౭. య్యోదో వా+తిపత్తియం స్సా స్సంసు స్సే స్సథ స్సం స్సమ్హా స్సథ స్సింసుస్ససేస్సవ్హేస్సిం స్సామ్హసే.

ఏయ్యాదో విసయే క్రియాతిపత్తియం స్సాదయో హోన్తి. విధురపచ్చయోపనిపాతతో కారణవేకల్లతో వా క్రియాతిపతన+మనిప్ఫత్తి క్రియాతిపత్తి. ఏతే చ స్సాదయో సామత్థియా అతీతానాగతేస్వేవ హోన్తి, న వత్తమానే, తత్ర క్రియాతిపత్యసమ్భవా. ఇఞాగమే స్సాస్స వా రస్సే చ సచే సో పఠమవయే పబ్బజ్జం అలభిస్స, అరహా అభవిస్స భవిస్స అభవిస్సా భవిస్సా వా, తే చ తం అలభిస్సంసు, అరహన్తో అభవిస్సంసు భవిస్సంసు. ‘‘ఏయ్యాథా’’దినా స్సేస్స వా అకారే త్వం అభవిస్స భవిస్సే. తుమ్హే అభవిస్సథ. అహం అభవిస్సం. రస్సే మయం అభవిస్సమ్హ భవిస్సమ్హ అభవిస్సమ్హా భవిస్సమ్హా. పరచ్ఛక్కే-సో అభవిస్సథ, అభవిస్సింసు. అభవిస్ససే, అభవిస్సవ్హే. అభవిస్సిం, అభవిస్సామ్హసే.

కమ్మే-తేన సుఖం అన్వభవిస్స, అన్వభవిస్సంసు క్యలోపో. అన్వభూయిస్స అన్వభూయిస్సా ఇచ్చాది. భావే-తేన అభూయిస్స భూయిస్స అభూయిస్సా భూయిస్సా. అభూయిస్సథ భూయిస్సథ.

ఏవం తణ్డులాదిసాధనం అలభిస్స, ఓదనం అపచిస్స పచిస్స ఇచ్చాది. కమ్మే-తేన ఓదనో అపచిస్స పచిస్స అపచిస్సా పచిస్సా అపచీయిస్స పచీయిస్స అపచీయిస్సా పచీయిస్సా అపచ్చిస్స పచ్చిస్స అపచ్చిస్సా పచ్చిస్సా ఇచ్చాది.

సో అగచ్ఛిస్స గచ్ఛిస్స అగచ్ఛిస్సా గచ్ఛిస్సా ఇచ్చాది. చ్ఛాదేసా+భావే అగమిస్స గమిస్స అగమిస్సా గమిస్సా ఇచ్చాది. కమ్మే-అగచ్ఛిస్స గచ్ఛిస్స అగచ్ఛీయిస్స ఇచ్చాది. అగమిస్స గమిస్స అగమీయిస్స ఇచ్చాది. తథా అఘమ్మిస్స ఇచ్చాది. (క్రియాతిపత్తిపచ్చయనయో).