౧౦. కుసీతారమ్భవత్థుసుత్తం

౮౦. [ది. ని. ౩.౩౩౪, ౩౫౮] ‘‘అట్ఠిమాని, భిక్ఖవే, కుసీతవత్థూని. కతమాని అట్ఠ? ఇధ, భిక్ఖవే, భిక్ఖునా కమ్మం కత్తబ్బం హోతి. తస్స ఏవం హోతి – ‘కమ్మం ఖో మే కత్తబ్బం భవిస్సతి. కమ్మం ఖో పన మే కరోన్తస్స కాయో కిలమిస్సతి. హన్దాహం నిపజ్జామీ’తి. సో నిపజ్జతి, న వీరియం ఆరభతి అప్పత్తస్స పత్తియా అనధిగతస్స అధిగమాయ అసచ్ఛికతస్స సచ్ఛికిరియాయ. ఇదం, భిక్ఖవే, పఠమం కుసీతవత్థు.

‘‘పున చపరం, భిక్ఖవే, భిక్ఖునా కమ్మం కతం హోతి. తస్స ఏవం హోతి – ‘అహం ఖో కమ్మం అకాసిం. కమ్మం ఖో పన మే కరోన్తస్స కాయో కిలన్తో. హన్దాహం నిపజ్జామీ’తి. సో నిపజ్జతి, న వీరియం ఆరభతి అప్పత్తస్స పత్తియా అనధిగతస్స అధిగమాయ అసచ్ఛికతస్స సచ్ఛికిరియాయ. ఇదం, భిక్ఖవే, దుతియం కుసీతవత్థు.

‘‘పున చపరం, భిక్ఖవే, భిక్ఖునా మగ్గో గన్తబ్బో హోతి. తస్స ఏవం హోతి – ‘మగ్గో మే గన్తబ్బో భవిస్సతి. మగ్గం ఖో పన మే గచ్ఛన్తస్స కాయో కిలమిస్సతి. హన్దాహం నిపజ్జామీ’తి. సో నిపజ్జతి, న వీరియం ఆరభతి అప్పత్తస్స పత్తియా అనధిగతస్స అధిగమాయ అసచ్ఛికతస్స సచ్ఛికిరియాయ. ఇదం, భిక్ఖవే, తతియం కుసీతవత్థు.

‘‘పున చపరం, భిక్ఖవే, భిక్ఖునా మగ్గో గతో హోతి. తస్స ఏవం హోతి – ‘అహం ఖో మగ్గం అగమాసిం. మగ్గం ఖో పన మే గచ్ఛన్తస్స కాయో కిలన్తో. హన్దాహం నిపజ్జామీ’తి. సో నిపజ్జతి, న వీరియం ఆరభతి అప్పత్తస్స పత్తియా అనధిగతస్స అధిగమాయ అసచ్ఛికతస్స సచ్ఛికిరియాయ. ఇదం భిక్ఖవే, చతుత్థం కుసీతవత్థు.

‘‘పున చపరం, భిక్ఖవే, భిక్ఖు గామం వా నిగమం వా పిణ్డాయ చరన్తో న లభతి లూఖస్స వా పణీతస్స వా భోజనస్స యావదత్థం పారిపూరిం. తస్స ఏవం హోతి – ‘అహం ఖో గామం వా నిగమం వా పిణ్డాయ చరన్తో నాలత్థం లూఖస్స వా పణీతస్స వా భోజనస్స యావదత్థం పారిపూరిం. తస్స మే కాయో కిలన్తో అకమ్మఞ్ఞో. హన్దాహం నిపజ్జామీ’తి. సో నిపజ్జతి, న వీరియం ఆరభతి…పే… ఇదం, భిక్ఖవే, పఞ్చమం కుసీతవత్థు.

