నమో తస్స భగవతో అరహతో సమ్మాసమ్బుద్ధస్స

సుత్తన్తపిటక

సంయుత్తనికాయే

సగాథావగ్గపాళి

సంగాయనస్స పుచ్ఛా విస్సజ్జనా

పుచ్ఛా – పఠమమహాసంగీతికాలే ఆవుసో ధమ్మసంగాహకా మహాకస్సపాదయో మహాథేరవరా పోరాణసంగీతికారా పఠమం వినయపిటకం సంగాయిత్వా తదనన్తరం సుత్తన్తపిటకం సంగాయన్తా దీఘనికాయఞ్చ మజ్ఝిమనికాయఞ్చ సంగాయిత్వా తదనన్తరం కింనామ పావచనం సంగాయింసు.

విస్సజ్జనా – పఠమమహాసంగీతికాలే భన్తే ధమ్మసంగాహకా మహాకస్సపాదయో పోరాణథేరవరా పఠమం వినయపిటకం సంగాయిత్వా తదనన్తరం సుత్తన్తపిటకం సంగాయన్తా దీఘనికాయఞ్చ మజ్ఝిమనికాయఞ్చ సంగాయిత్వా తదనన్తరం సత్తహి చ సుత్తసహస్సేహి సత్తహి చ సుత్తసతేహి ద్వాసట్ఠియా చ సుత్తేహి పటిమణ్డితం భాణవారసతపరిమాణం సంయుత్తనికాయం నామ పావచనం సంగాయింసు.

పుచ్ఛా – సంయుత్తనికాయే చ ఆవుసో సగాథావగ్గో నిదానవగ్గో ఖన్ధవగ్గో సళాయతనవగ్గో మహావగ్గోతి పఞ్చసంయుత్తప్పకరణాని, తేసు పఠమం కతరం సంయుత్తప్పకరణం తే సంగాయింసు.

విస్సజ్జనా – పఞ్చసు భన్తే సంయుత్తప్పకరణేసు పఠమం సగాథావగ్గసంయుత్తప్పకరణం సంగాయింసు.

పుచ్ఛా – సగాథావగ్గేపి ఆవుసో దేవతాసంయుత్తాదివసేన ఏకాదససంయుత్తాని, తేసు పఠమం కతరం సంయుత్తం తే సంగాయింసు.

విస్సజ్జనా – ఏకాదససు భన్తే సంయుత్తేసు పఠమం దేవతాసంయుత్తం సంగాయింసు.

పుచ్ఛా – దేవతాసంయుత్తేపి ఆవుసో నళవగ్గాదయో అట్ఠ వగ్గా, ఓఘతరణసుత్తాదీని చ ఏకాసీతి సుత్తాని, తేసు పఠమం కతరం వగ్గం కతరఞ్చ సుత్తం సగాయింసు.

విస్సజ్జనా – అట్ఠసు భన్తే వగ్గేసు పఠమం నళవగ్గం ఏకాసీతియా చ సుత్తేసు పఠమం ఓఘతరణసుత్తం సంగాయింసు.

సాధు సాధు ఆవుసో, మయమ్పి దాని తతోయేవ పట్ఠాయ సంగీతిపుబ్బఙ్గమాని పుచ్ఛనవిస్సజ్జనకిచ్చాని ఆవహితుం సమారభార.

దేవతాసంయుత్త

ఓఘతరణసుత్త

పుచ్ఛా – తేనావుసో భగవతా జానతా పస్సతా అరహతా సమ్మాసమ్బుద్ధేన ఓఘతరణసుత్తం కత్థ కం ఆరబ్భ కిస్మిం వత్థుస్మిం కథఞ్చ భాసితం.

విస్సజ్జనా – సావత్థియం భన్తే అఞ్ఞతరం దేవతం ఆరబ్భ భాసితం, అఞ్ఞతరా భన్తే దేవతా అభిక్కన్తాయ రత్తియా అభిక్కన్తవణ్ణా కేవలకప్పం జేతవనం ఓభాసేత్వా యేన భగవా తేనుపసఙ్కమి, ఉపసఙ్కమిత్వా భగవన్తం అభివాదేత్వా ఏకమన్తం అట్ఠాసి, ఏకమన్తం ఠితా ఖో సా దేవతా భగవన్తం ఏతదవోచ ‘‘కథం ను త్వం మారిస ఓఘమతరీ’’తి,

తస్మిం భన్తే వత్థుస్మిం ‘‘అపతిట్ఠం ఖ్వాహం ఆవుసో అనాయూహం ఓఘమతరిం’’తి, ఏవం ఖో భన్తే భగవతా భాసితం.

