సట్ఠిమ పరిచ్ఛేద

కుమారోదయో

౧. రోహణే నివసిత్థా’వ, జయబాహుమహీపతి;

మిత్తావ్హా రాజినీ చేవ, తదా కాలమకంసు తే.

౨. సిరీవల్లభజాయా’థ, జనేసి సుగలా దువే;

మాణభరణకం పుత్తం, పుత్తిం లీలావతిమ్పి చ.

౩. మాణాభరణభూపాల-దేవీ’పి రతనావలీ;

మిత్తం పభావతిఞ్చాపి, అలభీ ధీతరో దువే.

౪. పస్సన్తస్స ఉభో తాయో, ధీతరో వీరబాహునో;

తదా మహాదిపాదస్స, ఏవం ఆసి వితక్కితం.

౫. లోకాభిసమ్మతే సబ్బ-భూపాలన్వయముద్ధని;

విసుద్ధే సోమవంసమ్హి, అభిజాతా మయం పన.

౬. పిహనీయతరాకారా, సబ్బసత్తిసమున్నతా;

నానావిజ్జాసు నిపుణా, హత్థిఅస్సాదిసుక్ఖమా.

౭. తథా పేకాకినా వే’తే, తయో విక్కమబాహునా;

పరాజయం పరిభవం, పాపితా బహుసో రణే.

౮. సూనునో సుసమత్థస్స, విసోధేతు మిమం మలం;

న దిస్సతే పాతుభావో, అహో నో అప్పపుఞ్ఞతా.

౯. జనవాదకిలిట్ఠేన, రాజత్తేనాపి కిం మమ;

ఇదాని విసయాసఙ్గం, హిత్వా కల్యాణకమ్మసు.

౧౦. అప్పమత్తస్స సతతం, నేతబ్బా వాసరా’ఇతి;

నియ్యాతేత్వా అమచ్చానం, సబ్బం రజ్జవిచారణం.

౧౧. తహిం సత్త’ట్ఠమాసఞ్హి, వసం రత్తియమేకదా;

దేవరాజఘరేసేయ్యం, కప్పేసి సీలసంయతో.

౧౨. తతో పచ్చూసకాలమ్హి, దేవపుత్తం మహిద్ధికం;

విచిత్తవత్థాభరణం, గన్ధమాలావిభూసితం.

౧౩. ఉళారతరరూపేన, దేహోభాసేన అత్తనో;

ఓభాసేన్తం అసేసా’సా, సూరియఞ్చ న భుగ్గతం.

౧౪. వదన్తం సుపినే ఏవం, అదక్ఖి దరణీపతి;

పసీదస్సు మహాభాగ, పితోభవ మహిపతి.

౧౫. ధఞ్ఞలక్ఖణసమ్పన్నో, ఇచ్ఛితత్థస్ససాధకో;

వినీతో లోకకుహర-బ్యాపితేజో పరక్కమో.

౧౬. ఆణబలయసోకిత్తి-భాసురో సగ్గుణాకరో;

లోకసాసనసంవుద్ధి-కరో పుత్తవరో తవ.

౧౭. లబ్భీస్సతే మహారాజ, న చిరస్సేవ సమ్పతి;

పుత్తదారాధివుత్థం తం, పురం ఖిప్పం పయాహీతి.

౧౮. పబుజ్ఝిత్వాన సఞ్జాత-పీతివేగోథ రత్తియా;

విభాతాయ తతోపోఙ్ఖ-గామం గఞ్ఛినరుత్తమో.

౧౯. యథా దిట్ఠప్పకారన్తం, కథేసి సుపినం సుభం;

మహేసీ పముఖానం సో, అమచ్చానం మహీపతి.

౨౦. సద్ధిం మహేసియా తత్థ, పత్థేన్తో పుత్తముత్తమం;

చిన్తోన్తో దానసీలాదిం, సుభం నానప్పకారకం.

౨౧. అథేకదివసంకాలే, పచ్చూసే సుపినే పన;

సబ్బలక్ఖణసమ్పన్నం, సబ్బసేతం మనోహరం.

౨౨. దన్తీపోతవరం దన్తం, కణ్ణే గణియపేమతో;

పవిసన్తమివత్తానం, సేయ్యాగబ్భం మహేసియా.

౨౩. సమ్పస్సియ పబుజ్ఝిత్వా, ఉట్ఠాయ సయనావరా;

సఞ్జాతపీతిపామోజ్జ-వేగపీణితమానసో.

