగ్గే ఆవుసో భగవతా కీదిసీ ధమ్మదేసనాయో దేసితా.

విస్సజ్జనా – ఏకపుగ్గలవగ్గే భన్తే భగవతా ఏకపుగ్గలో భిక్ఖవే లోకే ఉప్పజ్జమానో ఉప్పజ్జతి బహుజనహితాయ బహుజనసుఖాయ లోకానుకమ్పాయ అత్థాయ హితాయ సుఖాయ దేవమనుస్సానం. కతమో ఏకపుగ్గలో, తథాగతో అరహం సమ్మాసమ్బుద్ధో, అయం ఖో భిక్ఖవే ఏకపుగ్గలో లోకే ఉప్పజ్జమానో ఉప్పజ్జతి బహుజనహితాయ బహుజనసుఖాయ లోకానుకమ్పాయ అత్థాయ హితాయ సుఖాయ దేవమనుస్సానన్తి ఏవమాదికా భగవతా ధమ్మదేసనాయో దేసితా.

ఏతదగ్గవగ్గ

అఞ్ఞాసికోణ్డఞ్ఞ వత్థు

పుచ్ఛా – ఏతదవగ్గే ఆవుసో ఆగతేసు ఏకచత్తాలీసాయ థేరేసు ఆయస్మా అఞ్ఞాసికోణ్డఞ్ఞత్థేరో కథం భగవతా ఏతదగ్గట్ఠానే ఠపితో.

విస్సజ్జనా – ఏతదగ్గవగ్గే భన్తే ఆగతేసు ఏకచత్తాలీసాయ మహాథేరేసు ‘‘ఏతదగ్గం భిక్ఖవే మమ సావకానం భిక్ఖూనం రత్తఞ్ఞూనం యదిదం అఞ్ఞాసికోణ్డఞ్ఞో’’తి, ఏవం ఖో భన్తే ఆయస్మా అఞ్ఞాసికోణ్డఞ్ఞత్థేరో భగవతా ఏతదగ్గట్ఠానే ఠపితో.

అగ్గసావకవత్థు

పుచ్ఛా – తేనావుసో భగవతా…పే… సమ్మాసమ్బుద్ధేన అఙ్గుత్తరనికాయే ఏకకనిపాతే ఏతదగ్గవగ్గే ఆగతేసు ఏకచత్తాలీసాయ మహాథేరేసు ఆయస్మా చ సారిపుత్తత్థేరో ధమ్మసేనాపతి పఠమో అగ్గసావకో ఆయస్మా చ మహామోగ్గల్లానత్థేరో దుతియో అగ్గసావకో కథం ఏతదగ్గట్ఠానే ఠపితో.

విస్సజ్జనా – ఆయస్మా భన్తే సారిపుత్తత్థేరో ధమ్మసేనాపతి ‘‘ఏతదగ్గం భిక్ఖవే మమ సావకానం భిక్ఖూనం మహాపఞ్ఞానం యదిదం సారిపుత్తో’’తి. ఆయస్మా పన మహామోగ్గల్లానత్థేరో ‘‘ఏతదగ్గం భిక్ఖవే మమ సావకానం భిక్ఖూనం ఇద్ధిమన్తానం యదిదం మహామోగ్గల్లానో’’తి. ఏవం ఖో భన్తే భగవతా ఏతదగ్గట్ఠానే ఠపితో.

ఇదం తే ఆసనం వీర, పఞ్ఞత్తం తవనుచ్ఛవిం;

మమ చిత్తం పసాదేన్తో, నిసీద పుప్ఫమాసనే.

యే వత లోకే అరహన్తో వా అరహత్తమగ్గం వా సమాపన్నా, అయం తేసం భిక్ఖు అఞ్ఞతరో.

యంనూనాహం ఇమం భిక్ఖుం ఉపసఙ్కమిత్వా పఞ్హం పుచ్ఛేయ్యం.

యే ధమ్మా హేతుప్పభవా,

తేసం హేతుం తథాగతో;

ఆహ తేసఞ్చ యో నిరోధో,

ఏవంవాదీ మహాసమణో –

లభేయ్యామ మయం భన్తే భగవతో సన్తికే పబ్బజ్జం, లభేయ్యామ ఉపసమ్పదం.

