౨౨. ఛట్ఠీ

సమ్బన్ధవచనిచ్ఛాయేవేత్థ ఛట్ఠీ సిద్ధాతి ఆసఙ్కియాహ-‘హేతుమ్హి’చ్చాది, హేతుమాహ-‘తం యోగ్గతా’ ఇచ్చాది, సద్దసత్తిసామత్థియాతి సద్దసత్తిసఙ్ఖాతాయ సామత్థియా, తమేవ ఫుటయతి ‘యత్థ’ఇచ్చాదినా, హేత్వత్థవాచకేహి అన్తరేనాతి సమ్బన్ధో, సమానాధికరణేహీతి హేత్వత్థసమానాధికరణేహి ఉదరాదీహి, తజ్జోతనాయాతి హేత్వత్థజోతనాయాలన్తి సమ్బన్ధో, బ్యతిరేకేన తు హేత్వత్థతో తప్పవత్తిమాహ-‘యత్థ పని’చ్చాది, హేత్వత్థేహిపిచ్చాదినా సామత్థియముపదస్సితం ‘వసే ధమ్మస్స హేతునో’తి తత్థోదాహరణం.