౩౨. సత్తమ్యా+ధారే

కత్తుకమ్మట్ఠానం నిసజ్జ+పచనాదిక్రియానం యో ఆధారో, తం ఆధారకారకం నామ. కథం కటే నిసీదతి దేవదత్తో, థాలియం ఓదనం పచతి, దేవదత్త+తణ్డులానం కత్తు+కమ్మానం ధారణతో తదట్ఠఆసన+పచనక్రియం కట+థాలియో ధారేన్తి నామ, తస్మిం సత్తమీవిభత్తి హోతి.

సో బ్యాపికో, ఓపసిలేసికో, వేసయికో, సామీపికోతి చతుబ్బిధో. తత్థ యో ఆధేయ్యస్స నిస్సేసాధారభూతో, సో బ్యాపికో, యథా తిలేసు తేలం అత్థి, ఖీరేసు జలం, దధిమ్హి సప్పి. పచ్చేకసిద్ధానం భావానం యం ఆధేయ్యభావేన ఉపసిలేసనం అల్లీయనం అత్థి, సో ఓపసిలేసికో. యథా ఆసనే నిసిన్నో సఙ్ఘో, థాలియం ఓదనం పచతి, ఘటే ఉదక+మత్థి, దూరే ఠితో, సమీపే ఠితో. యత్థ సమీపే సమీపీవోహారం కత్వా తదాయత్తతాదీపనత్థం ఆధారభావో ఉపచరీయతి, తం సామీపికం, యథా గఙ్గాయం ఘోసో, గఙ్గాయ సమీపే వజోత్యత్థో. సావత్థియం విహరతి జేతవనే. యత్థ అఞ్ఞథాభావవసేన దేసన్తరావచ్ఛేదవసేన వా ఆధారపరికప్పో, సో వేసయితో. యథా ఆకాసే సకుణా చరన్తి, భూమియం మనుస్సా, జలే మచ్ఛా, పాసాదేసు పతితో, పాపస్మిం రమతీ మనో, పసన్నో బుద్ధసాసనే, పఞ్ఞాయ సాధు, వినయే నిపుణో, మాతరి సాధు, పితరి నిపుణో.

కిరియా కత్తు+కమ్మట్ఠా, ఆధారీయతి యేన సో;

ఆధారో చతుధా వుత్తో, బ్యాపకాదిప్పభేదతో.

బ్యాపకో తిలఖీరాది, కటో ఓపసిలేసికో;

సామీపికో తు గఙ్గాది, ఆకాసో విసయో మతో.