ఏతదగ్గం భిక్ఖవే మమ సావకానం భిక్ఖూనం మహాపఞ్ఞానం యదిదం సారిపుత్తో.

ఏతదగ్గం భిక్ఖవే మమ సావకానం భిక్ఖూనం ఇద్ధిమన్తానం యదిదం మహామోగ్గల్లానో.

మహాకస్సపవత్థు

పుచ్ఛా – ఆయస్మా పన ఆవుసో మహాకస్సపత్థేరో పఠమమహాసంగీతికాలే పామోక్ఖసఙ్ఘనాయకభూతో భగవతా కథం ఏతదగ్గట్ఠానే ఠపితో.

విస్సజ్జనా – ఆయస్మా భన్తే మహాకస్సపత్థేరో పఠమమహాసంగీతికాలే సఙ్ఘపామోక్ఖభూతో ‘‘ఏతదగ్గం భిక్ఖవే మమ సావకానం భిక్ఖూనం ధుతవాదానం యదిదం మహాకస్సపో’’తి. ఏవం ఖో భన్తే భగవతా ఏతదగ్గట్ఠానే ఠపితో.

అనురుద్ధత్థేరవత్థు

పుచ్ఛా – తేనావుసో…పే… సమ్మాసమ్బుద్ధేన అఙ్గుత్తరనికాయే ఏకకనిపాతే ఏతదగ్గవగ్గే ఆగతేసు ఏకచత్తాలీసాయ మహాథేరేసు ఆయస్మా అనురుద్ధత్థేరో కథం ఏతదగ్గట్ఠానే ఠపితో.

విస్సజ్జనా – ఆయస్మా భన్తే అనురుద్ధత్థేరో ‘‘ఏతదగ్గం భిక్ఖవే మమ సావకానం భిక్ఖూనం దిబ్బచక్ఖుకానం యదిదం అనురుద్ధో’’తి ఏవం ఖో భన్తే భగవతా ఏతదగ్గట్ఠానే ఠపితో.

సీవలివత్థు

పుచ్ఛా – ఆయస్మా పన ఆవుసో సీవలిత్థేరో భగవతా కథం ఏతదగ్గట్ఠానే ఠపితో.

విస్సజ్జనా – ఆయస్మా భన్తే సీవలిత్థేరో ‘‘ఏతదగ్గం భిక్ఖవే మమ సావకానం భిక్ఖూనం లాభీనం యదిదం సీవలీ’’తి ఏవం ఖో భన్తే భగవతా ఏతదగ్గట్ఠానే ఠపితో.

సమ్మాసమ్బుద్ధో వత సో భగవా, యో ఇమస్స ఏవరూపస్స దుక్ఖస్స పహానాయ ధమ్మం దేసేతి.

సుప్పటిపన్నో వత తస్స భగవతో సావకసఙ్ఘో, యో ఇమస్స ఏవరూపస్స దుక్ఖస్స పహానాయ పటిపన్నో.

సుసుఖం వత నిబ్బానం, యత్థిదం ఏవరూపం దుక్ఖం న సంవిజ్జతి –

‘‘ఏతదగ్గం భిక్ఖవే మమ సావకానం భిక్ఖూనం లాభీనం యదిదం సీవలి’’ హు –

ఆనన్దాథేరవత్థు

పుచ్ఛా – ఆయస్మా పన ఆవుసో ఆనన్దత్థేరో ధమ్మభణ్డాగారికో పఠమమహాసంగీతికాలే ధమ్మవిస్సజ్జకథేరభూతో కథం భగవతా ఏతదగ్గట్ఠానే ఠపితో.