అచ్చేన్తిసుత్త

పుచ్ఛా – అచ్చేన్తిసుత్తం పనావుసో భగవతా కత్థ కం ఆరబ్భ కిస్మిం వత్థుస్మిం కథఞ్చ భాసితం.

విస్సజ్జనా – సావత్థియం భన్తే అఞ్ఞతరం దేవతం ఆరబ్భ భాసితం. అఞ్ఞతరా భన్తే దేవతా భగవన్తం ఏతదవోచ–

‘‘అచ్చేన్తి కాలా తరయన్తి రత్తియో,

వయోగుణా అనుపుబ్బం జహన్తి,

ఏతం భయం మరణే పేక్ఖమానో,

పుఞ్ఞాని కయిరాథ సుఖావహానీ’’తి–

తస్మిం భన్తే వత్థుస్మిం –

‘‘అచ్చేన్తి కాలా తరయన్తి రత్తియో,

వయోగుణా అనుపుబ్బం జహన్తి,

ఏతం భయం మరణే పేక్ఖమానో,

లోకామిసం పజహే సన్తిపేక్ఖో’’తి –

ఏవం ఖో భన్తే భగవతా భాసితం.

సత్తిసుత్త

పుచ్ఛా – సత్తిసుత్తం పనావుసో భగవతా కత్థ కం ఆరబ్భ కిస్మిం వత్థుస్మిం కథఞ్చ భాసితం.

విస్సజ్జనా – సావత్థియం భన్తే అఞ్ఞతరం దేవతం ఆరబ్భ భాసితం, అఞ్ఞతరా భన్తే దేవతా భగవన్తం ఏతదవోచ–

‘‘సత్తియా వియ ఓమట్ఠో, డయ్హమానోవ మత్థకే;

కామరాగప్పహానాయ, సతో భిక్ఖు పరిబ్బజే’’తి–

తస్మిం భన్తే వత్థుస్మిం–

సత్తియా వియ ఓమట్ఠో డయ్హమానోవ మత్థకే;

సక్కాయదిట్ఠిప్పహానాయ, సతో భిక్ఖు పరిబ్బజేతి;

ఏవం ఖో భన్తే భగవతా భాసితం.

సత్తియా వియ ఓమట్ఠో, డయ్హమానోవ మత్థకే;

కామరాగప్పహానాయ, సతో భిక్ఖు పరిబ్బజే –

సత్తియా వియ ఓమట్ఠో, డయ్హమానోవ మత్థకే,

సక్కాయదిట్ఠిప్పమానాయ, సతో భిక్ఖు పరిబ్బజే –

జటాసుత్త

పుచ్ఛా – జటాసుత్తం పనావుసో భగవతా కత్థ కం ఆరబ్భ కిస్మిం వత్థుస్మిం కథఞ్చ భాసితం.

విస్సజ్జనా – సావత్థియం భన్తే అఞ్ఞతరం దేవతం ఆరబ్భ భాసితం, అఞ్ఞతరా భన్తే దేవతా భవగన్తం ఏతదవోచ–

‘‘అన్తో జటా బహిజటా, జటాయ జటితా పజా;

తం తం గోతమ పుచ్ఛామి, కో ఇమం విజటయే జట’’న్తి–

తస్మిం భన్తే వత్థుస్మిం –

సీలే పతిట్ఠాయ నరో సపఞ్ఞో, చిత్తం పఞ్ఞఞ్చ భావయం;

ఆతాపీ నిపకో భిక్ఖు, సో ఇమం విజటయే జటం.

యేసం రాగో చ దోసో చ, అవిజ్జా చ విరాజితా;

ఖీణాసవా అరహన్తో, తేసం విజటితా జటాతి;

ఏవమాదినా భన్తే భగవతా భాసితం.

సీలే పతిట్ఠాయ నరో సపఞ్ఞో, చిత్తం పఞ్ఞఞ్చ భావయం;

ఆతాపీ నిపకో భిక్ఖు, సో ఇమం విజటయే జటం–

యేసం రాగో చ దోసో చ, అవిజ్జా చ విరాజితా;

ఖీణాసవా అరహన్తో, తేసం విజటితా జటా–

యత్థ నామఞ్చ రూపఞ్చ, అసేసం ఉపరుజ్ఝతి;

పటిఘం రూపసఞ్ఞా చ, ఏత్థేసా ఛిజ్జతే జటా.