‘‘పున చపరం, భిక్ఖవే, భిక్ఖు గామం వా నిగమం వా పిణ్డాయ చరన్తో లభతి లూఖస్స వా పణీతస్స వా భోజనస్స యావదత్థం పారిపూరిం. తస్స ఏవం హోతి – ‘అహం ఖో గామం వా నిగమం వా పిణ్డాయ చరన్తో అలత్థం లూఖస్స వా పణీతస్స వా భోజనస్స యావదత్థం పారిపూరిం. తస్స మే కాయో గరుకో అకమ్మఞ్ఞో మాసాచితం మఞ్ఞే. హన్దాహం నిపజ్జామీ’తి. సో నిపజ్జతి, న వీరియం ఆరభతి…పే… ఇదం, భిక్ఖవే, ఛట్ఠం కుసీతవత్థు.

‘‘పున చపరం, భిక్ఖవే, భిక్ఖునో ఉప్పన్నో హోతి అప్పమత్తకో ఆబాధో. తస్స ఏవం హోతి – ‘ఉప్పన్నో ఖో మే అయం అప్పమత్తకో ఆబాధో అత్థి కప్పో నిపజ్జితుం. హన్దాహం నిపజ్జామీ’తి. సో నిపజ్జతి, న వీరియం ఆరభతి…పే… ఇదం, భిక్ఖవే, సత్తమం కుసీతవత్థు.

‘‘పున చపరం, భిక్ఖవే, భిక్ఖు గిలానా వుట్ఠితో [అ. ని. ౬.౧౬ సుత్తవణ్ణనా టీకా ఓలోకేతబ్బా] హోతి అచిరవుట్ఠితో గేలఞ్ఞా. తస్స ఏవం హోతి – ‘అహం ఖో గిలానా వుట్ఠితో అచిరవుట్ఠితో గేలఞ్ఞా. తస్స మే కాయో దుబ్బలో అకమ్మఞ్ఞో. హన్దాహం నిపజ్జామీ’తి. సో నిపజ్జతి, న వీరియం ఆరభతి అప్పత్తస్స పత్తియా అనధిగతస్స అధిగమాయ అసచ్ఛికతస్స సచ్ఛికిరియాయ. ఇదం, భిక్ఖవే, అట్ఠమం కుసీతవత్థు. ఇమాని ఖో, భిక్ఖవే, అట్ఠ కుసీతవత్థూని.

[దీ. ని. ౩.౩౩౫, ౩౫౮] ‘‘అట్ఠిమాని, భిక్ఖవే, ఆరమ్భవత్థూని. కతమాని అట్ఠ? ఇధ, భిక్ఖవే, భిక్ఖునా కమ్మం కత్తబ్బం హోతి. తస్స ఏవం హోతి – ‘కమ్మం ఖో మే కత్తబ్బం భవిస్సతి. కమ్మం ఖో మయా కరోన్తేన న సుకరం బుద్ధానం సాసనం మనసి కాతుం. హన్దాహం పటికచ్చేవ వీరియం ఆరభామి అప్పత్తస్స పత్తియా అనధిగతస్స అధిగమాయ అసచ్ఛికతస్స సచ్ఛికిరియాయా’తి. సో వీరియం ఆరభతి అప్పత్తస్స పత్తియా అనధిగతస్స అధిగమాయ అసచ్ఛికతస్స సచ్ఛికిరియాయ. ఇదం, భిక్ఖవే, పఠమం ఆరమ్భవత్థు.

‘‘పున చపరం, భిక్ఖవే, భిక్ఖునా కమ్మం కతం హోతి. తస్స ఏవం హోతి – ‘అహం ఖో కమ్మం అకాసిం. కమ్మం ఖో పనాహం కరోన్తో నాసక్ఖిం బుద్ధానం సాసనం మనసి కాతుం. హన్దాహం వీరియం ఆరభామి అప్పత్తస్స పత్తియా అనధిగతస్స అధిగమాయ అసచ్ఛికతస్స సచ్ఛికిరియాయా’తి. సో వీరియం ఆరభతి. ఇదం, భిక్ఖవే, దుతియం ఆరమ్భవత్థు.