విస్సజ్జనా – ఆయస్మా భన్తే ఆనన్దత్థేరో ధమ్మభణ్డాగారికో పఠమమహాసంగీతికాలే ధమ్మవిస్సజ్జకభూతో ‘‘ఏతదగ్గం భిక్ఖవే మమ సావకానం భిక్ఖూనం బహుస్సుతానం యదిదం ఆనన్దో. ఏతదగ్గం భిక్ఖవే మమ సావకానం భిక్ఖూనం సతిమన్తానం యదిదం ఆనన్దో. ఏతదగ్గం భిక్ఖవే మమ సావకానం భిక్ఖూనం గతిమన్తానం యదిదం ఆనన్దో. ఏతదగ్గం భిక్ఖవే మమ సావకానం భిక్ఖూనం ధితిమన్తానం యదిదం ఆనన్దో. ఏతదగ్గం భిక్ఖవే మమ సావకానం భిక్ఖూనం ఉపట్ఠాకానం యదిదం ఆనన్దో’’తి ఏవం ఖో భన్తే భగవతా పఞ్చసు ఏతదగ్గట్ఠానేసు ఠపితో.

సతసహస్సేన మే కీతం,

సతసహస్సేన మాపితం;

సోభనం నామ ఉయ్యానం;

పటిగ్గణ్హ మహాముని –

‘‘ఏతదగ్గం భిక్ఖవే మమ సావకానం భిక్ఖూనం బహుస్సుతానం. సతిమన్తానం. గతిమన్తానం. ధితిమన్తానం. ఉపట్ఠాకానం యదిదం ఆనన్దో’’ –

ఉపాలివత్థు

పుచ్ఛా – తేనావుసో భగవతా…పే… సమ్మాసమ్బుద్ధేన అఙ్గుత్తరనికాయే ఏకకనిపాతే ఏతదగ్గవగ్గే ఆగతేసు ఏకచత్తాలీసాయ మహాథేరేసు ఆయస్మా ఉపాలిత్థేరో పఠమమహాసంగీతికాలే వినయవిస్సజ్జకభూతో కథం ఏతదగ్గట్ఠానే ఠపితో.

విస్సజ్జనా – ఆయస్మా భన్తే ఉపాలిత్థేరో పఠమమహాసంగీతికాలే వినయవిస్సజ్జకభూతో ‘‘ఏతదగ్గం భిక్ఖవే మమ సావకానం భిక్ఖూనం వినయధరానం యదిదం ఉపాలీ’’తి ఏవం ఖో భన్తే భగవతా ఏతదగ్గట్ఠానే ఠపితో.

వినయో వాసయో మయ్హం,

వినయో ఠానచఙ్కమం;

కప్పేమి వినయే వాసం,

వినయో మమ గోచరో.

మహాపజాపతిగోతమీథేరీవత్థు

పుచ్ఛా – ఏతదగ్గవగ్గే ఆవుసో ఆగతాసు తేరససు థేరీసు మహాపజాపతి గోతమీథేరీ కథం భగవతా ఏతదగ్గట్ఠానే ఠపితా.

విస్సజ్జనా – ఏతదగ్గవగ్గే భన్తే ఆగతాసు తేరససు థేరీసు మహాపజాపతిగోతమీథేరీ ‘‘ఏతదగ్గం భిక్ఖవే మమ సావికానం భిక్ఖునీనం రత్తఞ్ఞూనం యదిదం మహాపజాపతి గోతమీ’’తి ఏవం ఖో భన్తే భగవతా ఏతదగ్గట్ఠానే ఠపితా.

‘‘ఏతదగ్గం భిక్ఖవే మమ సావికానం భిక్ఖునీనం రత్తఞ్ఞూనం యదిదం మహాపజాపతిగోతమీ’’ –

పుచ్ఛా – ఖేమాథేరీ పన ఆవుసో అగ్గసావికా భగవతా కథం ఏతదగ్గట్ఠానే ఠపితా.

విస్సజ్జనా – ఖేమాథేరీ భన్తే పఠమా అగ్గసావికా ‘‘ఏతదగ్గం భిక్ఖవే మమ సావికానం భిక్ఖునీనం మహాపఞ్ఞానం యదిదం ఖేమా’’తి ఏవం ఖో భన్తే భగవతా ఏతదగ్గట్ఠానే ఠపితా.