అచ్ఛరాసుత్త

పుచ్ఛా – అచ్ఛరాసుత్తం పనావుసో భగవతా కత్థ కం ఆరబ్భ కిస్మిం వత్థుస్మిం కథఞ్చ భాసితం.

విస్సజ్జనా – సావత్థియం భన్తే అఞ్ఞతరం దేవపుత్తం ఆరబ్భ భాసితం. అఞ్ఞతరో భన్తే దేవపుత్తో భగవన్తం ఏతదవోచ–

‘‘అచ్ఛరాగణసఙ్ఘట్ఠం, పిసాచ గణసేవితం;

వనన్తం మోహనం నామ, కథం యాత్రా భవిస్సతీ’’తి.

తస్మిం భన్తే వత్థుస్మిం–

‘‘ఉజుకో నామ సో మగ్గో, అభయా నామ సా దిసా,

రథో అకూజనో నామ, ధమ్మచక్కేహి సంయుతో.

హిరీ తస్స అపాలమ్బో, సత్యస్స పరివారణం;

ధమ్మాహం సారథిం బ్రూమి, సమ్మాదిట్ఠి పురేజవం.

యస్స ఏతాదిసం యానం, ఇత్థియా పురిసస్స వా;

స వే ఏతేన యానేన, నిబ్బానస్సేవ సన్తికే’’తి.

ఏవం ఖో భన్తే భగవతా భాసితం.

అచ్ఛరాగణసఙ్ఘుట్ఠం, పిసాచగణసేవితం;

వనన్తం మోహనం నామ, కథం యాత్రా భవిస్సతి–

జరాసుత్త

పుచ్ఛా – జరాసుత్తం పనావుసో భగవతా కత్థ కం ఆరబ్భ కిస్మిం వత్థుస్మిం కథఞ్చ భాసితం.

విస్సజ్జనా – సావత్థియం భన్తే అఞ్ఞతరం దేవతం ఆరబ్భ భాసితం. అఞ్ఞతరా భన్తే దేవతా భగవన్తం ఏతదవోచ–

‘‘కిం సు యావ జరా సాధు, కిం సు సాధు పతిట్ఠితం;

కిం సు నరానం రతనం, కిం సు చోరేహి దూహర’’న్తి.

తస్మిం భన్తే వత్థుస్మిం–

‘‘సీలం యావ జరా సాధు, సద్ధా సాధు పతిట్ఠితా;

పఞ్ఞా నరానం రతనం, పుఞ్ఞం చోరేహి దూహర’’న్తి.

ఏవం ఖో భన్తే భగవతా భాసితం.

కిం సు యావ జరా సాధు.

కిం సు సాధు పతిట్ఠితం.

కిం సు నరానం రతనం.

కిం సు చోరేహి దూహరం.

దేవపుత్తసంయుత్త

సుబ్రహ్మసుత్త

పుచ్ఛా – తేనావుసో భగవతా జానతా పస్సతా అరహతా సమ్మాసమ్బుద్ధేన సుబ్రహ్మసుత్తం కత్థ కం ఆరబ్భ కిస్మిం వత్థుస్మిం కతఞ్చ భాసితం. కీదిసో చ తత్థ ధమ్మపటిగ్గాహకస్స ధమ్మస్సవనానిసంసో అధిగతో.

విస్సజ్జనా – రాజగహే భన్తే సుబ్రహ్మదేవపుత్తం ఆరబ్భ భాసితం. సుబ్రహ్మా భన్తే దేవపుత్తో మరణభయభీతో భగవన్తం ఉపసఙ్కమిత్వా ఏతదవోచ–

‘‘నిచ్చం ఉత్రస్తమిదం చిత్తం, నిచ్చం ఉబ్బిగ్గమిదం మనో;

అనుప్పన్నేసు కిచ్ఛేసు, అథో ఉప్పతితేసు చ;

సచే అత్థి అనుత్రస్తం, తం మే అక్ఖాహి పుచ్ఛితో’’తి–

తస్మిం భన్తే వత్థుస్మిం.

