౧౬. కత్తుకరణేసు తతియా

కత్తరి కరణే చ కారకే తతియా హోతి. జినేన దేసితో ధమ్మో, బుద్ధేన జితో మారో, అహినా దట్ఠో నరో. యత్థ కారణకారణమ్పి కారణవసేన వుచ్చతి, తత్థాపి తతియా, చోరేహి గామో దడ్ఢో, తిణేహి భత్తం సిద్ధం, సద్ధేహి కారితా విహారా.

అత్తపధానో కిరియం, యో నిబ్బత్తేతి కారకో;

అపయుత్తో పయుత్తో వా, స కత్తాతి పవుచ్చతి.

కరణే-తం పన దువిధం అజ్ఝత్తికబాహిరవసేన, యథా హత్థేన కమ్మం కరోతి, చక్ఖునా రూపం పస్సతి, మనసా ధమ్మం విఞ్ఞాయతి. దత్తేన విహయో లునాతి, అగ్గినా కుటిం ఝాపేతి.

బాహిరఞ్చ తథా+జ్ఝత్తం, కరణం దువిధం యథా;

వీహిం లునాతి దత్తేన, నేత్తేన చన్ద+మిక్ఖతే.

పకతియా అభిరూపో, గోత్తేన గోతమో ఇచ్చాది భూధాతుస్స సమ్భవా కరణే తతియా. తథా సారిపుత్తోతి నామేన విస్సుతో, జాతియా ఖత్తియో బుద్ధో, జాతియా సత్తవస్సికో, సిప్పేన నళకారో సో, ఏకూనతింసో వయసా, ఏవం సమేన ధావతి, విసమేన ధావతి, ద్విదోణేన ధఞ్ఞం కిణాతి.