౧౧౩. ఝలా వా

ఝలతో యోనం ని హోతి వా నపుంసకే. అట్ఠీని. ‘‘లోపో’’తి యోలోపే దీఘో, అట్ఠీ. భో అట్ఠి అట్ఠీ, అట్ఠీని అట్ఠీ. అట్ఠిం, అట్ఠీని అట్ఠీ. అట్ఠినా ఇచ్చాది మునిసద్దసమం. ఏవం పచ్ఛి+అక్ఖి+దధి+సత్థి+వారి+అచ్చిఆదయో.

ఇకారన్తం.

దణ్డి, నపుంసకత్తా ‘‘ఏకవచనే’’చ్చాదినా రస్సే సిలోపో. దణ్డీని దణ్డీ. ‘‘గే వా’’తి రస్సే భో దణ్డి దణ్డీ, దణ్డీని దణ్డీ. ‘‘నం ఝీతో’’తి నం. దణ్డినం దణ్డిం, దణ్డీని దణ్డీ. సేసం పుల్లిఙ్గే దణ్డీసమం. ఏవం సుఖకారీ+సీఘయాయీఆదయో.

ఈకారన్తం.

చక్ఖు, చక్ఖూని చక్ఖూ. సేసం అట్ఠిసమం. ఏవం ఆయు+వసు+ధను+దారు+తిపు+మధు+సిఙ్గు+హిఙ్గు+వత్థు+జతు+అమ్బు+ అస్సుఆదీని. ఆయుసద్దతో నాస్స కోధాదిత్తా సావ విసేసో.

ఉకారన్తం.

గోత్రభు, రస్సే సిలోపో. గోత్రభూని గోత్రభూ. భో గోత్రభు గోత్రభూ, గోత్రభూని గోత్రభూ. గోత్రభుం, గోత్రభూని గోత్రభూ ఇచ్చాది పుల్లిఙ్గే వేస్సభూసమం. ఏవం సయమ్భూ+అభిభూ+ధమ్మఞ్ఞూ ఆదయో.

ఊకారన్తం.

విసదా+విసదాకార-వోహారో+భయముత్తకో;

పుమాదిజాననే హేతు-భావతో లిఙ్గ+మీరితో.

థన+కేసావతీ నారీ, మస్సువా పురిసో సియా;

ఉభిన్న+మన్తరం ఏతం, ఇతరో+భయముత్తకో.

ఏసే+సా ఏత+మీతి చ,

పసిద్ధిఅత్థేసు యేసు లోకస్స;

థీ+పుమ+నపుంసకానీ+తి,

వుచ్చన్తే తాని నామాని.

నపుంసకలిఙ్గం.

అథ సబ్బాదీనం రూపనయో నిద్దిసియతే,

సబ్బ కతర కతమ ఉభయ ఇతర అఞ్ఞ అఞ్ఞతర అఞ్ఞతమ, పుబ్బ+పరా+పర+దక్ఖిణు+త్తరా+ధరాని వవత్థాయ+మసఞ్ఞాయం. ‘‘ఊనపూరత్థ+మధికపదోదాహరణ+మజ్ఝాహారో’’తి ఞాయా సబ్బాదీసు పఠీయన్తేతి యోజేతబ్బం. య త్య త ఏత ఇమ అము కిం ఏక తుమ్హ అమ్హ ఇచ్చేతే సబ్బాదయో. కచ్చాయనే అదస్సితస్సాపి త్యసద్దస్స –

ఖిడ్డా పణిహితా త్యాసు, రతి త్యాసు పతిట్ఠితా;

బీజాని త్యాసు రుహన్తి, యదిదం సత్తా పజాయరేతి –

పాళియం దిస్సమానత్తా ఇధ సఙ్గహో.

తత్థ సబ్బసద్దో నిరవసేసత్థో. కతర+కతమసద్దా పుచ్ఛనత్థా. ఉభయసద్దో ద్విఅవయవసముదాయవచనో. ఇతరసద్దో వుత్తపటియోగీవచనో. అఞ్ఞసద్దో అధికతాపరవచనో. అఞ్ఞ- తర+అఞ్ఞతమసద్దా అనియమత్థా. పుబ్బాదయో దిసాదివవత్థావచనా. యసద్దో అనియమత్థో. త్య+తసద్దా పరమ్ముఖవచనా. ఏత+ఇమ+అము+కిం ఇచ్చేతే సమీప+అచ్చన్తసమీప+దూర+పుచ్ఛనత్థవచనా. ఏకసద్దో సంఖ్యాదివచనో. తుమ్హ+అమ్హసద్దా పర+అత్త నిద్దేసవచనా.

సబ్బో, సిస్స ఓ,