‘‘నాఞ్ఞత్ర బోజ్జా తపసా, నాఞ్ఞత్రిన్ద్రియసంవరా;

నాఞ్ఞత్ర సబ్బనిస్సగ్గా, సోత్థిం పస్సామి పాణిన’’న్తి.

ఏవం ఖో భన్తే భగవతా భాసితం. దేసనాపరియోసానే చ భన్తే సుబ్రహ్మస్స దేవపుత్తస్స తస్మింయేవ ఆసనే విరజం వీతమలం ధమ్మచక్ఖుం ఉదపాది, ‘‘యంకిఞ్చి సముదయధమ్మం, సబ్బం తం నిరోధధమ్మ’’న్తి.

నిచ్చం ఉత్రస్తమిదం చిత్తం, నిచ్చం ఉబ్బిగ్గమిదం మనో;

అనుప్పన్నేసు కిచ్ఛేసు, అథో ఉప్పతితేసు చ;

సచే అత్థి అనుత్రస్త, తం మే అక్ఖాహి పుచ్ఛితో-హు–

నాఞ్ఞత్ర బోజ్జా తపసా, నాఞ్ఞత్రిన్ద్రియసంవరా;

నాఞ్ఞత్ర సబ్బనిస్సగ్గా, సోత్థిం పస్సామి పాణినం–

రోహితస్ససుత్త

పుచ్ఛా – రోహితస్ససుత్తం పనావుసో భగవతా కత్థ కం ఆరబ్భ కిస్మిం వత్థుస్మిం కథఞ్చ భాసితం.

విస్సజ్జనా – సావత్థియం భన్తే రోహితస్సం దేవపుత్తం ఆరబ్భ భాసితం. రోహితస్సో భన్తే దేవపుత్తో భగవన్తం ఏతదవోచ ‘‘యత్థ ను ఖో భన్తే న జాయతి న జీయతి న మీయతి న చవతి న ఉపపజ్జతి, సక్కా ను ఖో సో భన్తే గమనేన లోకస్స అన్తో ఞాతుం వా దట్ఠుం వా పాపుణితుం వా’’తి. తస్మిం భన్తే వత్థుస్మిం ‘‘యత్థ ఖో ఆవుసో న జాయతి న జీయతి న మీయతి న చవతి న ఉపపజ్జతి, నాహం తం గమనేన లోకస్స అన్తం ఞాతేయ్యం అట్ఠేయ్యం పత్తేయ్యన్తి వదామీ’’తి ఏవమాదినా భన్తే భగవతా భాసితం.

కోసలసంయుత్త

దహరసుత్త

పుచ్ఛా – దహరసుత్తం పనావుసో భగవతా కత్థ కం ఆరబ్భ కిస్మిం వత్థుస్మిం కథఞ్చ భాసితం.

విస్సజ్జనా – సావత్థియం భన్తే రాజానం పసేనదిం కోసలం ఆరబ్భ భాసితం. రాజా భన్తే పసేనది కోసలో యేన భగవా తేనుపసఙ్కమి, ఉపసఙ్కమిత్వా భగవతా సద్ధిం సమ్మోది, ఏకమన్తం నిసిన్నో ఖో భన్తే రాజా పసేనది కోసలో భగవన్తం ఏతదవోచ ‘‘భవమ్పి నో గోతమో ‘అనుత్తరం సమ్మాసమ్బోధిం అభిసమ్బుద్ధో’తి పటిజానాతీ’’తి. తస్మిం భన్తే వత్థుస్మిం ‘‘యఞ్హి తం మహారాజ సమ్మా వదమానోవదేయ్య ‘అనుత్తరం సమ్మాసమ్బోధిం అభిసమ్బుద్ధో’తి, మమేవ తం సమ్మా వదమానో వదేయ్యా’’తి ఏవమాదినా భన్తే భగవతా భాసితం.

తస్మా హి పణ్డితో పోసో, సమ్పస్సం అత్థమత్తనో;

భుజఙ్గమం పావకఞ్చ, ఖత్తియఞ్చ యసస్సినం;

భిక్ఖుఞ్చ సీలసమ్పన్నం, సమ్మదేవ సమాచరే–

అత్తరక్ఖితసుత్త

పుచ్ఛా – అత్తరక్ఖితసుత్తం పనావుసో భగవతా కత్థ కం ఆరబ్భ కిస్మిం వత్థుస్మిం కథఞ్చ భాసితం.

