౬౦. ఆహారత్థా

అజ్ఝోహారత్థా ఆధారే క్తో హోతి యథాపత్తఞ్చ. భుత్తవన్తో+స్మిన్తి భుత్తం. ఏవం పీతం, ‘‘గాపాన+మీ’’తి ఈ. భుఞ్జనం భుత్తం పానం పీతం. భుఞ్జీయిత్థాతి భుత్తో ఓదనో. ఏవం పీతం ఉదకం. అకత్తత్థం భిన్నయోగకరణం. బహులాధికారా కత్తరిపి ‘‘అపివింసూతి పీతా గావో’’తి హోతేవ. సిద=పాకే, పస్సిజ్జీతి పస్సన్నో, ‘‘గమనత్థ’’ దినా క్తో, ‘‘భిదా’’ దినా తస్స నో పరరూపఞ్చ. అమఞ్ఞిత్థాతి మతో. ఇచ్ఛీయిత్థాతి ఇట్ఠో. అబుజ్ఝితాతి బుద్ధో, ‘‘ధో ధహభేహీ’’తి తస్స ధో. పూజీయిత్థాతి పూజితో, చురాదిత్తా ణి. ఏవం సీలీయిత్థాతి సీలితో. రక్ఖీయిత్థాతి రక్ఖితో. ఖమీయిత్థాతి ఖన్తో, మస్స నిగ్గహీతం. అక్కోచ్ఛీయిత్థాతి అక్కుట్ఠో, ఆస్స రస్సో. రుస=రోసే, అరోసీతి రుట్ఠో, ‘‘గమనత్థా’’ దినా కత్తరి క్తో. ఞిమ్హి రుసితో. హర=హరణే, అభి+ వి+ఆపుబ్బో, అభిబ్యాహరీయిత్థాతి అభిబ్యాహటో. దయ=దానగతిహింసాదానేసు, అదయీయిత్థాతి దయితో. హస=ఆలిక్యే, అహసీతి హట్ఠో. కామీయిత్థాతి కన్తో, ‘‘ణిణాపీనం తేసూ’’తి ఏత్థ ‘‘ణిణాపీనం’’తి యోగవిభాగా చురాదిణిలోపో. సంయమీతి సంయతో. నఞపుబ్బో, న మరీతి అమతో, నఞసమాసే నస్స టో.

కట్ఠం దుక్ఖం ఆపన్నోతి ఫలభూతే దుక్ఖే కట్ఠసద్దస్స వత్తనతో ఫలస్స భావిత్తా భూతేయేవ క్తో. కస=గతిహింసావిలేఖనేసు, అకసి=హింసీతి కట్ఠం.