‘‘యే రాగరత్తానుపతన్తి సోతం,

సయంకతం మక్కటోవ జాలం,

ఏతమ్పి ఛేత్వాన వజన్తి ధీరా;

అనపేక్ఖినో సబ్బదుక్ఖం పహాయ’’ –

‘‘ఏతదగ్గం భిక్ఖవే మమ సావికానం భిక్ఖునీనం మహాపఞ్ఞానం యదిదం ఖేమా’’ –

పుచ్ఛా – ఉప్పలవణ్ణా పన ఆవుసో థేరీ దుతియఅగ్గసావికా భగవతా కథం ఏతదగ్గట్ఠానే ఠపితా.

విస్సజ్జనా – ఉప్పలవణ్ణా భన్తే థేరీ దుతియఅగ్గసావికా ‘‘ఏతదగ్గం భిక్ఖవే మమ సావికానం భిక్ఖునీనం ఇద్ధిమన్తీనం యదిదం ఉప్పలవణ్ణా’’తి ఏవం ఖో భన్తే భగవతా ఏతదగ్గట్ఠానే ఠపితా.

‘‘ఏతదగ్గం భిక్ఖవే మమ సావికానం భిక్ఖునీనం ఇద్ధిమన్తీనం యదిదం ఉప్పలవణ్ణా’’ –

పటాచారాథేరీభిక్ఖునీమవత్థు

పుచ్ఛా – తేనావుసో భగవతా…పే… సమ్మాసమ్బుద్ధేన అఙ్గుత్తరనికాయే ఏకకనిపాతే ఏతదగ్గవగ్గే ఆగతాసు తేరససు థేరీసు పటాచారానామ థేరీ కథం ఏతదగ్గట్ఠానే ఠపితా.

విస్సజ్జనా – ఏతదగ్గవగ్గే భన్తే ఆగతాసు తేరససు థేరికాసు పటాచారా థేరీ ‘‘ఏతదగ్గం భిక్ఖవే మమ సావికానం భిక్ఖునీనం వినయధరానం యదిదం పటాచారా’’తి ఏవం ఖో భన్తే భగవతా ఏతదగ్గట్ఠానే ఠపితా.

‘‘ఉభో పుత్తా కాలఙ్కతా,

పన్థే మయ్హం పతీ మతో;

మాతాపితా చ భాతా చ,

ఏకచితకస్మిం డయ్హరే’’ –

‘‘చతూసు సముద్దేసు జలం పరిత్తకం,

తతో బహుం అస్సుజలం అనప్పకం;

దుక్ఖేన ఫుట్ఠస్స నరస్స సోచనా,

కిం కారణా అమ్మ తువం పమజ్జసి’’ –

‘‘న సన్తి పుత్తా తాణాయ,

న పితా నాపి బన్ధవా;

అన్తకేనాధిపన్నస్స,

నత్థి ఞాతీసు తాణతా;

ఏతమత్థవసం ఞత్వా, పణ్డితో సీలసంవుతో;

నిబ్బానగమనం మగ్గం, ఖిప్పమేవ విసోధయే’’ –

‘‘యో చ వస్ససతం జీవే,

అపస్సం ఉదయబ్బయం;

ఏకాహం జీవితం సేయ్యో,

పస్సతో ఉదయబ్బయం’’ –

‘‘ఏతదగ్గం భిక్ఖవే మమ సావికానం భిక్ఖునీనం వినయధరానం యదిదం పటాచారా’’ –

ధమ్మదిన్నాథేరీభిక్ఖునీమవత్థు

పుచ్ఛా – ధమ్మదిన్నా పన ఆవుసో థేరీ భగవతా కథం ఏతదగ్గట్ఠానే ఠపితా.

విస్సజ్జనా – ధమ్మదిన్నా భన్తే థేరీ ‘‘ఏతదగ్గం భిక్ఖవే మమ సావికానం భిక్ఖునీనం ధమ్మకథికానం యదిదం ధమ్మదిన్నా’’తి ఏవం ఖో భన్తే భగవతా ఏతదగ్గట్ఠానే ఠపితా.

‘‘యస్స పురే చ పచ్ఛా చ,

మజ్ఝేచ నత్థి కిఞ్చనం;

అకిఞ్చనం అనాదానం,

తమహం బ్రూమి బ్రాహ్మణం’’ –