విస్సజ్జనా – సావత్థియం భన్తే రాజానంయేవ పసేనదిం కోసలం ఆరబ్భ భాసితం. రాజా భన్తే పసేనది కోసలో భగవన్తం ఉపసఙ్కమిత్వా ‘‘ఇధ మయ్హం భన్తే రహోగతస్స పటిసల్లీనస్స ఏవం చేతసో పరివితక్కో ఉదపాదీ’’తి ఏవమాదికం వచనం అవోచ. భగవా చ భన్తే ఏవమేతం మహారాజ ఏవమేతం మహారాజాతి ఏవమాదినా విభజిత్వా భాసితం.

కాయేన సంవరో సాధు, సాధు వాచాయ సంవరో;

మనసా సంవరో సాధు, సాధు, సబ్బత్థ సంవరో;

సబ్బత్థ సంవుతో లజ్జీ, రక్ఖితోతి పవుచ్చతి.

అప్పకసుత్త

పుచ్ఛా – అప్పకసుత్తం పనావుసో భగవతా కత్థ కం ఆరబ్భ కిస్మిం వత్థుస్మిం కథఞ్చ భాసితం.

విస్సజ్జనా – సావత్థియం భన్తే రాజానంయేవ పసేనదిం కోసలం ఆరబ్భ భాసితం. రాజా భన్తే పసేనది కోసలో భగవన్తం ఉపసఙ్కమిత్వా ‘‘ఇధ మయ్హం భన్తే రహోగతస్స పటిసల్లీనస్స ఏవం చేతసో పరివితక్కో ఉదపాది అప్పకా తే సత్తా లోకస్మిం, యే ఉళారే ఉళారే భోగే లభిత్వా న చేవ మజ్జన్తి న చ పమజ్జన్తి, న చ కామేసు గేధం ఆపజ్జన్తీ’’తి ఏవమాదికం వచనం అవోచ. భగవా చ భన్తే ‘‘ఏవమేతం మహారాజ ఏవమేతం మహారాజా’’తి ఏవమాదినా అప్పకసుత్తం భాసితం.

మల్లికాసుత్త

పుచ్ఛా – మల్లికాసుత్తం పనావుసో భగవతా కత్థ కం ఆరబ్భ కిస్మిం వత్థుస్మిం కథఞ్చ భాసితం.

విస్సజ్జనా – సావత్థియం భన్తే రాజానంయేవ పసేనదిం కోసలం ఆరబ్భ భాసితం. రాజా భన్తే పసేనది కోసలో మల్లికం దేవిం ఏతదవోచ ‘‘అత్థి ను ఖో తే మల్లికే కోచఞ్ఞో అత్తనా పియతరో’’తి. తస్మిం వత్థుస్మిం సబ్బాదిసా అనుపరిగమ్మ చేతసాతి ఏవమాదినా భన్తే భగవతా భాసితం.

సబ్బా దిసా అనుపరిగమ్మ చేతసా, నేవజ్ఝగా పియతరమత్తనా క్వచి. ఏవం పియో పుథు అత్తా పరేసం, తస్మా న హింసే పరమత్తకామో–

సత్తజటిలసుత్త

పుచ్ఛా – తేనావుసో భగవతా…పే… సమ్మాసమ్బుద్ధేన సత్తజటిలసుత్తం కత్థ కం ఆరబ్భ కిస్మిం వత్థుస్మిం కథఞ్చ భాసితం.

విస్సజ్జనా – సావత్థియం భన్తే రాజానం పసేనదిం కోసలం ఆరబ్భ భాసితం. రాజా భన్తే పసేనది కోసలో అచిరపక్కన్తేసు సత్తసు చ జటిలేసు సత్తసు చ నిగణ్ఠేసు సత్తసు చ అచేలకేసు సత్తసు చ ఏకసాటకేసు సత్తసు చ పరిబ్బాజకేసు యేన భగవా తేనుపసఙ్కమి, ఉపసఙ్కమిత్వా భగవన్తం అభివాదేత్వా ఏకమన్తం నిసీది, ఏకమన్తం నిసిన్నో ఖో భన్తే రాజా పసేనది కోసలో భగవన్తం ఏతదవోచ ‘‘యే తే భన్తే లోకే అరహన్తో వా అరహత్తమగ్గం వా సమాపన్నా, ఏతే తేసం అఞ్ఞతరా’’తి. తస్మిం భన్తే వత్థుస్మిం ‘‘దుజ్జానం ఖో ఏతం మహారాజ తయా గిహినా కామభోగినా పుత్తసమ్బాధసయనం అజ్ఝావసన్తేన కాసిణచన్దనం పచ్చనుభోన్తేన మాలాగన్ధవిలేపనం ధారయన్తేన జాతరూపరజతం సాదియన్తేన ‘‘ఇమే వా అరహన్తో, ఇమే వా అరహత్తమగ్గం సమాపన్నా’’తి ఏవమాదినా భన్తే భగవతా భాసితం.

