౧. భూమివగ్గ

౧౮౦. వగ్గా భూమి, పురీ, మచ్చ, చతుబ్బణ్ణ, వనాదిహి;

పాతాలేన చ వుచ్చన్తే, సఙ్గో’పఙ్గేహి’ధ’క్కమా.

౧౮౧. వసున్ధరా ఛమా భూమి, పథవీ మేదనీ మహీ;

ఉబ్బీ వసుమతీ గో కు, వసుధా ధరణీ ధరా;

పుథవీ జగతీ భూరీ, భూ చ భూతధరా’ వనీ.

౧౮౨. ఖారా తు మత్తికా ఊసో, ఊసవా తూసరో తిసు;

థలం థలీత్థీ భూభాగే, థద్ధలూఖమ్హి జఙ్గలో.

౧౮౩. పుబ్బవిదేహో చాపర, గోయానం జమ్బుదీపో చ;

ఉత్తరకురు చేతి సియుం, చత్తారోమే మహాదీపా.

౧౮౪. పుమ్బహుత్తే కురూ సక్కా, కోసలా మగధా సివీ;

కలిఙ్గా’వన్తి పఞ్చాలా, వజ్జీ గన్ధార చేతయో.

౧౮౫. వఙ్గా విదేహా కమ్బోజా, మద్దా భగ్గ’ఙ్గ సీహళా;

కస్మీరా కాసి పణ్డవాదీ, సియుం జనపదన్తరా.

౧౮౬. లోకో చ భువనం వుత్తం, దేసో తు విసయో ప్యథ;

మిలక్ఖదేసో పచ్చన్తో, మజ్ఝదేసో తు మజ్ఝిమో.

౧౮౭. అనూపో సలిలప్పాయో, కచ్ఛం పుమ నపుంసకే;

సద్దలో హరితే దేసే, తిణేనా, భినవేన హి.

౧౮౮. నద్యమ్బుజీవనో దేసో, వుట్ఠినిప్పజ్జసస్సకో;

యో నదీమాతికో దేవ,

మాతికో చ కమేన సో.

౧౮౯. తీస్వనూపాద్యథో చన్ద, సూరాదో సస్సతీరితో;

రట్ఠం తు విజితఞ్చాథ, పురిసే సేతు ఆలియం.

౧౯౦. ఉపాన్తభూ పరిసరో, గోట్ఠం తు గోకులం వజో;

మగ్గో పన్థో పథో అద్ధా, అఞ్జసం వటుమం తథా.

౧౯౧. పజ్జో [పజ్జా…. (క.)], యనఞ్చ పదవీ, వత్తనీ పద్ధతిత్థియం;

తబ్భేదా జఙ్ఘ, సకట, మగ్గా తే చ మహద్ధని.

౧౯౨. ఏకపద్యేకపదికే, కన్తారో తు చ దుగ్గమే;

౧౯౩. పటిమగ్గో పటిపథో, అద్ధానం దీఘ మఞ్జసం;

సుప్పథో తు సుపన్థో చ, ఉప్పథం త్వపథం భవే.

౧౯౪. ఛత్తింసపరమాణూన, మేకో ణు చ ఛత్తింస తే;

తజ్జారీ తాపి ఛత్తింస, రథరేణు ఛత్తింస తే.

౧౯౫. లిక్ఖాతా సత్త ఊకా తా, ధఞ్ఞమాసోతి సత్త తే;

సత్త ఙ్గుల’ మము ద్విచ్ఛ, విదత్థి తా దువే సియుం.

౧౯౬. రతనం తాని సత్తేవ, యట్ఠి తా వీసతూ సభం;

గావుత ముసభాసీతి, యోజనం చతుగావుతం.

౧౯౭. ధనుపఞ్చసతం కోసో, కరీసం చతురమ్బణం;

అబ్భన్తరం తు హత్థాన, మట్ఠవీస పమాణతో.

భూమివగ్గో నిట్ఠితో.