తిసట్ఠిమ పరిచ్ఛేద

సేనాపతివధో

౧. నిజాయుధదుతియస్స, నిక్ఖమన్తస్స తస్స హి;

తం ఖణం పురతో కో’పి, సఙ్ఖసద్దో సముగ్గతో.

౨. తతో నేకనిమిత్తఞ్ఞూ, కుమారో తం సుణి త్వ సో;

నిప్ఫజ్జిస్సతి సఙ్కప్పో, ఖిప్పం యేవేతి మోదవా.

౩. తత్థ తత్థ నియుత్తానం, రక్ఖకానమజానతం;

నిక్ఖమిత్వా పురావీత-భయో సీహపరక్కమో.

౪. వేగేన మగ్గం గన్త్వాన, పఞ్చగావుతమత్తకం;

బదలత్థలగామస్స, పదేసేనాతి దూరకే.

౫. గామ మేకముపాగఞ్చి, పిలిం వత్థూతి సఞ్ఞితం;

జనానం సన్నిపాతాయ, నిజానం సో కతావధి.

౬. నిజాగమనతో పుబ్బం, పటిమగ్గే నిసీదితుం;

పటిలద్ధనియోగానం, యేచి దేవాగతే తదా.

౭. తహిం ఠితే సో పస్సిత్వా, ఏత్తకా కిన్ను ఆగతా;

ఇతి పుచ్ఛి కుమారోథ, తేపి తం ఇద మబ్రవుం.

౮. లోకప్పవత్తిం సకలం, జానన్తేనాపి సామినా;

కిమేవ ముచ్చతే మచ్చు-భయం కేసం న విజ్జతి.

౯. బాలాతానుగతో సామి, ఠితో వయసి ఈదిసే;

అజ్జాపి హి ముఖే తుయ్హం, ఖీరగన్ధో పవాయతి.

౧౦. న హేవత్థి విసుం విత్త-జాతం సఙ్గహితం తవ;

తదఞ్ఞా చోపకరణ-సామగ్గీ నేవ విజ్జతే.

౧౧. చిరమ్పరిచితత్తేహి, దళ్హం సారుళభత్తిహి;

వినా’మ్హేహి విసుం కేవా’నుగన్తారో జనాతువం.

౧౨. కిఞ్చాగతానమమ్హాకం, పితా తుయ్హం నరిస్సరో;

కారేస్సతి ఇదం నామ, సబ్బథా నేవ ఞాయతే.

౧౩. అమ్హాకమన్తరామగ్గే, సఙ్ఖో నామ చమూపతి;

మహబ్బలో మహావీరో, రజ్జసీమం తమావసం.

౧౪. పచ్చత్థితే ఠపేత్వఞ్ఞే, ఏతే కతిపయా మయం;

అఞ్ఞమఞ్ఞమ్హి నియత-మాసఙ్కీ హదయా భుసం.

౧౫. అరుణుగ్గమవేలా చ, సమాసన్నతరాధునా;

ఇతి భీతిం పకాసేసుం, పచ్చేకం హదయస్సితం.

౧౬. నిసమ్మ తేసం వచనం, విధాయ మధురం సితం;

వీతసఙ్కో కుమారో సో, ముఖానే’సం విలోకియ.

౧౭. చరిత్వాపి మయా సద్ధి-మేతే’హో కాలమేత్తకం;

న జానింసు మమం సబ్బే, యేసఞ్హి భయమిదిసం.

౧౮. ఇతి వత్వా భయం తేసం, వినోదేతు ముపట్ఠితం;

సీహనాదం తదా’కాసి, మహన్తం సీహవిక్కమో.

౧౯. తిట్ఠన్తు మానుసా సబ్బే, మయి హత్థగతాయుధే;

సక్కో దేవానమిన్దోపి, కుపితో కిం కరిస్సతి.

౨౦. బాలోతి మం చిన్తయ తం, జాతా వో కుమతీదిసీ;

పరిక్ఖీయతి తే జాణా, నవయో’తి న కిం సుతం.

౨౧. అజ్జేవ కాతుమేకేన, కమ్మునా చిన్తితేన మే;

సదేసపర దేసట్ఠా, భయభత్తీ యథామయి.

౨౨. కరిస్సన్తి యథా వేదం, భయం తుమ్హే జహిస్సథ;

తథా రత్తియమేతాయ, విభాతామయ ఖణేన మే.

