భిక్ఖునీసంయుత్త

ఆళవికాసుత్త

పుచ్ఛా – ఇదాని ఆవుసో భిక్ఖునీ సంయుత్తం పుచ్ఛామి, యం తస్స భగవతో అరహతో సమ్మాసమ్బుద్ధస్స సావికాహి థేరీహి అత్తనో

చ బుద్ధసాసనస్స చ యథాభూతం గుణం పకాసేత్వా భాసితం. తత్థావుసో పఠమం పోరాణకేహి మహాకస్సపాదీహి ధమ్మసంగాహకేహి థేరవరేహి సంగీతం ఆళవికాసుత్తం కత్థ కం ఆరబ్భ కిస్మిం వత్థుస్మిం కేన కథఞ్చ భాసితం.

విస్సజ్జనా – సావత్థియం భన్తే మారం పాపిమన్తం ఆరబ్భ ఆళవికాయ భిక్ఖునియా భాసితం. మారో భన్తే పాపిమా ఆళవికాయ భిక్ఖునియా భయం ఛమ్భితత్తం లోమహంసం ఉప్పాదేతుకామో వివేకమ్హా చావేతుకామో ఆళవికం భిక్ఖునిం గాథాయ అజ్ఝభాసి–

‘‘నత్థి నిస్సరణం లోకే, కిం వివేకేన కాహసి;

భుఞ్జస్స కామరతియో, మాహు పచ్ఛానుతాపినీ’’తి.

తస్మిం భన్తే వత్థుస్మిం–

‘‘అత్థి నిస్సరణం లోకే, పఞ్ఞాయ మే సుఫుస్సితం;

పమత్తబన్ధు పాపిమ, న త్వం జానాసి తం పదం;

సత్తిసూలూపమా కామా, ఖన్ధాసం అధికుట్టనా;

యం త్వం కామరతిం బ్రూసి, అరహి మయ్హ సా అహూ’’తి.

ఏవం ఖో భన్తే ఆళవికాయ భిక్ఖునియా భాసితం.

నత్థి నిస్సరణం లోకే, కిం వివేకేన కాహసి;

భుఞ్జస్సు కామరతియో, మాహు పచ్ఛానుతాపినీ-హు–

అత్థి నిస్సరణం లోకే, పఞ్ఞాయ మే సుఫుస్సితం;

పమత్తబన్ధు పాపిమ, న త్వం జానాసి తం పదం.

సత్తిసూలూపమా కామా, ఖన్ధాసం అధికుట్టనా;

యం త్వం కామరతిం బ్రూసి, అరతి మయ్హ సా అహు–

సోమాసుత్త

పుచ్ఛా – సోమాసుత్తం పనావుసో కత్థ కం ఆరబ్భ కిస్మిం వత్థుస్మిం కేన కథఞ్చ భాసితం.

విస్సజ్జనా – సావత్థియంయేవ భన్తే అన్ధవనే మారం పాపిమన్తం ఆరబ్భ సోమాయ భిక్ఖునియా భాసితం. మారో భన్తే పాపిమా సోమాయ భిక్ఖునియా భయం ఛమ్భితత్తం లోమహంసం ఉప్పాదేతుకామో సమాధిమ్హా చావేతుకామో సోమం భిక్ఖునిం గాథాయ అజ్ఝభాసి.

‘‘యం తం ఇసీహి పత్తబ్బం, ఠానం దురభిసమ్భవం;

న తం ద్వఙ్గులపఞ్ఞాయ, సక్కా పప్పోతుమిత్థియా’’తి.

తస్మిం భన్తే వత్థుస్మిం–

‘‘ఇత్థిభావో కిం కయిరా, చిత్తమ్హి సుసమాహితే;

ఞాణమ్హి వత్తమానమ్హి, సమ్మా ధమ్మం విపస్సతో;

యస్స నూన సియా ఏవం, ఇత్థాహం పురిసోతి వా;

కిఞ్చి వా పన అఞ్ఞస్మి, తం మారో వత్తుమరహతీ’’తి.

ఏవం ఖో భన్తే సోమాయ భిక్ఖునియా అరియసావికాయ భాసితం.

యం తం ఇసీహి పత్తబ్బం, ఠానం దురభిసమ్భవం;

న తం ద్వఙ్గులపఞ్ఞాయ, సక్కా పప్పోతుమిత్థియా–

ఇత్థి భావో కిం కయిరా, చిత్తమ్హి సుసమాహితే;

ఞాణమ్హి వత్త మానమ్హి, సమ్మా ధమ్మం విపస్సతో.

యస్స నూన సియా ఏవం, ఇత్థాహం పురిసోతి వా;

కిఞ్చి వా పన అఞ్ఞస్మి, తం మారో వత్తుమరహతి.

కిసాగోతమీసుత్త

పుచ్ఛా – తత్థావుసో కిసాగోతమీసుత్తం కత్థ కం ఆరబ్భ కిస్మిం వత్థుస్మిం కేన కథఞ్చ భాసితం.

