౭. పత్తనికుజ్జనసుత్తం

౮౭. [చూళవ. ౨౬౫] ‘‘అట్ఠహి, భిక్ఖవే, అఙ్గేహి సమన్నాగతస్స ఉపాసకస్స ఆకఙ్ఖమానో సఙ్ఘో పత్తం నిక్కుజ్జేయ్య [నికుజ్జేయ్య (క.)]. కతమేహి అట్ఠహి? భిక్ఖూనం అలాభాయ పరిసక్కతి, భిక్ఖూనం అనత్థాయ పరిసక్కతి, భిక్ఖూనం అవాసాయ [అనావాసాయ (సీ. స్యా.)] పరిసక్కతి, భిక్ఖూ అక్కోసతి పరిభాసతి, భిక్ఖూ భిక్ఖూహి భేదేతి [విభేదేతి (బహూసు)], బుద్ధస్స అవణ్ణం భాసతి, ధమ్మస్స అవణ్ణం భాసతి, సఙ్ఘస్స అవణ్ణం భాసతి. ఇమేహి ఖో, భిక్ఖవే, అట్ఠహఙ్గేహి సమన్నాగతస్స ఉపాసకస్స ఆకఙ్ఖమానో సఙ్ఘో పత్తం నిక్కుజ్జేయ్య.

‘‘అట్ఠహి, భిక్ఖవే, అఙ్గేహి సమన్నాగతస్స ఉపాసకస్స ఆకఙ్ఖమానో సఙ్ఘో పత్తం ఉక్కుజ్జేయ్య. కతమేహి అట్ఠహి? న భిక్ఖూనం అలాభాయ పరిసక్కతి, న భిక్ఖూనం అనత్థాయ పరిసక్కతి, న భిక్ఖూనం అవాసాయ పరిసక్కతి, న భిక్ఖూ అక్కోసతి పరిభాసతి, న భిక్ఖూ భిక్ఖూహి భేదేతి, బుద్ధస్స వణ్ణం భాసతి, ధమ్మస్స వణ్ణం భాసతి, సఙ్ఘస్స వణ్ణం భాసతి. ఇమేహి ఖో, భిక్ఖవే, అట్ఠహఙ్గేహి సమన్నాగతస్స ఉపాసకస్స ఆకఙ్ఖమానో సఙ్ఘో పత్తం ఉక్కుజ్జేయ్యా’’తి. సత్తమం.