అట్ఠపఞ్ఞాసతిమ పరిచ్ఛేద

లోకసాసన సంగహకరణో

౧. విచినిత్వా కులీనే సో, జనే సబ్బే సమాదియ;

సకారక్ఖాయ యోజేసి, యథాచారం మహీపతి.

౨. ఉచ్చం పులత్థినగరే, పాకారం కారయీ థిరం;

నేకగోపురసంయుత్తం, యుధాకమ్మసురఞ్జితం.

౩. సమన్తాయతవిత్థిణ్ణ-గమ్భీరపరిఖాయుతం;

ఉచ్చపత్థణ్డిలోపేతం, దుప్పధంసమరాతిహి.

౪. ఉపసమ్పదకమ్మస్స, గణపూరకభిక్ఖూనం;

అప్పహోనేకభావేన, సాసనఠితిమానసో.

౫. అనురుద్ధనరిన్దస్స, సహాయస్సాథ సన్తికం;

రామఞ్ఞవిసయం దూతే, పేసేత్వా సహపాభతే.

౬. తతో ఆణాపయిత్వాన, పిటకత్తయపారగే;

సో సీలాదిగుణావాసే, భిక్ఖవో థేరసమ్మతే.

౭. తే ఉళారాహి పూజాహి, పూజయిత్వా నరిస్సరో;

పబ్బజ్జా ఉపసమ్పత్తి, కారయిత్వా అనేకసో.

౮. పిటకత్తయఞ్చ బహుసో, కథాపేత్వా సవణ్ణనం;

లఙ్కాయో’సక్కమానం సో, జోతయీ జినసాసనం.

౯. పుతత్థినగరస్సన్తో, పదేసస్మిం తహిం తహిం;

విహారే కారయిత్వాన, బహుకే సుమనోహరే.

౧౦. భిక్ఖవో తత్థ వాసేత్వా, నికాయత్తయవాసినో;

పచ్చయేహి ఉళారేహి, సన్తప్పేసి చతూహిపి.

౧౧. ఫలికత్థమ్భకచారు-పాకారపరిఖాయుతం;

పఞ్చభూమకపాసాద-పవరే నో’పసోభితం.

౧౨. సమసన్తా వాసపన్తీహి, సుభాహి సువిరాజితం;

నిరకిణ్ణమసమ్బాధ వరభాసుర గోపురం.

౧౩. విహారం కారయిత్వాన, వత్థుత్తయపరాయనో;

నికాయత్తయవాసిస్స, భిక్ఖుసఙ్ఘస్స’దాసిసో.

౧౪. సఙ్ఘస్స పాకవట్టత్థం, రట్ఠం దత్వా’ళిసారకం;

సకలం సన్నివాసీహి, నేత్తికేహి సహేవ సో.

౧౫. నేకసతానిభిక్ఖూనం, వాసయిత్వాన తత్థ సో;

సతతం సమ్పవత్తేసి, ఉళారం చతుపచ్చయం.

౧౬. దాట్ఠాధాతుఘరంచారు, కారయిత్వా మహారహం;

దాఠాధాతుస్స నిచ్చం సో, మహామహమకారయి.

౧౭. గణసఙ్గణికా’పేతో, పోత్థకం ధమ్మసఙ్గణిం;

పరివత్తేసి సోపాతో, సున్దరే ధమ్మమన్దిరే.

౧౮. నచ్చాదిగన్ధమాలాది-నేకపూజమ్పవత్తియ;

సీరేన సద్ధాసమ్బన్ధో, సమ్బుద్ధమభివన్దతి.

౧౯. జమ్బుదీపాగతే చాగ, సూరో సో భువిరిసూరయో;

తప్పేసి ధనదానేన, దానియేనేక సో విభూ.

౨౦. సద్ధమ్మకథికానం సో, పూజా కత్వాన నేకసో;

దేసాపేసిచ సద్ధమ్మం, సదాధమ్మగుణే రతో.

౨౧. తిక్ఖత్తుం సో తులాభార-దానం దినేసు దాపయి;

ఉపోసథం వోపవసి, సువిసుద్ధముపోసథే.

౨౨. అదా దణ్డిస్సరం దాన-మనుసంవచ్ఛరం విభూ;

పిటకత్తయం లిఖాపేత్వా, భిక్ఖుసఙ్ఘస్స దాపయి.

౨౩. మహగ్ఘమణిముత్తాది-రతనాని సపేసియ;

జమ్బుదీపే మహాబోధిం-నేకక్ఖత్తుమ పూజయి.

౨౪. కణ్ణాటభూమిపాలేన, చోళరఞ్ఞా చ పేసితా;

దూతామహన్తమాదాయ, పణ్ణాకారమిధాగతా.

౨౫. అద్దసంసు మహీపాలం, తతో సో తుట్ఠమానసో;

తేసం ఉభిన్నం దూతానం, కత్తబ్బం సాధుకారియ.

