౬౧. తుం తాయే తవే భావే భవిస్సతి క్రియాయం తదత్థాయం

భవిస్సతిఅత్థే వత్తమానతో క్రియత్థా భావే తుమాదయో హోన్తి క్రియాయం తదత్థాయం పతీయమానాయం. కరణాయ గచ్ఛతి కాతుం గచ్ఛతి. ‘‘తుంతునతబ్బేసు వా’’తి కరస్స వా ఆ హోతి, పుబ్బరూపే కత్తాయే. ‘‘కరస్సా తవే’’తి నిచ్చం ఆ, కాతవే. నిపాతత్తా ‘‘అసఙ్ఖ్యేహి సబ్బాసం’’తి చతుత్థీసస్స లోపో. ఏవ+ముపరి తునాదీసు. కత్తుం కామేతీతి కత్తుకామో, అభిసఙ్ఖరితు+మాకఙ్ఖతి. సద్ధమ్మం సుణితుం, ఞిమ్హి నాగమే తస్స ణో, నాగమత్తా న వుద్ధి. సోతవే సోతుం సుణితుం వా పత్థేహి. ఏవం అనుభవితుం, పచితుం. గన్తుం, ‘‘మనానం నిగ్గహీతం’’తి నిగ్గహీతం. గమితుం, ఖన్తుం, ఖనితుం, హన్తుం, హనితుం, మన్తుం, మనితుం, హరితుం, అనుస్సరితుం ఇచ్ఛతి. తథా తుదితుం, పవిసితుం, ఉద్దిసితుం, భోత్తుం, సయితుం, నేతుం, జుహోతుం, పజహితుం, పహాతుం, దాతుం, రోద్ధుం, రున్ధితుం, భోత్తుం, భుఞ్జీతుం, ఛేత్తుం, ఛిన్దితుం, సిబ్బితుం, ఊమ్హి వస్స బో, ద్విత్తం, బుద్ధుం, తస్స ధో. బుజ్ఝితుం, యుక. జానితుం ఞా=అవబోధనే. జనితుం. జేతుం జినితుం. పత్తుం పాపుణితుం. కేతుం కిణితుం. వినిచ్ఛేతుం, ఇస్స ఏ, వినిచ్ఛినితుం. గహేతుం గణ్హితుం. చోరితుం చోరేతుం చోరయితుం, పాలేతుం పాలయితుం. పయోజకే-భావేతుం భావయితుం, కారేతుం కారయితుం కారాపేతుం కారాపయితుం ఇచ్ఛతి+చ్చాది.

ఏవం క్రియత్థక్రియాయం గమ్యమానాయం, యథా సుబోద్ధుం వక్ఖామి, ఏవం దట్ఠుం గచ్ఛతి, గన్తు+మారభతి, గన్తుం పయోజేతి, దస్సేతు+మాహ ఇచ్చాది.

అరహసక్కాదీసుపి సిద్ధం, తథా కాల సమయవేలాసు. కో తం నిన్దితు+మరహతి, రాజా భవితు+మరహతి, అరహో భవం వత్తుం, సక్కా జేతుం ధనేన వా, సక్కా లద్ధుం, భస్స ధో. కత్తుం సక్ఖిస్సతి. భబ్బో నియామం ఓక్కమితుం, అభబ్బో కాతుం. అనుచ్ఛవికో భవం దానం పటిగ్గహేతుం, ఇదం కాతుం అనురూపం, దానం దాతుం యుత్తం, దాతుం వత్తుఞ్చ లభతి. ఏవం వట్టతి భాసితుం, ఛిన్దితుం న చ కప్పతి ఇచ్చాది. తథాకాలో భుఞ్జితుం, సమయో భుఞ్జితుం, వేలా భుఞ్జితుం.

అలమత్థేపి సిద్ధం, అలమేవ దానాని దాతుం, అలమేవ పుఞ్ఞాని కాతుం.