౨. వచ్ఛాదితో ణాన+ణాయనా

వచ్ఛాదీహి అపచ్చపచ్చయన్తేహి గోత్తాదీహి చ సద్దేహి ణాన+ణాయనపచ్చయా వా హోన్తి అపచ్చే. వచ్ఛానో, వచ్ఛాయనో, ‘‘సంయోగే క్వచీ’’తి న వుద్ధి. కతిస్సా+పచ్చం కచ్చో, ‘‘ణ్య దిచ్చాదీహీ’’తి ణ్యో, ‘‘లోపో+వణ్ణి+వణ్ణానం’’తి అకారలోపే చవగ్గపుబ్బరూపాని. కచ్చస్సా+పచ్చం కచ్చానో, కచ్చాయనో, యాగమే కాతియానో. ముగ్గస్సా+పచ్చం=నత్తాదీతి వాక్యే వుద్ధి+ఇకారలోప+పుబ్బరూపాని. మోగ్గల్లస్సా+పచ్చంతి పునణాన+ణాయనా హోన్తి, మోగ్గల్లానో మోగ్గల్లాయనో. ఇమే చత్తారో అపచ్చపచ్చయన్తా. గోత్తాదితో యథాసకటస్సా+పచ్చం నత్తాదీహి సకటానో సకటాయనో. కణ్హస్సా+పచ్చం నత్తాది కణ్హానో కణ్హాయనో. ఏవం అగ్గివేస్సానో అగ్గివేస్సాయనో, ముఞ్జానో ముఞ్జాయనో, కుఞ్జానో కుఞ్జాయనో. సబ్బత్థ సంయోగత్తా న వుద్ధి. ఆకతిగణో+యం.