౩. పఞ్ఞావిముత్తసుత్తం

౪౪. ‘‘‘పఞ్ఞావిముత్తో పఞ్ఞావిముత్తో’తి, ఆవుసో, వుచ్చతి. కిత్తావతా ను ఖో, ఆవుసో, పఞ్ఞావిముత్తో వుత్తో భగవతా’’తి?

‘‘ఇధావుసో, భిక్ఖు వివిచ్చేవ కామేహి…పే… పఠమం ఝానం ఉపసమ్పజ్జ విహరతి, పఞ్ఞాయ చ నం పజానాతి. ఏత్తావతాపి ఖో, ఆవుసో, పఞ్ఞావిముత్తో వుత్తో భగవతా పరియాయేన…పే….

‘‘పున చపరం, ఆవుసో, భిక్ఖు సబ్బసో నేవసఞ్ఞానాసఞ్ఞాయతనం సమతిక్కమ్మ సఞ్ఞావేదయితనిరోధం ఉపసమ్పజ్జ విహరతి, పఞ్ఞాయ చస్స దిస్వా ఆసవా పరిక్ఖీణా హోన్తి, పఞ్ఞాయ చ నం పజానాతి. ఏత్తావతాపి ఖో, ఆవుసో, పఞ్ఞావిముత్తో వుత్తో భగవతా నిప్పరియాయేనా’’తి. తతియం.