౨౩. ఉన్నతే దస్సయిస్సామి, బుద్ధి సాహసవిక్కమే;

అనుధావతి మం తాత, సేతేహి యది వో భయం.

౨౪. పురతో హోథ తుమ్హేహి, వత్వా తే గహితాయుధో;

సాహసేకరసో వీరో, తమ్హా నిక్ఖమ్మ గామతో.

౨౫. ఉదయా’చలసీసట్ఠం, జేతుమాదిచ్చమణ్డలం;

అపరం రవి బిమ్బంవ, పచ్ఛిమా సా ముఖోదితం.

౨౬. తేజసా పసరన్తేన, జనానం పవికాసయం;

నేతమ్బుజవనం పాతో, బదలత్థలిమాగమి.

౨౭. జఘసఙ్ఖస్సరేనా’థ, సేనా నాథో పబుజ్ఝియ;

సఞ్జాతసమ్భమో ఞత్వా, రాజపుత్తముపాగతం.

౨౮. సద్ధిం బలేన మహతా, పధుగ్గమ్మకతాదరో;

పణామముచితం కత్తు-మానతో వసుధాతలే.

౨౯. అమ్హాకమేసజీవన్తో, కిం నామత్థం కరిస్సతి;

మారేతబ్బో’ధునేవేతి, పస్సన్తే సముఖం భటే.

౩౦. నేవా’దిట్ఠాపరాధస్స, మరణం పురిసో చితం;

వధో విరోధే సక్కా’తి, ఇఙ్గితేన నివారియ.

౩౧. సేనాపతిస్స సో హత్థం, గహేత్వా సీహసన్నిభో;

భాసన్తో మధురం వాచం, తస్సేవా’గఞ్ఛి మన్దిరం.

౩౨. అథస్స గమనం రఞ్ఞో, భవితబ్బమజానతా;

సరూపం యావ జానామి, తావస్సేతే సహాగతా.

౩౩. యథా న సహితా హోన్తి, ఠపేతబ్బా విసుం విసుం;

కుమారో’వ మమాగారే, వసతూ’తి విచిన్తియ.

౩౪. తథా సేనాపతి కత్వా, వఞ్చేతుం తం మహామతిం;

దస్సేత్వా’తి థీసక్కారం, రఞ్ఞో దూతే స పేసయి.

౩౫. కుమారో’థ విదిత్వాన, తేన తం వఞ్చనం కతం;

కత్తబ్బమేత్థా’కత్వాహ, ముదాసీనో భవే యది.

౩౬. ఇచ్ఛితత్థస్స నిప్ఫత్తి, న మే జాతు భవిస్సతి;

అయం తావా’ధునావస్సం, మారేతబ్బోతి చిన్తియ.

౩౭. సహాగతం పయోజేత్వా, ఘాతాపయి చమూపతిం;

హతో సేనాధినాథో’తి, మహన్తం ఖుభితం అహు.

౩౮. సేనానాథభటో ఏకో, సుత్వా సేనాపతిం హతం;

మారణం సామినో మయ్హం, కిం నిమిత్తమీతి బ్రవి.

౩౯. నేత్తిం సపాణీ సహసా, కుమారం ఠితమేకకం;

అభిదావి ససామిస్స, పరిచత్తత్తజీవినో.

౪౦. కుమారస్స ముఖం దిస్వా, వేధమానో భయేన సో;

పురే ఠాతుమసక్కోన్తో, పాదమూలే తతో సయి.

౪౧. గణ్హథే’తన్తివచనా-కుమారస్స పురేతరం;

తస్సేవేకో సహచరో, భటమేతం విఘాతయి.

౪౨. నియోగం మే వినా తేన, కతం కమ్మం న యుజ్జతి;

ఇతి దణ్డనమేతస్స, కారాపేసియథోచితం.

౪౩. అథ తం కాలయమ్భూత-సఙ్ఖోభమతిభింసనం;

భముక్ఖిపనమత్తేన, రాజపుత్తో సమం నయి.

౪౪. వీరో యసోధరధనో ధితిమా కుమారో;

వీరోపకారచతురో వరకిత్తిసారో;

సేనిన్దసఞ్చితమనప్పధనం భటానం;

సబ్బం విసజ్జయి యథారుచియా గహేతుం.

సుజనప్పసాదసంవేగత్థాయ కతే మహావంసే

సేనాపతివధో నామ

తిసట్ఠిమో పరిచ్ఛేదో.