ఏకూనసట్ఠిమ పరిచ్ఛేద
చతురాజచరియ నిద్దేసో
౧. తదారఞ్ఞో నుజామిత్తా, తస్స పుత్తా తయో’పి చ;
మహామచ్చా చయతయో, తథా యతనవాసినో.
౨. తబ్బేతే ఆదిపాదస్స, రోహణే వసతో సతో;
అనారోచాపయిత్వాన, భూపాలమతసాసనం.
౩. సమ్భూయమన్తయిత్వాన, సమానచ్ఛన్దతం గతా;
అదంసు యువరాజస్స, లఙ్కారజ్జాభిసేచనం.
౪. ఓపరజ్జే నివేసేసుం, మానభరణనామకం;
కుమారం పుబ్బచారిత్త-మగ్గం లఙ్ఘిత్థ తే’ఖిలా.
౫. తయో’థ భాతరో సబ్బే, తే మాణభరణాదయో;
జయబాహుమహీపాల-సహితా సహసా తదా.
౬. ముత్తామణిప్పభూతికం, రతనం సారసమ్మతం;
సబ్బం హత్థగతం కత్వా, వాహనఞ్చ గజాదికం.
౭. సకలం బలమాదాయ, పులత్థినగరా తదా;
ఖిప్పం తం విక్కమభుజం, గణ్హిసామా’తి నిక్ఖముం.
౮. సుత్వా పవత్తిం సకలం, ఇమం విక్కమబాహుసో;
తా తస్సన్తిమసక్కారం, విధాతుం హన్దనో లభిం.
౯. ఇదాని ఖిప్పం గన్త్వాన, పులత్థినగరం తహిం,
తా తస్సాళాహనట్ఠాన దస్సనే నేవ సో అహం.
౧౦. సోకభారం వినోదేస్సం, మమ చేతో గతం ఇతి;
కతదళ్హ వవత్థానో, వినిగ్గమ్మ తతో పురా.
౧౧. పులత్థిపురమాగచ్ఛం, ఆదిపాదో’తి సాససో;
సత్తట్ఠసతసఙ్ఖేన, బలేన పరివారితో.
౧౨. అన్తరాలపథేయేవ, గుత్తహాలకమణ్డలే;
గామే పన సముక్కవ్హే, దిస్వా సేనఙ్గమాగతం.
౧౩. మహన్తం యుద్ధసన్నద్ధం, ఏకవీరో భయాతికో;
యుజ్ఝిత్వా తే పలాపేసి, ఖణేనేవ దిసోదిసం.
౧౪. తయో తే భాతరో తత్థ, సమ్పత్తావ జయా తతో;
అభిమానుద్ధతా ఖిప్పం, అన్నయ్హ బలవాహనం.
౧౫. ఆదిపాదకజమ్బూతి, విస్సుతమ్హి పదేసకే;
సఙ్గామేసుం పరాజేసి, భియ్యో యుజ్ఝిత్థ సో తయో.
౧౬. తతియం కటగామస్మిం, కాళవాప్యం చతుత్థకం;
పఞ్చమం ఉద్ధటద్వారే, ఛట్ఠంసో పఙ్కవేలకే.
౧౭. తేహి యుద్ధం కరిత్వాన, గహీతవిజయో సదా;
పులత్థిపురమాగఞ్చి, సహామచ్చ పరిజ్జనో.
౧౮. సచిన్తితక్కమేనేవ, పస్సిత్వాళాహనం పితు;
విదూరితమహాసేకో, లద్ధస్సాసో పురేవసం.
౧౯. దుక్ఖే సహాయ భూతాన-మత్తనో సో యథారహం;
అమచ్చానమదా సబ్బ-భోగే ఠానన్తరే హి సో.
౨౦. భటానఞ్చాపి సబ్బేసం, సహాయాతానమత్తనో;
అనురూపమదా వుత్తిం, సరం దుక్ఖసహాయతం.
౨౧. మాణాభరణభూపోపి, సద్ధిం సేసేహి భాతూహి;
కరిత్వా రోహణం పస్సం, రోహణఞ్చ సహత్థగం.
౨౨. తతో కిత్తిసిరీమేఘే, సద్వాదససహస్సకం;
రట్ఠం దత్వాన వసితుం, తహింయేవ సమాదిసి.
౨౩. ఆణత్తో భాతరాకిత్తి-సిరీమేఘో జనాధిపో;
గన్త్వా వసి పురేతత్థ, మహానాగహులవ్హయే.
౨౪. సిరీవల్లభనామస్స, కుమారస్సాపి చాదిసి;
దేసమట్ఠసహస్సవ్హం, దత్వాన వసితుం తహిం.
౨౫. తథేవ సోపి గన్త్వాన, ఉద్ధనద్వారనామకం;
గామం కత్వా రాజదానిం, వసన్తో అనుసాసితం.
