౩౫. ఛట్ఠీ చా+నాదరే

యస్స భావో భావన్తరస్స లక్ఖణం భవతి, తతో ఛట్ఠీ హోతి సత్తమీ చా+నాదరే గమ్యమానే. అకామకానం మాతాపితూనం రుదన్తానం పబ్బజి, మాతాపితూసు రుదన్తేసు వా. ‘‘ఆకోటయన్తో సో నేతి, సివిరాజస్స పేక్ఖతే’’, ‘‘మచ్చు ఆదాయ గచ్ఛతి, పేక్ఖమానే మహాజనే’’.

గున్నం సామీతి సమ్బన్ధే ఛట్ఠీ, గోసు సామీతి విసయసత్తమీ. ఏవం గున్నమిస్సరో, గోస్వి+స్సరో, గున్నం అధిపతి, గోసు అధిపతి, గున్నం దాయాదో, గోసు దాయాదో, గున్నం సక్ఖీ, గోసు సక్ఖీ, గున్నం పతిభూ, గోసు పతిభూ, గున్నం పసుతో, గోసు పసుతో, కుసలా నచ్చగీతస్స, కుసలా నచ్చగీతే, ఆయుత్తో కటకరణస్స, ఆయుత్తో కటకరణే. తథా ఆధారవచనిచ్ఛాయం సత్తమీ, భిక్ఖూసు అభివాదేన్తి, ముద్ధని చుమ్బిత్వా, బాహాసు గహేత్వా, హత్థేసు పిణ్డాయ చరన్తి, కదలీసు గజే రక్ఖన్తి, ఞాణస్మిం పసన్నో, ఞాణస్మిం ఉస్సుక్కోతి విసయసత్తమీ.