౧౨౭. కోసజ్జా+జ్జవ+పారిసజ్జ+సోహజ్జ+మద్దవా+రిస్సా+సభా+జఞ్ఞ+థేయ్య+ బాహుసచ్చా

ఏతే సద్దా నిపచ్చన్తే ణానుబన్ధే. కుసీతస్స భావోతి భావే ణ్యో హోతి, ఇమినా ఈస్స అకారే చ తస్స జే చ కతే యస్స పుబ్బరూపం, కోసజ్జం. ఉజునో భావే అజ్జవంతి ణో, ఇమినా ఉస్స అత్తం, ‘‘ఉవణ్ణస్సా+వఙ సరే’’తి అవఙఆదేసే జస్స ద్విత్తం. పరిసాసు సాధూతి వాక్యే ‘‘ణ్యో తత్థ సాధూ’’తి ణ్యో, ఇమినా జాగమో చ, ‘‘బ్యఞ్జనే దీఘరస్సా’’తి ఆస్స రస్సే చ కతే జస్స పుబ్బరూపం, పారిసజ్జో. ఇమినా కమేన వాక్యేనేవ సద్దసిద్ధి వేదితబ్బా. సుహదయోవ సుహజ్జో, తస్స భావో సోహజ్జం, ఇమినా అయలోపో. ముదునో భావో మద్దవం, ఇమినా ఉస్స అత్తం. ఇసినో ఇదం భావో వా ఆరిస్సం, ణ్యపచ్చయే ఇమినా ఆరఞాగమే ‘‘లోపో+వణ్ణి+వణ్ణానం’’తి అన్తఇకారలోపో చ. ఉసభస్స ఇదం భావో వా ఆసభం, ఇమినా ఉస్స ఆ. ఆజానీయస్స భావో ఆజఞ్ఞం, ఇమినా యలోపే ‘‘లోపో+వణ్ణి+వణ్ణానం’’తి ఈకారలోపో. థేనస్స భావో థేయ్యం, ఇమినా నస్స యకారో. బహుస్సుతస్స భావో బాహుసచ్చం, ఇమినా ఉస్స అకారో సంయోగాదిలోపో. (భావతద్ధితం).