౨౬. సయఞ్చ సహసేనాయ, గన్త్వా దక్ఖిణపస్సకం;
వీరబాహూతి పఞ్ఞాతో, పుఙ్ఖగామం సమావసి.
౨౭. మాతా చ తిణ్ణం భాతూనం, జయబాహు చ భూమిపో;
నివసింసు తదా కిత్తి-సిరిమేఘస్స సన్తికే.
౨౮. తతో సంవచ్ఛరే’తీతే, తే మాణభరణాదయో;
తేనత్తని కతం యుద్ధే, సబ్బం విక్కమబాహునా.
౨౯. దురారోహం మహన్తం తం, పరాజయతరాభవం;
అనుస్సరన్తబహుసో, అభిమానసమున్నతా.
౩౦. ముద్ధాభిసిత్తరాజూన-మేకాకీరాజరట్ఠకం;
వినాయమభిసేకేన, కథం నామానుభోస్సతి.
౩౧. ఇతి ఇస్సా పరత్తఞ్చ, యాతా సఙ్గయ్హసావకే;
భియ్యో సమ్భూయసఙ్గామ-కరణత్థాయ నిక్ఖముం.
౩౨. సుత్వా తమత్థం దూతేహి, సో విక్కమభుజోపి చ;
అగా తేసంవ విసయం, మహాసేనాపురక్ఖతో.
౩౩. దేసే దక్ఖిణకే బోధి-సేనపబ్బతగామకే;
యుజ్ఝిత్వా తే పరాజేసి, తయో విక్కమబాహుసో.
౩౪. రిపవో దాని మే సబ్బే, ఉమ్మూలేస్సామహం ఇతి;
పలాయన్తే నుబన్ధిత్థ, పదానుపదికం’వ తే.
౩౫. తే చ దుగ్గం పలాయింసు, పఞ్చయోజనరట్ఠకే;
ఖిప్పం పావేక్ఖి కల్యాణిం, సో’పి తే గహణత్థికో.
౩౬. వీరో అరియదేసియో, వీరదేవోతి పాకటో;
పళన్దీపిస్సరో ఏకో, భూసం సహసికో తదా.
౩౭. సద్ధిం సూరేహి యోధేహి, మహాతిత్థమ్హి ఓతరి;
కాతుం హత్థగహం సక్కా, లంకాదీపన్తి చిన్తియ.
౩౮. సో విక్కమభుజో సుత్వా, పవత్తిం భూభుజో తదా;
యావతా నాత్ర లంకాయం, లద్ధోగాహో భవిస్సతి.
౩౯. తావ ఉమ్మూలనీయోతి, కల్యాణిమ్హా వినిగ్గతో;
మహాతిత్థమ్హి మన్నార-నామకం గామకం గతో.
౪౦. కత్వాన వీరదేవో’పి, సఙ్గామం తేన రాజినా;
అనీకఙ్గాదయో రాజ-పుత్తే ద్వే భాతరోపి చ.
౪౧. సేనాధినాయకఞ్చేవ, కిత్తినామప్పకాసితం;
ఘాతేత్వా సహసా వీర-సమ్మతే చ బహూజనే.
౪౨. గాహేత్వా జీవగ్గాహంసో, రక్ఖకఞ్చ చమూపతిం;
సబలం తం పరాజేత్వా, అనుబన్ధి పదాపదం.
౪౩. పలాయమానో సో భీతో, ఆగన్త్వాన నిజం పురం;
హత్థసారం సమాదాయ, కోట్ఠసారం గతో లహుం.
౪౪. పచ్ఛతో పచ్ఛతో వీర-దేవో తమనుబన్ధియ;
ఆగన్త్వాన పురేవాసం, కతిపాహం విధాయసో.
౪౫. గణ్హితుం విక్కమభుజం, తత్థేవ తురితం అగా;
పేసయిత్వా సకం సోపి, మహన్తం సకలం బలం.
౪౬. యుజ్ఝాపేత్వాన ఘాతేత్వా, గామే అన్తరవిట్ఠికే;
మహాకద్దమదుగ్గమ్హి, వీరదేవం మహబ్బలో.
౪౭. అభిసేకం వినాయేవ, పులత్థి నగరే వసం;
అకాసి రాజరట్ఠస్స, పసాసనవిధిం విభూ.
౪౮. అపనీయరణే ఛన్దం, భాతరోపి తయో తతో;
ఆవసింసు యథాపుబ్బం, గన్త్వా రట్ఠం సకం సకం.
౪౯. చతురోపి మహీపాలా, యతమానా చిరం తహిం;
ఏకచ్ఛత్తఙ్కితం కాతుం, నేవ సక్ఖింసు సబ్బసో.
