౯. పఠమఇధలోకికసుత్తం

౪౯. ఏకం సమయం భగవా సావత్థియం విహరతి పుబ్బారామే మిగారమాతుపాసాదే. అథ ఖో విసాఖా మిగారమాతా యేన భగవా తేనుపసఙ్కమి…పే…. ఏకమన్తం నిసిన్నం ఖో విసాఖం మిగారమాతరం భగవా ఏతదవోచ –

‘‘చతూహి ఖో, విసాఖే, ధమ్మేహి సమన్నాగతో మాతుగామో ఇధలోకవిజయాయ పటిపన్నో హోతి, అయంస లోకో ఆరద్ధో హోతి. కతమేహి చతూహి? ఇధ, విసాఖే, మాతుగామో సుసంవిహితకమ్మన్తో హోతి, సఙ్గహితపరిజనో, భత్తు మనాపం చరతి, సమ్భతం అనురక్ఖతి.

‘‘కథఞ్చ, విసాఖే, మాతుగామో సుసంవిహితకమ్మన్తో హోతి? ఇధ, విసాఖే, మాతుగామో యే తే భత్తు అబ్భన్తరా కమ్మన్తా – ఉణ్ణాతి వా కప్పాసాతి వా – తత్థ దక్ఖా హోతి అనలసా తత్రుపాయాయ వీమంసాయ సమన్నాగతా అలం కాతుం అలం సంవిధాతుం. ఏవం ఖో, విసాఖే, మాతుగామో సుసంవిహితకమ్మన్తో హోతి.

‘‘కథఞ్చ, విసాఖే, మాతుగామో సఙ్గహితపరిజనో హోతి? ఇధ, విసాఖే, మాతుగామో యో సో భత్తు అబ్భన్తరో అన్తోజనో – దాసాతి వా పేస్సాతి వా కమ్మకరాతి వా – తేసం కతఞ్చ కతతో జానాతి అకతఞ్చ అకతతో జానాతి, గిలానకానఞ్చ బలాబలం జానాతి ఖాదనీయం భోజనీయఞ్చస్స పచ్చంసేన సంవిభజతి. ఏవం ఖో, విసాఖే, మాతుగామో సఙ్గహితపరిజనో హోతి.

‘‘కథఞ్చ, విసాఖే, మాతుగామో భత్తు మనాపం చరతి? ఇధ, విసాఖే, మాతుగామో యం భత్తు అమనాపసఙ్ఖాతం తం జీవితహేతుపి న అజ్ఝాచరతి. ఏవం ఖో, విసాఖే, మాతుగామో భత్తు మనాపం చరతి.

‘‘కథఞ్చ, విసాఖే, మాతుగామో సమ్భతం అనురక్ఖతి? ఇధ, విసాఖే, మాతుగామో యం భత్తా ఆహరతి ధనం వా ధఞ్ఞం వా రజతం వా జాతరూపం వా తం ఆరక్ఖేన గుత్తియా సమ్పాదేతి, తత్థ చ హోతి అధుత్తీ అథేనీ అసోణ్డీ అవినాసికా. ఏవం ఖో, విసాఖే, మాతుగామో సమ్భతం అనురక్ఖతి. ఇమేహి ఖో, విసాఖే, చతూహి ధమ్మేహి సమన్నాగతో మాతుగామో ఇధలోకవిజయాయ పటిపన్నో హోతి, అయంస లోకో ఆరద్ధో హోతి.

‘‘చతూహి ఖో, విసాఖే, ధమ్మేహి సమన్నాగతో మాతుగామో పరలోకవిజయాయ పటిపన్నో హోతి, పరలోకో ఆరద్ధో హోతి. కతమేహి చతూహి? ఇధ, విసాఖే, మాతుగామో సద్ధాసమ్పన్నో హోతి, సీలసమ్పన్నో హోతి, చాగసమ్పన్నో హోతి, పఞ్ఞాసమ్పన్నో హోతి.

‘‘కథఞ్చ, విసాఖే, మాతుగామో సద్ధాసమ్పన్నో హోతి? ఇధ, విసాఖే, మాతుగామో సద్ధో హోతి, సద్దహతి తథాగతస్స బోధిం – ‘ఇతిపి సో భగవా అరహం సమ్మాసమ్బుద్ధో విజ్జాచరణసమ్పన్నో సుగతో లోకవిదూ అనుత్తరో పురిసదమ్మసారథి సత్థా దేవమనుస్సానం బుద్ధో భగవా’తి. ఏవం ఖో, విసాఖే, మాతుగామో సద్ధాసమ్పన్నో హోతి.

‘‘కథఞ్చ, విసాఖే, మాతుగామో సీలసమ్పన్నో హోతి? ఇధ, విసాఖే, మాతుగామో పాణాతిపాతా పటివిరతో హోతి…పే… సురామేరయమజ్జపమాదట్ఠానా పటివిరతో హోతి. ఏవం ఖో, విసాఖే, మాతుగామో సీలసమ్పన్నో హోతి.

‘‘కథఞ్చ, విసాఖే, మాతుగామో చాగసమ్పన్నో హోతి? ఇధ, విసాఖే, మాతుగామో విగతమలమచ్ఛేరేన చేతసా అగారం అజ్ఝావసతి ముత్తచాగా పయతపాణినీ వోస్సగ్గరతా యాచయోగా దానసంవిభాగరతా. ఏవం ఖో, విసాఖే, మాతుగామో చాగసమ్పన్నో హోతి.

‘‘కథఞ్చ, విసాఖే, మాతుగామో పఞ్ఞాసమ్పన్నో హోతి? ఇధ, విసాఖే, మాతుగామో పఞ్ఞవా హోతి…పే… ఏవం ఖో, విసాఖే, మాతుగామో పఞ్ఞాసమ్పన్నో హోతి. ఇమేహి ఖో, విసాఖే, చతూహి ధమ్మేహి సమన్నాగతో మాతుగామో పరలోకవిజయాయ పటిపన్నో హోతి, పరలోకో ఆరద్ధో హోతీ’’తి.

‘‘సుసంవిహితకమ్మన్తా, సఙ్గహితపరిజ్జనా;

భత్తు మనాపం చరతి, సమ్భతం అనురక్ఖతి.

‘‘సద్ధా సీలేన సమ్పన్నా, వదఞ్ఞూ వీతమచ్ఛరా;

నిచ్చం మగ్గం విసోధేతి, సోత్థానం సమ్పరాయికం.

‘‘ఇచ్చేతే అట్ఠ ధమ్మా చ, యస్సా విజ్జన్తి నారియా;

తమ్పి సీలవతిం ఆహు, ధమ్మట్ఠం సచ్చవాదినిం.

‘‘సోళసాకారసమ్పన్నా, అట్ఠఙ్గసుసమాగతా;

తాదిసీ సీలవతీ ఉపాసికా;

ఉపపజ్జతి దేవలోకం మనాప’’న్తి. నవమం;