౨౨. దాస్స దం వా మిమేస్వ+ద్విత్తే

అద్విత్తే వత్తమానస్స దాస్స దం హోతి వా మిమేసు. వగ్గన్తం, దమ్మి దేమి, దమ్మ దేమ. ఈకారే దీయతి ఇచ్చాది. అనాగతత్థే ఇఞాగమే సరణోపాది, దదిస్సతి, దదిస్సన్తి. దజ్జిస్సతి, దజ్జిస్సన్తి. లవికరణే దస్సతి, దస్సన్తి. అజ్జతనే-అదది, అదదింసు, అదజ్జి, అదజ్జింసు, అదాసి, అదంసు. అనజ్జతనే-అదదా, అదదు. కాలాతిపత్తియం-అదదిస్స అదజ్జిస్స, లే అదస్స, దస్సంసు. ఏయ్యాదిమ్హి-దదే దదేయ్య దజ్జే దజ్జేయ్య. ‘‘టా’’తి బహులాధికారా దజ్జాదేసా పరస్స ఏయ్యస్స టా, దజ్జా, దజ్జుం దజ్జేయ్యం దదేయ్యుం. త్వాదీసు-దదాతు, దదన్తు, దజ్జతు, దజ్జన్తు, లస్సే+కారే దేతు, దేన్తు ఇచ్చాది. సబ్బత్థ కమ్మేపి యోజనీయం.

ధా=ధారణే, త్యాదిమ్హి చగ్గహణేన ద్విత్తే పుబ్బాకారస్స రస్సత్తే లలోపే ‘‘చతుత్థదుతియానం తతియపఠమా’’తి పుబ్బధకారస్స దకారే చ కతే దధాతి, దధన్తి. పిపుబ్బో, ‘‘తదమినా’’ దినా ఆస్స లోపో, ‘‘ధాస్స హో’’తి ద్విత్తే పరస్స ధాస్స హకారో, ద్వారం పిదహతి, పిదహన్తి. లస్సే+కారే నిధేతి, నిధేన్తి. కమ్మే-విధీయతి, విధీయన్తి ఇచ్చాది. ధస్సతి, పిదహిస్సతి, పరిదహేస్సతి. అధాసి, పిదహి. అధస్స, పిదహిస్స. దధే దధేయ్య, పిదహే పిదహేయ్య. దదాతు, పిదహతు, నిధేతు, నిధేన్తు ఇచ్చాది. (జుహోత్యాదయో).

భూవాది చ జుహాది చ, హువాదిధాతవో చి+మే;

సవుద్ధికభూవాదీహి, తిధా భేదం ఉపేన్తి తే.

(భూవాదినయో.)

అధునా వికరణపభేదపకాసనత్థం రుధాదీనం అట్ఠగణానం కానిచి రూపాని ఉదాహరియన్తే –

రుధ=ఆవరణే, త్యాదయో హోన్తి. ఏవ+ముపరిపి సబ్బగణేసు.