౨౬. తేసు ఆదో’వ కణ్ణాట-దూతేహి సహ పేసియ;

దూతే సకీయే కణ్ణాట-నికటం సారపాభతే.

౨౭. అత్తనో విసయం పత్తే, చోళో సీహళ దూతకే;

సహసా కణ్ణనాసాసు, పాపయింసు విరూపతం.

౨౮. సమ్పత్తవిప్పకారాకే, ఇధాగన్త్వాన రాజినో;

కథయింసు తదా సబ్బం, చోళేన కతమత్తని.

౨౯. ఉద్దిపితాభిమానో సో, సకలామచ్చమజ్ఝగో;

అవ్హాయ దమిళే దూతే, ఇతి చోళస్స సన్దిసి.

౩౦. సేనం వినా’వ ఏకస్మిం, దీపే మజ్ఝే మహణ్ణవే;

బాహాబలపరిక్ఖావా, హోతునో ద్వన్దయుద్ధతో.

౩౧. బలం సన్నయ్హ సకలం, రజ్జే తుయ్హం మమా’థ వా;

తవా’భిమత దోసమ్హి, సఙ్గామో వా కరీయతం.

౩౨. మయా వుత్తక్కమేనేవ, వత్తబ్బో వో జనాధిపో;

ఇతి వత్వాన తే దూతే, ఇత్థలఙ్కార మణ్డితే.

౩౩. విస్సజ్జియ లహుంచోళ-మహీపాలస్స సన్తికం;

తతో సేనఙ్గమాదాయ, అనురాధ పురం గమి.

౩౪. మత్తికావాటతిత్థే చ, మహాతిత్థే చ పేసయీ;

చోళరట్ఠం’వ గన్త్వాన, యుజ్ఝితుం ద్వే చమూపతి.

౩౫. సజ్జన్తేసు చమూపేసు, నావాపాథేయ్యకాని చ;

యుద్ధత్థాయ బలం చోళ-రట్ఠపేసనకారణా.

౩౬. తదా తింసతిమే వస్సే, వేళక్కారసనామకా;

బలకాయా తహింగన్తు-మనిచ్ఛన్తా విరోధినో.

౩౭. మారేత్వాన ఉభో సేనా-నాథే మత్తగజావియ;

సమన్తతో విలుమ్పింసు, పులత్థిపురముద్ధతా.

౩౮. పుత్తేహి తీహి సహితం, రాజినో చ కణీయసిం;

గణిత్వా సహసా రాజ-పాసాదం చాపి ఝాపయుం.

౩౯. రాజా నిక్ఖమ్మ ఖిప్పం సో, గన్త్వా దక్ఖిణపస్సకం;

సేలే వాతగిరివ్హస్మిం, సారం భణ్డం ఠపాపియ.

౪౦. వీరబాహుపరాజేన, సీహవిక్కమసాలినా;

మహతా చ బలోఘేన, సమన్తా పరివారితో.

౪౧. పులత్థిపురమాగమ్మ, వత్తేన్తో దారుణం రణం;

పలాపేసి ఖణేనేవ, బలకాయే సమాగతే.

౪౨. మారితాన చమూపాన-మట్ఠిసఙ్ఘాటధిట్ఠితం;

పరిక్ఖిపిత్వా చితకం, వేరిభూతే బలాధిపే.

౪౩. బన్ధయిత్వాన ఖాణుమ్హి, పచ్ఛా బాహం సుబన్ధనం;

పరితో విప్ఫురన్తీహి, అగ్గిజాలాహి ఝాపయి.

౪౪. ఘాతేత్వా తత్థ మానీతం, గామాని ధరణీపతి;

అకాసి లఙ్కావసుధం, సబ్బథా వీతకణ్టకం.

౪౫. యుజ్ఝితుం సహ చోళేన, రాజా అత్తకతావధిం;

అనతిక్కమ్మ సో పఞ్చ-చత్తాలీసమ్హి వచ్ఛరే.

౪౬. సన్నద్ధం బలమాదాయ, గన్త్వా సాగరపట్టనం;

తస్సాభిగమనం పస్సం, కఞ్చికాలం తహిం వసం.

౪౭. అనాగతత్తా చోళస్స, తస్స దూతే విస్సజ్జియ;

పునాగన్త్వా వసీరాజా, పులత్థినగరే చిరం.

౪౮. మహాహేళి సరేహరు, మహాదత్తికనామికా;

కటున్నరూపణ్డవాపీ, కల్లగల్లిక నామికా.

౪౯. ఏరణ్డేగల్లవాపీ చ, దీఘవత్థుకవాపికా;

మణ్డవాటకవాపీ, చ, కిత్తగ్గబోధిపబ్బతా.