౨౪. తాయం వేలాయమేదాసు-సేయ్యాగబ్భం మహేసియా;

పవిస్ససుపినం తస్సా, యథాదిట్ఠం పకాసయీ.

౨౫. అహమ్పి తాదిసం హత్థి-పోతకం సయనం మమ;

పదక్ఖిణం కరిత్వాన, ఠితం సోణ్డే సమాదియ.

౨౬. ఆకడ్ఢిత్వాన సయనం, సమారోపియ పేమతో;

ఆలిఙ్గిం సుపినమ్హీతి, దేవీ చాపి తమబ్రవీ.

౨౭. ఉభో తే అఞ్ఞమఞ్ఞస్స, దిట్ఠమేవం పకాసియ;

ఉట్ఠాపేసుం పహట్ఠావ, వీతనిద్దారుణం తదా.

౨౮. తతో పాతో ఉపట్ఠాతు, ముపయాతం పురోహితం;

నేమిత్తకే చ పుచ్ఛింసు, సునిత్వా తే పమోదితా.

౨౯. న చిరస్సేవ పుత్తస్స, ధఞ్ఞలక్ఖణసాలినో;

ఉప్పత్తియా అవస్సం’వ, భవంతబ్బన్తి కిత్తయుం.

౩౦. తం సుణిత్వా అమచ్చా చ, తథా నగరవాసినో;

అవిన్దింసు జనిన్దో చ, సబ్బేపీతి మహుస్సవం.

౩౧. తతో పట్ఠాయ సోత్థానం, పత్థయం పత్థివోభుసం;

భిక్ఖుసఙ్ఘేన బహుసో, భణాపేసి పరిత్తకం.

౩౨. మణిముత్తాదికం చిత్తం, మహగ్ఘమనువాసరం;

పరిచ్చజి దానముఖే, యాచకానమనేకసో.

౩౩. పురోహితాదివిప్పేహి, వేదవేదఙ్గవిఞ్ఞూహి;

వత్తాపేసి చ హోమాది-విధానం సోత్థి సమ్మతం.

౩౪. సువినట్ఠే విహారే చ, ధాతుగబ్భే చ వాపియో;

జిణ్ణా చ పటిసఙ్ఖత్తుం, యోజయీ రాజకప్పికే.

౩౫. దినం నయన్తే కల్యాణ-కమ్మేనే’వం నరిస్సరే;

న చిరం సణ్ఠహి గబ్భ-వరో కుచ్ఛిమ్హి దేవియా.

౩౬. తతోవగమ్మ తం హట్ఠ-పహట్ఠో సో నరిస్సరో;

మహన్తం దేవియా గబ్భ-పరిహారమదాపయి.

౩౭. పరిపక్కగబ్భా దేవీ, కమేన జనయీసుకం;

సమయే భద్దనక్ఖత్త-ముహుత్తేనభిలక్ఖితే.

౩౮. సుప్పసన్నా అసేసా చ, దిసాయో తంఖణే అహు;

సమీరణే చ వాసింసు, సుగన్ధిముదుసీతలా.

౩౯. దన్తీనం కోఞ్చనాదేన, హయానం హేసితేన చ;

రాజఙ్గణం తదాజాతం, మహాకోలాహలా కూలం.

౪౦. అచ్ఛేరాతిసయే ఏవం, పాతుభూతే అనేకధా;

దిస్వా తం విమ్హయప్పత్తో, మాణభరణభూపతి.

౪౧. సుత్వా నిజస్స పుత్తస్స, తదా సఞ్జాతసాసనం;

అమతేనాభిసిత్తోవ, పీతిపుణ్ణమనోరథో.

౪౨. మోచాపేత్వా తదా కారా-ఘరే బద్ధే బహూజనే;

దానం ఉళారం సమణ-బ్రాహ్మణానం పదాపయి.

౪౩. అమచ్చపముఖా చాపి, జనాపురనివాసినో;

కదలీతోరణాదీహి, రాజధానీ మనేకధా.

౪౪. అలఙ్కరిత్వా సకలం, సుమణ్డితపసాధితా;

ఛణం మహన్తం వత్తేసుం, కతిపాహం మనోరమం.

౪౫. వేదే వుత్తవిధానేన, జాతకమ్మాదికం విధిం;

సబ్బం సమాపయిత్వాన, కుమారస్సా’వనీపతి.

౪౬. పురోహితాదయో విప్పే, తతో లక్ఖణపాఠకే;

ఆణాపేత్వాన సక్కార-సమ్మానవిధిపుబ్బకం.

