౫౮. ఠా+స వస సిలిస సీ రుహ జర జనీహి

ఠాదీహి కత్తరి క్తో హోతి యథాపత్తఞ్చ. ఉపట్ఠాసీతి ఉపట్ఠీతో భవం గురుం. ఉపట్ఠీయిత్థాతి ఉపట్ఠితో గురు భోతా, ‘‘ఠాస్సీ’’తి ఠాస్స ఇ. ఏవం ఉపాసీతి ఉపాసితో. ఉపాసీయిత్థాతి ఉపాసితో. ‘‘ఞి బ్యఞ్జనస్సా’’తి ఞి. అనువుసి అనువుసీయిత్థాతి వా అనువుసీతో. ‘‘అస్సూ’’తి అస్స ఉకారో. ఆపుబ్బో సిలిస=ఆలిఙ్గనే, ఆసిలేసి ఆసిలేసీయిత్థాతి వా ఆసిలిట్ఠో. ‘‘సానన్తరస్స తస్స ఠో’’తి ఠే పరరూపం పఠమక్ఖరఞ్చ. అధిసయి అధిసీయిత్థాతి వా అధిసయితో ఖటోపికం భవం, అధిసయితా ఖటోపికా భోతా. ఏవం ఆరుహి ఆరుహీయిత్థాతి వా ఆరుళ్హో రుక్ఖం భవం, ఆరుళ్హో రుక్ఖో భోతా, ‘‘రుహాదీహి హో ళ చా’’తి తస్స హకారో పుబ్బహకారస్స చ ళో. అనుజీరి అనుజీరీయిత్థాతి వా అనుజిణ్ణో వసలిం భవం, అనుజిణ్ణా వసలీ భోతా, ‘‘తరాదీహి రిణ్ణో’’తి క్తస్స రిణ్ణాదేసో ‘‘రానుబన్ధే’’త్యాదినా అరభాగస్స లోపో చ. అన్వజాయి అన్వజాయిత్థాతి వా అనుజాతో మాణవకో మాణవికం, అనుజాతా మాణవికా మాణవకేన, ‘‘జనిస్సా’’తి నస్స ఆ.