౫౦. వలాహస్స మహాదారు, గల్లకుమ్భీలసోబ్భకా;

పత్తపాసాణవాపీ చ, వాపీ చ కాణనామికా.

౫౧. ఏతా చఞ్ఞా చ సో ఛిన్న-మరియాదా వాపియో బహూ;

బన్ధాపేసి సదాదీన-సత్తే బద్ధ హితాసయో.

౫౨. భూమిన్దో కన్దరా-గఙ్గా-నదీసు చ తహిం తహిం;

సుభిక్ఖం కారయీ రట్ఠం, బన్ధేత్వా’వరణాని సో.

౫౩. విహారా’భయచారిత్త-భేదినిం మహిసంసక;

పరిహారే సబ్బసోచ్ఛిజ్జ-గాహయిత్వా గలమ్హి తం.

౫౪. పురమ్భా బహి కారేత్వా, మహాసఙ్ఘం ఖమాపియ;

పకాసేసి చ లోకస్స, సఙ్ఘగారవమత్తనో.

౫౬. మహాగామే నికాయానం, తితయే చోళనాసితే;

ధాతుగబ్భే చ బన్ధేసి, థూపారామద్వయే’పి చ.

౫౭. మాతుయా’ళాహణఠానే, తథేవ పితునోపి చ;

అకా పఞ్చ మహావాసే, తథా బుదలవిట్ఠియం.

౫౮. పణ్డవాపీ చ పాఠీనో, రక్ఖచేతియపబ్బతో;

తథేవ మణ్డలగిరి-మధుత్థలవిహారకో.

౫౯. ఉరువేలవ్హయో దేవ-నగరే చ విహారకో;

మహియఙ్గణవిహారో చ, సీతలగ్గామలేణకం.

౬౦. జమ్బుకోలవిహారో చ, తథేవ గిరికణ్డకో;

కురున్దియవిహారో చ, జమ్బుకోలకలేణకం.

౬౧. భల్లాతకవిహారో చ, తథేవ పరగామకో;

కాసగల్లవ్హయో చన్ద-గిరివ్హయ విహారకో.

౬౨. వేలగామవిహారో చ, మహాసేనవ్హగామకో;

విహారో చా’నురాధమ్హి, పురే బోధిఘరం తథా.

౬౩. ఇచ్చేవమాదయోనేకే, విహారే చ బహూ విభూ;

పటిసఙ్ఖరిజిణ్ణే సో, గామే చా’దా విసుం విసుం.

౬౪. సమన్తకూట సేలత్థం, మునిన్దపదలఞ్జనం;

పణమత్థాయ గచ్ఛన్తా, మనుస్సా దుగ్గమఞ్జసే.

౬౫. సబ్బే మా కిలమన్తూ’తి, దానవట్టాయ దాపయి;

సాలిక్ఖేత్తాదిసమ్పన్నం, గిలీమలయనామకం.

౬౬. కదలీగామమగ్గే చ, హూవరళఞ్జసే తథా;

గామే దత్వాన పచ్చేకం, సాలాయో చాపి కారయి.

౬౭. అనాగతే తం భూపాలా, మా గణ్హన్తూ’తి లేఖియ;

అక్ఖరాని సిలాథమ్భే, పతిట్ఠాపేసి భూమిపో.

౬౮. గామం అన్తరవిట్ఠిఞ్చ, తథా సఙ్ఘాటగామకం;

సిరిమణ్డగలారామఞ్చ, అదాసో లాభవాసినం.

౬౯. వనజీవకభిక్ఖూన-మదా సో చతుపచ్చయే;

బన్ధూనమ్పి చ సో తేసం, భోగగామే పదాపయి.

౭౦. పావారగ్గికపల్లాని, వివిధే ఓసధేపి చ;

సీతే ఉతుమ్హి బహుసో, భిక్ఖుసఙ్ఘస్స దాపయి.

౭౧. అదా సబ్బపరిక్ఖారే, పరిక్ఖారే తథాత్థ సో;

నేకవారేసు సక్కచ్చం, భిక్ఖుసఙ్ఘస్స బుద్ధిమా.

౭౨. సఙ్ఘస్స పాకవట్టత్థం, భిక్ఖూనం లాభవాసినం;

వేయ్యావచ్చకరానఞ్చ, పూజేతుం చేతియాదికం.

౭౩. పదిన్నా పుబ్బరాజూహి, యే గామా రోహణే బహూ;

తేపి సబ్బే అనూనే సో, యథాపుబ్బం ఠపేసి చ.

౭౪. అదాసి పిఠసప్పీన-ముసభే బలినో బహి;

భత్తం చా’దాసి సో కాక సోణాదీనం దయాపరో.

౭౫. అదాసినేకతా వేయ్య-కారకానం మహాకవీ;

సద్ధిం పవేణిగామేహి, విత్తజాతమనప్పకం.