౮౦. దణ్డాదిత్వి+క+ఈ వాతి

ఇక+ఈ హోన్తి వా మన్తత్థే. బహులంవిధానా కుతోచిసద్దతో ద్వే హోన్తి, కుతో చే+కమేకంవ. నిచ్చయుత్తో దణ్డో అస్స అత్థీతి దణ్డికో దణ్డీ. గన్ధికో గన్ధీ. వాత్వేవ, దణ్డవా.

‘‘ఉత్తమిణేవ ధనా ఇకో’’తి గణసుత్తేన ఇకో ధనికో. అఞ్ఞో ధనీ ధనవా.

‘‘అసన్నిహితే అత్థా’’ అసన్నిహితో అత్థో అస్స అత్థీతి అత్థికో అత్థీ. సన్నిహితే అత్థవా. ‘‘తదన్తా చ’’ పుఞ్ఞత్థో అస్స అత్థీతి పుఞ్ఞత్థికో పుఞ్ఞత్థీ.

‘‘వణ్ణన్తా ఈయేవ’’. బ్రహ్మవణ్ణం అస్స అత్థీతి బ్రహ్మవణ్ణీ, దేవవణ్ణీ.

‘‘హత్థదన్తేహి జాతియం’’. హత్థ+మస్స అత్థీతి హత్థీ, దన్తీ. అఞ్ఞత్ర హత్థవా దన్తవా.

‘‘వణ్ణతో బ్రహ్మచారిమ్హి’’. వణ్ణో అస్స అత్థీతి వణ్ణికో బ్రహ్మచారీ.

‘‘పోక్ఖరాదితో దేసే’’. పోక్ఖరం జలం పదుమం వా అస్స అత్థీతి పోక్ఖరీ, ‘‘యువణ్ణేహి నీ’’తి నీమ్హి ‘‘ఘరణ్యాదయో’’తి ఈస్స అత్తం, నస్స ణో చ, పోక్ఖరణీ, ఉప్పలినీ, కుముదినీ, భిసినీ, ములాలినీ, సాలుకినీ.

‘‘క్వచా+దేసేపి’’. పదుమ+మస్స అత్థీతి పదుమీ పదుమినీ పదుమినీపణ్ణం. దేసతో+ఞ్ఞత్ర పోక్ఖరవా హత్థీ.

‘‘నావాయి+కో’’ నావికో. సిఖీ, బాలీ, సీలీ, బలీ.

‘‘సుఖదుక్ఖా ఈ’’. సుఖీ దుక్ఖీ. ‘‘బలా బాహూరుపుబ్బా చ’’. బాహుబలీ, ఊరుబలీ.