౫,౨౧. దివాదీహి యక

దివాదీహి కత్తరి లవిసయే యక హోతి. కకారో కానుబన్ధకారియత్థో, ఏవ+ముపరి చ. వస్స బకారే పుబ్బరూపం, సో జుతం దిబ్బతి, దిబ్బన్తి ఇచ్చాది. కమ్మే-క్యే తేన దిబ్బతి, దిబ్బన్తి ఇచ్చాది. దిబ్బిస్సతి, తేన దిబ్బిస్సతి. అదిబ్బి దిబ్బి. తేన అదిబ్బి దిబ్బి. అదిబ్బిస్స. తేన అదిబ్బిస్స. దిబ్బే దిబ్బేయ్య. తేన దిబ్బే దిబ్బేయ్య. దిబ్బతు. తేన దిబ్బతు ఇచ్చాది.

సివ=తన్తుసన్తానే, సిబ్బతి, సిబ్బన్తి ఇచ్చాది. పద=గమనే, ఉపుబ్బో, చవగ్గపుబ్బరూపాని, ఉప్పజ్జతి, ఉప్పజ్జరే ఉప్పజ్జన్తి ఇచ్చాది. కమ్మేక్యే తేన పటిపజ్జతే ఇచ్చాది. భావే-ఉప్పజ్జతే తయా. బుధ=అవగమనే, ఝకారపుబ్బరూపాని యక్ఖరేసు. ధమ్మం బుజ్ఝతి, బుజ్ఝరే బుజ్ఝన్తి ఇచ్చాది. కమ్మే-మయా ధమ్మో బుజ్ఝతే ఇచ్చాది. యుధ=సమ్పహారే, యుజ్ఝతి+చ్చాది. నహ=బన్ధనే, ‘‘హస్స విపల్లాసో’’తి యే విపల్లాసో, సన్నయ్హతి+చ్చాది. మన=ఞాణే, ఞ్ఞకార+పుబ్బరూపాని, మఞ్ఞతి+చ్చాది. తుస=తుట్ఠిమ్హి, పుబ్బరూపే తుస్సతి+చ్చాది. సమ=ఉపసమే, సమ్మతి+చ్చాది.

జన=జననే, ‘‘జనిస్సా’’తి ఆ హోతి కానుబన్ధే బహులాధికారా, సో జాయతి, జాయన్తి+చ్చాది. కమ్మే-జనితుం పయోజేతీతి ‘‘పయోజకబ్యాపారే ణాపి చే’’తి ణిమ్హి ‘‘అఞ్ఞత్రాపీ’’తి వుద్ధిపటిసేధే క్యమ్హి ‘‘దీఘో సరస్సా’’తి దీఘే చ కతే తేన జనీయతి, జనీయన్తి ఇచ్చాది. సో జాయిస్సతి. తేన జనిస్సతి. సో అజాయి, తేన అజనీయి. సో అజాయిస్స, తేన అజనీయిస్స. సో జాయే జాయేయ్య, తేన జనీయేయ్య. సో జాయతు, తేన జనీయతు ఇచ్చాది. (దివాదినయో).

తుద=బ్యథనే,