౫౦. అనిసమ్మకారిభావేన, కులీనే పరిహాపయుం;
ఠపేసుఞ్చ మహన్తత్తే, హీనే సాభిమతే జనే.
౫౧. వడ్ఢితంనేకధా సమ్మా, రఞ్ఞా విజయబాహునా;
సాసనఞ్చ తథాలోకం, హాపయింసు సుబుద్ధినో.
౫౨. కులీనానం మనుస్సాన-మభావేపి చ తాదిసే;
దోసే విత్తం తదాయత్తం, పసయ్హావహరింసు చ.
౫౩. పీళేతుం సకలం లోక-ముద్ధరన్తాధికం బలిం;
ఉచ్ఛూవ ఉచ్ఛుయన్తేతే, ఖీణకో సాధనేసినో.
౫౪. ఉద్ధరిత్వాన బుద్ధాది-సన్తకే భోగగామకే;
సో విక్కమభుజో రాజా, సేవకేసు సమప్పయీ.
౫౫. పులత్థినగరే నేక-విహారే ధాతుమణ్డితే;
సోవ దేసన్తరీయానం, భటానం వసితుం అదా.
౫౬. సద్ధేహి పత్తధాతుస్స, దాఠాధాతువరస్స చ;
పూజనత్థాయ దిన్నాని, మణిముత్తాదికాని చ.
౫౭. చన్దనాగరుకప్పురం, సువణ్ణాదిమయా బహూ;
పటిమాయో చ అచ్ఛిజ్జ, యథాకామం వయం నయీ.
౫౮. సాసనస్స చ లోకస్స, క్రియమానముపద్దవం;
పస్సన్తా బహుసో తస్మిం, తదా నిబ్బన్నమానసా.
౫౯. అట్ఠమూలవిహారేసు, యతయో గరుసమ్మతా;
పంసుకూలికభిక్ఖూ చ, కోట్ఠాసద్వయనిస్సితా.
౬౦. ఏవం తిత్థియతుల్యానం, సాసనోపద్దవం బహుం;
కరోన్తానం సకా సమ్భా-పయాతం పవరం ఇతి.
౬౧. దాఠాధాతువరం పత్త-ధాతుమాదాయ రోహణం;
గన్త్వా వాసమకప్పేసుం, ఫాసుఠానే తహిం తహిం.
౬౨. తథేవ ఫాసుఠానేసు, విప్పకిణ్ణా తహిం తహిం;
తే కులీనా నిలీనా’వ, హుత్వా వాసమకప్పయుం.
౬౩. పక్ఖద్వయమహీపాల-గయ్హాసీమా సుఠాపితా;
సామన్తా అఞ్ఞమఞ్ఞేహి, కరోన్తో బహుసో రణం.
౬౪. సుసమిద్ధేసు నేకేసు, గామేసు నిగమేసు చ;
అగ్గిం దేన్తా తళాకే చ, ఛిన్దన్తా జలపూరితే.
౬౫. నాసేన్తా సబ్బథా సబ్బ-మాతికావరణాని చ;
ఛిన్దన్తా నాళికేరాది, సో పకారే చ భూరుహే.
౬౬. యథా పోరాణకగ్గామ-ఠానన్తిపి న ఞాయతే;
వినాసేసుం తథా రట్ఠం, అఞ్ఞమఞ్ఞవిరోధినో.
౬౭. తే చ భూమి పతీగామ-విలోపం పత్థమోసనం;
కారేన్తా నిజచారేహి, ఆచరుం లోకుపద్దవం.
౬౮. కులీనానం మనుస్సానం, దాసకమ్మకరాపి చ;
ససామినో’తి వత్తన్తా, నిస్సఙ్కా వీతభీతికా.
౬౯. హుత్వా యుధీయా రాజూనం, అబ్భన్తరపవత్తినో;
బలవన్తతరా జాతా, లద్ధఠానన్తరా తదా.
౭౦. జనా సమన్తకూటాది-నేకదుగ్గనివాసినో;
అదేన్తా భూమిపాలానం, పుబ్బపట్ఠపితం కరం.
౭౧. రాజాణమగణేన్తా తే, గతా దామరికత్తనం;
సకం సకం’వ విసయ-మావసింసు సముద్ధతా.
౭౨. అనత్థే నిచితా నామ, పరివత్తన్తి సబ్బతా;
ఇతి వత్తబ్బ తంయేవ, యాతం లఙ్కాతలం తదా.
౭౩. ఏవం గామకభోజకా వియ భుసంతేజో విహీనా సదా;
అచ్చన్తం బ్యసనాతి సత్తహదయా రాజాభిమానుజ్ఝితా.
౭౪. నిచ్చం అత్తపరత్థసిద్ధివిధురాసఙ్గా విహీనాసయా;
సబ్బే తే విహరింసు భూమిపతయో చారిత్తమగ్గాతిగా.