సోతాపత్తిసంయుత్త

చక్కవత్తిరాజసుత్త

పుచ్ఛా – సోతాపత్తిసంయుత్తే ఆవుసో పోరాణకేహి ధమ్మసంగాహకమహాథేరేహి పఠమం సంగీతం చక్కవత్తిరాజసుత్తం భగవతా కత్థ కం ఆరబ్భ కథఞ్చ భాసితం.

విస్సజ్జనా – సావత్థియం భన్తే సమ్బహులే భిక్ఖూ ఆరబ్భ ‘‘కిఞ్చాపి భిక్ఖవే రాజా చక్కవత్తీ చతున్నం దీపానం ఇస్సరియాధిపచ్చం రజ్జం కారేత్వా కాయస్స భేదా పరం మరణా సుగతిం సగ్గం లోకం ఉపపజ్జతి దేవానం తావతింసానం సహబ్యతం, సో తత్థ నన్దనే వనే అచ్ఛరాసఙ్ఘపరివుతో దిబ్బేహి చ పఞ్చహి కామగుణేహి సమప్పితో సమఙ్గీభూతో పరిచారేతి సో చతూహి ధమ్మేహి అసమన్నాగతో, అథ ఖో సో అపరిముత్తోవ నిరయా, అపరిముత్తో తిరచ్ఛానయోనియా, అపరిముత్తో పేత్తివిసయా, అపరిముత్తో అపాయదుగ్గతివినిపాతా’’తి ఏవమాదినా భన్తే భగవతా భాసితం.

దీఘావు ఉపాసకసుత్త

పుచ్ఛా – తత్థేవ ఆవుసో పోరాణకేహి ధమ్మసంగాహకమహాథేరేహి తతియం సంగీతం దీఘావుఉపాసకసుత్తం భగవతా కత్థ కం ఆరబ్భ కిస్మిం వత్థుస్మిం కథఞ్చ భాసితం.

విస్సజ్జనా – రాజగహే భన్తే దీఘావుం ఉపాసకం ఆరబ్భ భాసితం. భగవా భన్తే దీఘావుం ఉపాసకం ఆబాధికం దుక్ఖితం బాళ్హగిలానం ఏతదవోచ ‘‘కచ్చి తే దీఘావు ఖమనీయం, కచ్చి యాపనీయం, కచ్చి దుక్ఖా వేదనా పటిక్కమన్తి నో అభిక్కమన్తి, పటిక్కమోసానం పఞ్ఞాయతి నో అభిక్కమో’’తి. న మే భన్తే ఖమనీయం, న యాపనీయం బాళ్హా మే దుక్ఖా వేదనా అభిక్కమన్తి నో పటిక్కమన్తి, అభిక్కమోసానం పఞ్ఞాయతి నో పటిక్కమోతి. తస్మిం భన్తే వత్థుస్మిం ‘‘తస్మాతిహ తే దీఘావు ఏవం సిక్ఖితబ్బం బుద్ధే అవేచ్చప్పసాదేన సమన్నాగతో భవిస్సామీ’’తి ఏవమాదినా భగవతా భాసితం.

యానిమాని భన్తే భగవతా చత్తారి సోతాపత్తియఙ్గాని దేసితాని, సంవిజ్జన్తే తే ధమ్మా మయి–

తస్మాతిహ త్వం దీఘావు ఇమేసు చతూసు సోతాపత్తియఙ్గేసు పతిట్ఠాయ ఛ విజ్జాభాగియే ధమ్మే ఉత్తరి భావేయ్యాసి–

మా త్వం తాత దీఘావు ఏవం మనసాకాసి.

ఇఙ్ఘ త్వం తాత దీఘావు యదేవ తే భగవా ఆహ, తదేవ త్వం సాధుకం మనసికరోహి.

పణ్డితో భిక్ఖవే దీఘావు ఉపాసకో.

పచ్చపాది ధమ్మస్సానుధమ్మం.

న చ మం ధమ్మాధికరణం విహేఠేసి.

దీఘావు భిక్ఖవే ఉపాసకో పఞ్చన్నం ఓరమ్భాగియానం సంయోజనానం పరిక్ఖయా ఓపపాతికో తత్థ పరినిబ్బాయీ అనావత్తిధమ్మో తస్మా లోకా.

వేళుద్వారేయ్యసుత్త

పుచ్ఛా – తేనావుసో భగవతా…పే… సమ్మాసమ్బుద్ధేన సోతాపత్తిసంయుత్తే సత్తమం సంగీతం వేళుద్వారేయ్యసుత్తం కత్థ కం ఆరబ్భ కిస్మిం వత్థుస్మిం కథఞ్చ భాసితం.

విస్సజ్జనా – కోసలేసు భన్తే వేళుద్వారే నామ కోసలానం బ్రాహ్మణ గామే వేళుద్వారేయ్యకే బ్రాహ్మణగహపతికే ఆరబ్భ భాసితం.

వేళుద్వారేయ్యకా భన్తే బ్రాహ్మణగహపతికా భగవన్తం ఏతదవోచుం ‘‘మయం భో గోతమ ఏవంకామా ఏవంఛన్దా ఏవంఅధిప్పాయా పుత్తసమ్బాధసయనం అజ్ఝావసేయ్యామ…పే… జాతరూపరజతం సాదియేయ్యామ, కాయస్స భేదా పరం మరణా సుగతిం సగ్గం లోకం ఉపపజ్జేయ్యామ, తేసం నో భవం గోతమో అమ్హాకం ఏవంకామానం ఏవంఛన్దానం ఏవంఅధిప్పాయానం తథా దమ్మం దేసేతు, యథా మయం పుత్తసమ్బాధసయనం అజ్ఝావసేయ్యామ…పే… కాయస్స భేదా పరం మరణా సుగతిం సగ్గం లోకం ఉపపజ్జేయ్యామా’’తి. తస్మిం భన్తే వత్థుస్మిం ‘‘అత్తూపనాయికం వో గహపతయో ధమ్మపరియాయం దేసేస్సామి, తం సుణాథ సాధుకం మనసి కరోథ, భాసిస్సామీ’’తి ఏవమాదినా భగవతా భాసితం.