౧౪. పుబ్బపరచ్ఛక్కాన+మేకానేకేసు తుమ్హా+మ్హ+సేసేసు ద్వే ద్వే మజ్ఝిము+త్తమ+పఠమా

ఏకానేకేసు తుమ్హఅమ్హసద్దవచనీయేసు తదఞ్ఞసద్దవచనీయేసు చ కారకేసు పుబ్బచ్ఛక్కానం పరచ్ఛక్కానఞ్చ మజ్ఝిము+త్తమ+పఠమా ద్వే ద్వే హోన్తి యథాక్కమం. తత్థతి అన్తీతి పఠమపురిసో, ఆదో నిద్దిట్ఠత్తా. సి థ ఇతి మజ్ఝిమపురిసో, మజ్ఝే నిద్దిట్ఠత్తా. మి మ ఇతి ఉత్తమపురిసో. ఉత్తమసద్దో+యం సభావతో తిపభుతీన+మన్త+మాహ. పరచ్ఛక్కేపి తే అన్తేతిఆదినా ఏవం యోజేతబ్బం. ఏవం సేసేసు భవిస్సతిఆదీసు సత్తసు పచ్చయవిధానసుత్తేసుపి యోజేతబ్బం.

ఇదాని భూవాదీన+మట్ఠగణానం భూవాదిగణేసు భూ=సత్తాయ+మితి పఠమధాతుతో పరా త్యాదయో యోజీయన్తే. తత్థ ‘‘ఏకమ్హి వత్తబ్బే ఏకవచనం’’తి త్యాదీసు పరభూతేసు కత్తు+కమ్మ+భావేసుయేవ క్యవికరణలవికరణా హోన్తీతి ‘‘క్యో భావకమ్మేస్వ+పరోక్ఖేసు మాన+న్త+త్యాదీసు’’ ‘‘కత్తరి లో’’ ఇచ్చాదినా తేసం వికరణానం విధానా త్యాదయో కత్తు+కమ్మ+భావేస్వేవ విఞ్ఞాయన్తీతి కత్తరి తిమ్హిలో. కే తే వికరణా –

పుబ్బాపరభాగట్ఠానా, భిన్నధాతువిభత్తియో;

నిస్సాయ పచ్చయా హోన్తి, ఏతే వికరణా సియుం.