౬. విమోక్ఖసుత్తం

౬౬. ‘‘అట్ఠిమే, భిక్ఖవే, విమోక్ఖా. కతమే అట్ఠ? రూపీ రూపాని పస్సతి. అయం పఠమో విమోక్ఖో.

‘‘అజ్ఝత్తం అరూపసఞ్ఞీ, బహిద్ధా [అరూపసఞ్ఞీ ఏకో బహిద్ధా (స్యా. పీ. క.) దీ. ని. ౨.౧౨౯; దీ. ని. ౩.౩౩౮, ౩౫౮; అ. ని. ౮.౧౧౯; మ. ని. ౨.౨౪౮ పస్సితబ్బం] రూపాని పస్సతి. అయం దుతియో విమోక్ఖో.

‘‘సుభన్తేవ అధిముత్తో హోతి. అయం తతియో విమోక్ఖో.

‘‘సబ్బసో రూపసఞ్ఞానం సమతిక్కమా పటిఘసఞ్ఞానం అత్థఙ్గమా నానత్తసఞ్ఞానం అమనసికారా ‘అనన్తో ఆకాసో’తి ఆకాసానఞ్చాయతనం ఉపసమ్పజ్జ విహరతి. అయం చతుత్థో విమోక్ఖో.

‘‘సబ్బసో ఆకాసానఞ్చాయతనం సమతిక్కమ్మ ‘అనన్తం విఞ్ఞాణ’న్తి విఞ్ఞాణఞ్చాయతనం ఉపసమ్పజ్జ విహరతి. అయం పఞ్చమో విమోక్ఖో.

‘‘సబ్బసో విఞ్ఞాణఞ్చాయతనం సమతిక్కమ్మ ‘నత్థి కిఞ్చీ’తి ఆకిఞ్చఞ్ఞాయతనం ఉపసమ్పజ్జ విహరతి. అయం ఛట్ఠో విమోక్ఖో.

‘‘సబ్బసో ఆకిఞ్చఞ్ఞాయతనం సమతిక్కమ్మ నేవసఞ్ఞానాసఞ్ఞాయతనం ఉపసమ్పజ్జ విహరతి. అయం సత్తమో విమోక్ఖో.

‘‘సబ్బసో నేవసఞ్ఞానాసఞ్ఞాయతనం సమతిక్కమ్మ సఞ్ఞావేదయితనిరోధం ఉపసమ్పజ్జ విహరతి. అయం అట్ఠమో విమోక్ఖో. ఇమే ఖో, భిక్ఖవే, అట్ఠ విమోక్ఖా’’తి. ఛట్ఠం.