౪౭. నియోజేసి కుమారస్స, లక్ఖణానం పటిగ్గహే;

సాధకం సకలం తస్స, యత్థపాదాదిలక్ఖణం.

౪౮. ఉపధారియ మహామచ్చ-గణమజ్ఝగతస్స తే;

రాజినో దేవియా చాపి, పకాసేసుం పమోదితా.

౪౯. లఙ్కాదీపం ఠపేత్వాన, జమ్బుదీపతలమ్పి చ;

ఏకచ్ఛత్తఙ్కితం కత్వా-నుభోత్తుం నిపుణో ఇతి.

౫౦. తే సన్తప్పియ భోగేహి, భియ్యో పుచ్ఛిత్థ సాదరం;

సన్దిస్సమానం యంకిఞ్చి, అరిట్ఠం అత్థి నత్థీ’తి.

౫౧. దీఘాయుకో కుమారో’యం, కిఞ్చి పఞ్ఞాయతే వత;

జనకారిట్ఠయోగో’తి, తే మహీపతినో’బ్రవుం.

౫౨. తస్సారిజనసమ్మద్ది-పతాపభుజయో గతో;

సో పరక్కమబాహూ’తి, అన్వత్థనామమగ్గహీ.

౫౩. కణ్ణవే ధమహఞ్చేవ, అన్నుపాసనమఙ్గలం;

కారాపియ విధానఞ్ఞూ, యథావిధిమసేసతో.

౫౪. రఞ్ఞో విక్కమబాహుస్స, సపుత్తుప్పత్తిసాసనం;

వత్తుం సదూతే పేసేసి, పులత్థినగరం తదా.

౫౫. తేహిసో భాగినేయ్యస్స, మహాభాగత్తనమ్పి చ;

జనకారిట్ఠయోగఞ్చ, సుత్వా విక్కమబాహుసో.

౫౬. ధఞ్ఞం విజయరాజాది-రాజమాలాయ నాయకం;

మణింవ భాసురం మయ్హం, భాగినేయ్యం జనేసిసో.

౫౭. హాని యాకాచిసతతం, యథా తస్స న హేస్సతి;

తథా మమన్తికేయేవ, కుమారో ఏత్థ వడ్ఢతం.

౫౮. అలద్ధం లభితుం లాభం, లద్ధఞ్చ పరిరక్ఖితుం;

సబ్బథా న సమత్థోయం, పుత్తో గజబాహు మమ.

౫౯. సూరభావాదియుత్తో’పి, మహిన్దవ్హపరోసుతో;

నిహీనో మాతుగోత్తేన, న రజ్జస్స రహో మమ.

౬౦. ఠితస్స విక్కజాతేన, నేకసో సఞ్చితేన మే;

రజ్జస్స భాగినేయ్యో’వ, కామం భాగీ భవిస్సతి.

౬౧. ఇతిపేసేసి దూతే సో, ఆనేతుం తం కుమారకం;

కుమారా భరణం దత్వా, సేసం సారఞ్చుపాయనం.

౬౨. సబ్బం దూతముఖా సుత్వా, వీరబాహు మహీపతి;

తస్సేతం వచనం యుత్తం, వుత్తం మేహిత బుద్ధియా.

౬౩. తథాపి చ నిజారిట్ఠ-పటికారత్థమీదిసం;

ఓరసం పుత్తరతనం, పేసేతుం నా’నురూపకం.

౬౪. కిఞ్చ తత్థ కుమారమ్హి, నీతే విక్కమ బాహునో;

పక్ఖో లద్ధమహావాహ-బలో వియ హుతాసనో.

౬౫. అచ్చున్నతేన మహతా, తేజసా సఞ్జలిస్సతి;

హానిరేవ వతమ్హాకం, మహతీ హేస్సతే భుసం.

౬౬. ఇతి హత్థే గతానం సో, దూతానం థనయం సకం;

అపేసేత్వా విసజ్జేసి, పసాదియ మనేన సో.

౬౭. సపుత్తదారేహి సమగ్గవాసం,

నరాదినాథో నివసం తహింసో;

తిబ్బేన ఫుట్ఠో మహతాగదేన,

రజ్జేన సద్ధిం విజహిత్థ దేసం.

సుజనప్పసాదసంవే గత్థాయ కతే మహావంసే

కుమారోదయో నామ

సట్ఠిమో పరిచ్ఛేదో.