‘‘పున చపరం, భిక్ఖవే, భిక్ఖునా మగ్గో గన్తబ్బో హోతి. తస్స ఏవం హోతి – మగ్గో ఖో మే గన్తబ్బో భవిస్సతి. మగ్గం ఖో పన మే గచ్ఛన్తేన న సుకరం బుద్ధానం సాసనం మనసి కాతుం. హన్దాహం వీరియం…పే… ఇదం, భిక్ఖవే, తతియం ఆరమ్భవత్థు.

‘‘పున చపరం, భిక్ఖవే, భిక్ఖునా మగ్గో గతో హోతి. తస్స ఏవం హోతి – అహం ఖో మగ్గం అగమాసిం. మగ్గం ఖో పనాహం గచ్ఛన్తో నాసక్ఖిం బుద్ధానం సాసనం మనసి కాతుం. హన్దాహం వీరియం ఆరభామి…పే… ఇదం, భిక్ఖవే, చతుత్థం ఆరమ్భవత్థు.

‘‘పున చపరం, భిక్ఖవే, భిక్ఖు గామం వా నిగమం వా పిణ్డాయ చరన్తో న లభతి లూఖస్స వా పణీతస్స వా భోజనస్స యావదత్థం పారిపూరిం. తస్స ఏవం హోతి – అహం ఖో గామం వా నిగమం వా పిణ్డాయ చరన్తో నాలత్థం లూఖస్స వా పణీతస్స వా భోజనస్స యావదత్థం పారిపూరిం. తస్స మే కాయో లహుకో కమ్మఞ్ఞో. హన్దాహం వీరియం ఆరభామి…పే… ఇదం, భిక్ఖవే, పఞ్చమం ఆరమ్భవత్థు.

‘‘పున చపరం, భిక్ఖవే, భిక్ఖు గామం వా నిగమం వా పిణ్డాయ చరన్తో లభతి లూఖస్స వా పణీతస్స వా భోజనస్స యావదత్థం పారిపూరిం. తస్స ఏవం హోతి – అహం ఖో గామం వా నిగమం వా పిణ్డాయ చరన్తో అలత్థం లూఖస్స వా పణీతస్స వా భోజనస్స యావదత్థం పారిపూరిం. తస్స మే కాయో బలవా కమ్మఞ్ఞో. హన్దాహం వీరియం ఆరభామి…పే… ఇదం, భిక్ఖవే, ఛట్ఠం ఆరమ్భవత్థు.

‘‘పున చపరం, భిక్ఖవే, భిక్ఖునో ఉప్పన్నో హోతి అప్పమత్తకో ఆబాధో. తస్స ఏవం హోతి – ఉప్పన్నో ఖో మే అయం అప్పమత్తకో ఆబాధో. ఠానం ఖో పనేతం విజ్జతి యం మే ఆబాధో పవడ్ఢేయ్య. హన్దాహం పటికచ్చేవ వీరియం ఆరభామి…పే… ఇదం, భిక్ఖవే, సత్తమం ఆరమ్భవత్థు.

‘‘పున చపరం, భిక్ఖవే, భిక్ఖు గిలానా వుట్ఠితో హోతి అచిరవుట్ఠితో గేలఞ్ఞా. తస్స ఏవం హోతి – ‘అహం ఖో గిలానా వుట్ఠితో అచిరవుట్ఠితో గేలఞ్ఞా. ఠానం ఖో పనేతం విజ్జతి యం మే ఆబాధో పచ్చుదావత్తేయ్య. హన్దాహం పటికచ్చేవ వీరియం ఆరభామి అప్పత్తస్స పత్తియా అనధిగతస్స అధిగమాయ అసచ్ఛికతస్స సచ్ఛికిరియాయా’తి. సో వీరియం ఆరభతి అప్పత్తస్స పత్తియా అనధిగతస్స అధిగమాయ అసచ్ఛికతస్స సచ్ఛికిరియాయ. ఇదం, భిక్ఖవే, అట్ఠమం ఆరమ్భవత్థు. ఇమాని ఖో, భిక్ఖవే, అట్ఠ ఆరమ్భవత్థూనీ’’తి. దసమం.

యమకవగ్గో తతియో.