ఆనాపానసంయుత్త

మహాకప్పినసుత్త

పుచ్ఛా – ఆనాపానసంయుత్తే ఆవుసో పోరాణకేహి ధమ్మసంగాహకమహాథేరేహి సత్తమం సంగీతం మహాకప్పినసుత్తం భగవతా కత్థ కం ఆరబ్భ కథఞ్చ భాసితం.

విస్సజ్జనా – సావత్థియం భన్తే సమ్బహులే భిక్ఖూ ఆరబ్భ ‘‘పస్సథ నో తుమ్హే భిక్ఖవే ఏతస్స భిక్ఖునో కాయస్స ఇఞ్జితత్తం వా ఫన్దితబ్బం వా’’తి ఏవమాదినా భగవతా భాసితం.

ఇచ్ఛానఙ్గలసుత్త

పుచ్ఛా – తత్థేవ ఆవుసో దుతియవగ్గే పఠమం ఇచ్ఛానఙ్గలసుత్తం భగవతా కత్థ కం ఆరబ్భ కథఞ్చ భాసితం.

విస్సజ్జనా – ఇచ్ఛానఙ్గలే భన్తే సమ్బహులే భిక్ఖూ ఆరబ్భ ‘‘సచే ఖో భిక్ఖవే అఞ్ఞతిత్థియా పరిబ్బాజకా ఏవం పుచ్ఛేయ్యుం ‘కతమే నావుసో విహారేన సమణో గోతమో వస్సావాసం బహులం విహాసీ’తి. ఏవం పుట్ఠా తుమ్హే భిక్ఖవే తేసం అఞ్ఞతిత్థియానం పరిబ్బాజకానం ఏవం బ్యాకరేయ్యాథ ఆనాపానస్సతిసమాధినా ఖో ఆవుసో భగవా వస్సావాసం బహులం విహాసీ’’తి ఏవమాదినా భన్తే భగవతా భాసితం.