న వణ్ణరూపేన నరో సుజానో, న విస్ససే ఇత్తరదస్సనేన;

సుసఞ్ఞతానఞ్హి వియఞ్జనేన, అసఞ్ఞతా లోకమిమం చరన్తి.

పతిరూపకో మత్తికాకుణ్డలోవ, లోహడ్ఢమాసోవ సువణ్ణఛన్నో;

చరన్తి లోకే పరివారఛన్నా, అన్తో అసుద్ధా బహిసోభమానా-హూ

పఞ్చరాజసుత్త

పుచ్ఛా – పఞ్చరాజసుత్తం పనావుసో భగవతా కత్థ కం ఆరబ్భ కిస్మిం వత్థుస్మిం కథఞ్చ భాసితం.

విస్సజ్జనా – సావత్థియం భన్తే రాజానంయేవ పసేనదిం కోసలం ఆరబ్భ భాసితం. రాజా భన్తే పసేనది కోసలో భగవన్తం ఏతదవోచ ‘‘కిం ను ఖో భన్తే కామానం అగ్గ’’న్తి. తస్మిం భన్తే వత్థుస్మిం ‘‘మనాపపరియన్తం ఖ్వాహం మహారాజ పఞ్చసు కామగుణేసు అగ్గన్తి వదామీ’’తి ఏవమాదినా భన్తే భగవతా భాసితం.

ఇధ భన్తే అమ్హాకం పఞ్చన్నం రాజూనం పఞ్చహి కామగుణేహి సమప్పితానం సమఙ్గీభూతానం పరిచారయమానానం అయమన్తరాకథా ఉదపాదిం ‘కిం ను ఖో కామానం అగ్గ’న్తి–

పదుమం యథా కోకనదం సుగన్ధం, పాతో సియా ఫుల్లమవీతగన్ధం. అఙ్గీరసం పస్స విరోచమానం, తపన్తమాదిచ్చమివన్తలిక్ఖే–

దుతియఅపుత్తకసుత్త

పుచ్ఛా – దుతియఅపుత్తకసుత్తం పనావుసో భగవతా కత్థ కం ఆరబ్భ కిస్మిం వత్థుస్మిం కథఞ్చ భాసితం.

విస్సజ్జనా – సావత్థియం భన్తే రాజానంయేవ పసేనదిం కోసలం ఆరబ్భ భాసితం. రాజా భన్తే పసేనది కోసలో భగవన్తం ఉపసఙ్కమిత్వా ‘‘ఇధ భన్తే సావత్థియం సేట్ఠి గహపతి కాలఙ్కతో, తమహం అపుత్తకం సాపతేయ్యం రాజన్తేపురం అతిహరిత్వా ఆగచ్ఛామీ’’తి ఏవమాదికం వచనం అవోచ. భగవా చ భన్తే ‘‘ఏవమేతం మహారాజ, ఏవమేతం మహారాజ, భూతపుబ్బం సో మహారాజ సేట్ఠి గహపతి తగ్గరసిఖిం నామ పచ్చేకసమ్బుద్ధం పిణ్డపాతేన పటిపాదేసీ’’తి ఏవమాదినా తస్స సేట్ఠిస్స గహపతిస్స అతీతం వత్థుం ఆహరిత్వా పరియోసానే చతూహి గాథాహి భాసితం.

ధఞ్ఞం ధనం రజతం జాతరూపం, పరిగ్గహం వాపి యదత్థి కిఞ్చి,

దాసా కమ్మకరా పేస్సా, యే చస్స అనుజీవినో.

సబ్బం నాదాయ గన్తబ్బం, సబ్బం నిక్ఖిప్పగామినం;

యఞ్చ కరోతి కాయేన, వాచాయ ఉదచేతసా.

తఞ్హి తస్స సకం హోతి, తంవ ఆదాయ గచ్ఛతి;

తంవస్స అనుగం హోతి, ఛాయావ అనపాయినీ.