విస్సజ్జనా – సావత్థియంయేవ భన్తే అన్ధవనే మారం పాపిమన్తం ఆరబ్భ కిసాగోతమియా భిక్ఖునియా థేరియా భాసితం. మారో భన్తే పాపిమా కిసాగోతమియా భిక్ఖునియా భయం ఛమ్భితత్తం లోమహంసం ఉప్పాదేతుకామో సమాధిమ్హా చావేతుకామో కిసాగోతమిం భిక్ఖునిం గాథాయ అజ్ఝభాసి–

‘‘కిం ను త్వం మతపుత్తావ, ఏకమాసి రుదమ్ముఖీ;

వనమజ్ఝగతా ఏకా, పురిసం ను గవేససీ’’తి.

తస్మిం భన్తే వత్థుస్మిం–

అచ్చన్తం మతపుత్తామ్హి, పురిసా ఏకదన్తికా;

న సోచామి న రోదామి, న తం భాయామి ఆవుసో.

సబ్బత్థ విహతా నన్దీ, తమోక్ఖన్ధో పదాలితో;

జేత్వాన మచ్చునో సేనం, విహరామి అనాసవా’’తి.

ఏవం ఖో భన్తే కిసాగోతమియా భిక్ఖునియా భాసితం.

కిం ను త్వం మతపుత్తావ, ఏకమాసి రుదమ్ముఖీ;

వనమజ్ఝగతా ఏకా, పురిసం ను గసేససి-హు–

అచ్చన్తం మతపుత్తామ్హి, పురిసా ఏతదన్తికా;

న సోచామి న రోదామి, న తం భాయామి ఆవుసో.

సబ్బత్థ విహతా నన్దీ, తమోక్ఖన్ధో పదాలితో;

జేత్వాన మచ్చునో సేనం, విహరామి అనాసవా.

ఉప్పలవణ్ణాసుత్త

పుచ్ఛా – తత్థావుసో పోరాణేహి సంగీతికారమహాథేరవరేహి సంగీతం ఉప్పలవణ్ణసుత్తం కత్థ కం ఆరబ్భ కిస్మిం వత్థుస్మిం కేన కథఞ్చ భాసితం.

విస్సజ్జనా – సావత్థియంయేవ భన్తే అన్ధవనే మారం పాపిమన్తం ఆరబ్భ ఉప్పలవణ్ణాయ భిక్ఖునియా భాసితం. మారో భన్తే పాపిమా ఉప్పలవణ్ణాయ భిక్ఖునియా భయం ఛమ్భితత్తం లోమహంసం ఉప్పాదేతుకామో సమాధిమ్హా చావేతుకామో ఉప్పలవణ్ణం భిక్ఖునిం గాథాయ అజ్ఝభాసి–

‘‘సుపుప్ఫితగ్గం ఉపగమ్మ భిక్ఖుని, ఏకా తువం తిట్ఠసి సాలమూలే. న చత్థి తే దుతియా వణ్ణధాతు, బాలే న త్వం భాయసి ధుత్తకాన’’న్తి.

తస్మిం భన్తే వత్థుస్మిం–

‘‘సతం సహస్సానిపి ధుత్తకానం,

ఇధాగతా తాదిసకా భవేయ్యుం;

లోమం న ఇఞ్జామి న సన్తసామి,

న మార భాయామి తమేకికాపి.

ఏసా అన్తరధాయామి, కుచ్ఛిం వా పవిసామి తే;

పఖుమన్తరికాయమ్పి, తిట్ఠన్తిం మం న దక్ఖసి.

చిత్తస్మిం వసీభూతామ్హి, ఇద్ధిపాదా సుభావితా;

సబ్బబన్ధనముత్తామ్హి, న తం భాయామి ఆవుసో’’తి.

ఏవం ఖో భన్తే ఉప్పలవణ్ణాయ భిక్ఖునియా భాసితం.

చాలాసుత్త

పుచ్ఛా – తత్థావుసో చాలాసుత్తం కత్థ కం ఆరబ్భ కిస్మిం వత్థుస్మిం కేన కథఞ్చ భాసితం.

విస్సజ్జనా – సావత్థియం భన్తే అన్ధవనే మారంయేవ పాపిమన్తం ఆరబ్భ చాలాయ భిక్ఖునియా అరియసావికాయ భాసితం. మారో భన్తే పాపిమా చాలం భిక్ఖునిం ఉపసఙ్కమిత్వా ఏతదవోచ ‘‘కిం ను త్వం భిక్ఖుని న రోచేసీ’’తి. జాతిం ఖ్వాహం ఆవుసో న రోచేమీ’’తి.

కిం ను జాతిం న రోచేసి, జాతో కామాని భుఞ్జతి;

కో ను తం ఇదమాదపయి, జాతిం మా రోచ భిక్ఖునీతి.

తస్మిం భన్తే వత్థుస్మిం–

జాతస్స మరణం హోతి, జాతో దుక్ఖాని ఫుస్సతి;

బన్ధం వధం పరిక్లేసం, తస్మా జాతిం న రోచయే.

