౫,౧౧౩. యజస్స యస్స టి+యీతి

యజస్స యస్స టి+యీ హోన్తి కానుబన్ధేతి బహులాధికారా త్యాదివిసయేపి క్యే పుబ్బరూపే చ ఇజ్జతి యిజ్జతి మయా బుద్ధో. సో యజిస్సతి, తేన ఇజ్జిస్సతే యిజ్జిస్సతే. సో యజీ, తేన ఇజ్జి యిజ్జి. సో యజిస్సా, తేన ఇజ్జిస్సా యిజ్జిస్సా. సో యజేయ్య, తేన ఇజ్జేయ్య యిజ్జేయ్య. సో యజతు, తేన ఇజ్జతు యిజ్జతు ఇచ్చాది.

వద=వచనే, ‘‘గమవదా’’ దినా వదస్స వజ్జాదేసో వా, లస్స ‘‘ఊలస్సే’’తి క్వచి ఏ చ, వజ్జతి వదేతి వదతి, వజ్జేన్తి వదేన్తి ఇచ్చాది. కమ్మే – ‘‘క్యస్సా’’తి ఈఞ, వజ్జీయతి వజ్జతి వదీయతి, వజ్జీయన్తి వజ్జన్తి వదీయన్తి. వదిస్సతి, వదిస్సన్తి. అవదీ వదీ, అవదింసు వదింసు. అవదిస్స వదిస్స. వజ్జే వజ్జేయ్య వదే వదేయ్య, వజ్జేయ్యుం వదేయ్యుం. వజ్జేతు వదేతు వదతు ఇచ్చాది యథాగమం ఞేయ్యం.

కము=పదవిక్ఖేపే, ‘‘పరోక్ఖాయఞ్చా’’తి చగ్గహణేన కమ కమ ఇతి ద్విత్తే అనాదిబ్యఞ్జనలోపే లవికరణే ‘‘కవగ్గహా’’ దినా కస్స చే నిగ్గహీతాగమే చ కతే చంకమతి కమతి ఇచ్చాది. చల=కమ్పనే, చంచలతి. జల+దల=దిత్తియం, ద్విత్తే దద్దల్లతి ఇచ్చాది. (సవుద్ధికభూవాదినయో).

హూ+భూ=సత్తాయం, త్యాదీసు ‘‘కత్తరి లో’’తి లో, తస్స లోపే ‘‘యువణ్ణాన+మేఓ పచ్చయే’’తి ఓకారో. సో హోతి, తే హోన్తి. హోసి, హోథ. హోమి, హోమ ఇచ్చాది. భావే-తేన హూయతి హూయతే.