౨౯. గమిస్సా

ఆఆదో ఈఆదో చ గమిస్స ఆ హోతి వా. సో అగా అగమి గమి అగమిత్థో గమిత్థో అగమత్థో గమత్థో. ఈపచ్చయే లస్సాకారస్స ‘‘హిమిమేస్వ+స్సా’’తి ఏత్థ ‘‘అస్సా’’తి యోగవిభాగా దీఘే ‘‘దీఘా ఈస్సా’’తి ఈస్స సిఆదేసో, అగమాసి అగమి గమి అగమీ గమీ, అగమింసు గమింసు అగమంసు గమంసు అగముం గముం. ఓస్స అఆదేసే అజ్ఝగుం. త్వం అజ్ఝగా పరస్స లోపో. తుమ్హే అజ్ఝగుత్థ. అహం అజ్ఝగం, మయం అజ్ఝగమ్హ. పరచ్ఛక్కే – ‘‘ఏయ్యాథా’’దినా త్థే సో అగచ్ఛిత్థ గచ్ఛిత్థ అగఞ్ఛిత్థ గఞ్ఛిత్థ అగమిత్థ గమిత్థ అగమ గమ అగమా గమా. తే అగమూ గమూ, ఓస్స ఆఆదేసే అజ్ఝగుం. త్వం అగమిసే గమిసే. తుమ్హే అగమివ్హం. ‘‘ఏయ్యాథా’’ దినా అ+మాదేసే అహం అగమం గమం అజ్ఝగం. మయం అగమిమ్హే గమిమ్హే. కమ్మేఅగచ్ఛీయి అగమీయి, అగచ్ఛియుం అగమియుం ఇచ్చాది. తథా అఘమ్మీ ఘమ్మీ ఇచ్చాది.