౨. కాయసక్ఖీసుత్తం

౪౩. ‘‘‘కాయసక్ఖీ కాయసక్ఖీ’తి, ఆవుసో, వుచ్చతి. కిత్తావతా ను ఖో, ఆవుసో, కాయసక్ఖీ వుత్తో భగవతా’’తి? ‘‘ఇధావుసో, భిక్ఖు వివిచ్చేవ కామేహి…పే… పఠమం ఝానం ఉపసమ్పజ్జ విహరతి. యథా యథా చ తదాయతనం తథా తథా నం కాయేన ఫుసిత్వా విహరతి. ఏత్తావతాపి ఖో, ఆవుసో, కాయసక్ఖీ వుత్తో భగవతా పరియాయేన.

‘‘పున చపరం, ఆవుసో, భిక్ఖు వితక్కవిచారానం వూపసమా…పే… దుతియం ఝానం… తతియం ఝానం… చతుత్థం ఝానం ఉపసమ్పజ్జ విహరతి. యథా యథా చ తదాయతనం తథా తథా నం కాయేన ఫుసిత్వా విహరతి. ఏత్తావతాపి ఖో, ఆవుసో, కాయసక్ఖీ వుత్తో భగవతా పరియాయేన.

‘‘పున చపరం, ఆవుసో, భిక్ఖు సబ్బసో రూపసఞ్ఞానం సమతిక్కమా పటిఘసఞ్ఞానం అత్థఙ్గమా నానత్తసఞ్ఞానం అమనసికారా ‘అనన్తో ఆకాసో’తి ఆకాసానఞ్చాయతనం ఉపసమ్పజ్జ విహరతి. యథా యథా చ తదాయతనం తథా తథా నం కాయేన ఫుసిత్వా విహరతి. ఏత్తావతాపి ఖో, ఆవుసో, కాయసక్ఖీ వుత్తో భగవతా పరియాయేన…పే….

‘‘పున చపరం, ఆవుసో, భిక్ఖు సబ్బసో నేవసఞ్ఞానాసఞ్ఞాయతనం సమతిక్కమ్మ సఞ్ఞావేదయితనిరోధం ఉపసమ్పజ్జ విహరతి, పఞ్ఞాయ చస్స దిస్వా ఆసవా పరిక్ఖీణా హోన్తి. యథా యథా చ తదాయతనం తథా తథా నం కాయేన ఫుసిత్వా విహరతి. ఏత్తావతాపి ఖో, ఆవుసో, కాయసక్ఖీ వుత్తో భగవతా నిప్పరియాయేనా’’తి. దుతియం.