౫౩. సీలా+భిక్ఖఞ్ఞా+వస్సకేసు ణీ

క్రియత్థా ణీ హోతి సీలాదీసు. సంస=పసంసనే, పియపుబ్బో, పియం పసంసతి సీలేనాతి పియపసంసీ రాజా. అథ వా పియం పసంసతి సీలేన వా ధమ్మేన వా తస్మిం సాధు వాతి పియపసంసీ, పియపసంసనీ, పియపసంసి కులం, ఆవుద్ధిమ్హి తథా సచ్చవాదీ, ధమ్మవాదీ. సీఘయాయీతి ‘‘అస్సా+ణాపిమ్హీ యుక’’ ఇతి యుక. పాపకారీ, మాలకారీ ఇచ్చాది. ఉణ్హం భుఞ్జతి సీలేనాతి ఉణ్హభోజీ, ‘‘లహుస్సుపన్తస్సా’’తి ఓకారో.

ఆభిక్ఖఞ్ఞే-పునప్పున ఖీరం పివతీతి ఖీరపాయీ, యుక. అవస్సం కరోతీతి అవస్సకారీ. ‘‘స్యాది స్యాదినే+కత్థం’’తి సమాసే విభత్తిలోపే చ కతే ‘‘లోపో’’తి నిగ్గహీతలోపో. సతన్దాయీతి ఏత్థ బహులంవిధానా విభత్తిఅలోపే అమాదిసమాసపటిసేధే చ కతే వగ్గన్తం.

అఞ్ఞస్మిం అత్థేపి ‘‘ణీ’’తి యోగవిభాగేన సిద్ధం. సాధుకారీ, బ్రహ్మచారీ, అస్సద్ధభోజీ. పణ్డితం అత్తానం మఞ్ఞతీతి పణ్డితమానీ, బహుస్సుతధారీ ఇచ్చాది.

సాధుకరణం సాధుకారో, సో అస్స అత్థీతి సాధుకారీతి ఘణన్తా ఈ.