బుద్ధో ధమ్మమదేసేసి, జాతియా సమతిక్కమం;

సబ్బదుక్ఖప్పహానాయ, సో మం సచ్చే నివేసయి.

యే చ రూపూపగా సత్తా, యే చ అరూపట్ఠాయినో;

నిరోధం అప్పజానన్తా, ఆగన్తారో పునబ్భవన్తి.

ఏవం ఖో భన్తే చాలాయ భిక్ఖునియా భాసితం.

కిం ను జాతిం న రోచేసి, జాతో కామాని భుఞ్జతి;

కో ను తం ఇదమాదపయి, జాతిం మా రోచ భిక్ఖునీ.

జాతస్స మరణం హోతి, జాతో దుక్ఖాని ఫుస్సతి;

బన్ధం వధం పరిక్లేసం, తస్మా జాతిం న రోచయే.

బుద్ధో ధమ్మమదేసేసి, జాతియా సమతిక్కమం,

సబ్బదుక్ఖప్పహానాయ, సో మం సచ్చే నివేసయి.

సేలాసుత్త

పుచ్ఛా – తత్థావుసో సేలాసుత్తం కత్థ కం ఆరబ్భ కిస్మిం వత్థుస్మిం కేన కథఞ్చ భాసితం.

విస్సజ్జనా – సావత్థియం భన్తే మారంయేవ పాపిమన్తం ఆరబ్బ్భ సేలాయ భిక్ఖునియా అరియసావికాయ భాసితం. మారో భన్తే పాపిమా సేలాయ భిక్ఖునియా భయం ఛమ్భితత్తం లోమహంసం ఉప్పాదేతుకామో సమాధిమ్హా చావేతుకామో సేలం భిక్ఖునిం గాథాయ అజ్ఝభాసి–

కేనిదం పకతం బిమ్బం, క్వను బిమ్బస్స కారకో;

క్వను బిమ్బం సముప్పన్నం, క్వను బిమ్బం నిరుజ్ఝతీతి.

తస్మిం భన్తే వత్థుస్మిం–

నయిదం అత్తకతం బిమ్బం, నయిదం పరకతం అఘం;

హేతుం పటిచ్చ సమ్భూతం, హేతుభఙ్గా నిరుజ్ఝతీతి.

ఏవమాదినా భన్తే సేలాయ భిక్ఖునియా భాసితం.

కేనిదం పకతం బిమ్బం, క్వను బిమ్బస్స కారకో;

క్వను బిమ్బం సముప్పన్నం, క్వను బిమ్బం నిరుజ్ఝతి-హు–

నయిదం అత్తకతం బిమ్బం, నయిదం పరకతం అఘం;

హేతుం పటిచ్చ సమ్భూతం, హేతుభఙ్గా నిరుజ్ఝతి.

వజిరాసుత్త

పుచ్ఛా – తత్థావుసో పోరాణకేహి మహాకస్సపాదీహి ధమ్మసంగాహకథేరవరేహి సంగీతం వజిరాసుత్తం కత్థ కం ఆరబ్భ కేన కథఞ్చ భాసితం.

విస్సజ్జనా – సావత్థియం భన్తే మారం పాపిమన్తం ఆరబ్భ వజిరాయ థేరియా భిక్ఖునియా భాసితం. మారో భన్తే పాపిమా పురిమనయేనేవ వజిరం భిక్ఖునిం గాథాయ అజ్ఝభాసి–

కేనాయం పకతో సత్తో, కువం సత్తస్స కారకో,

కువం సత్తో సముప్పన్నో, కువం సత్తో నిరుజ్ఝతీతి.

తస్మిం భన్తే వత్థుస్మిం–

కిం ను సత్తోతి పచ్చేసి, మారదిట్ఠిగతం ను తే;

సుద్ధసఙ్ఖారపుఞ్జోయం, నయిధ సత్తుపలబ్భతి.

యథా హి అఙ్గసమ్భారా, హోతి సద్దో రథో ఇతి;

ఏవం ఖన్ధేసు సన్తేసు, హోతి సత్తోతి సమ్ముతి.

దుక్ఖమేవ హి సమ్భోతి, దుక్ఖం తిట్ఠతి వేతి చ,

నాఞ్ఞత్ర దుక్ఖా సమ్భోతి, నాఞ్ఞం దుక్ఖా నిరుజ్ఝతీతి.

ఏవం ఖో భన్తే వజిరాయ భిక్ఖునియా భాసితం.

కేనాయం పకతో సత్తో, కువం సత్తస్సకారకో;

కువం సత్తో సముప్పన్నో, కువం సత్తో నిరుజ్ఝతి-హు–

కిం ను సత్తోతి పచ్చేసి, మార దిట్ఠిగతం ను తే;

సుద్ధసఙ్ఖారపుఞ్జోయం, నయిధ సత్తుపలబ్భతి.