౮. దుతియబన్ధనసుత్తం

౧౮. ‘‘అట్ఠహి, భిక్ఖవే, ఆకారేహి పురిసో ఇత్థిం బన్ధతి. కతమేహి అట్ఠహి? రుణ్ణేన, భిక్ఖవే, పురిసో ఇత్థిం బన్ధతి; హసితేన, భిక్ఖవే, పురిసో ఇత్థిం బన్ధతి; భణితేన, భిక్ఖవే, పురిసో ఇత్థిం బన్ధతి; ఆకప్పేన, భిక్ఖవే, పురిసో ఇత్థిం బన్ధతి; వనభఙ్గేన, భిక్ఖవే, పురిసో ఇత్థిం బన్ధతి; గన్ధేన, భిక్ఖవే, పురిసో ఇత్థిం బన్ధతి; రసేన, భిక్ఖవే, పురిసో ఇత్థిం బన్ధతి; ఫస్సేన, భిక్ఖవే, పురిసో ఇత్థిం బన్ధతి. ఇమేహి ఖో, భిక్ఖవే, అట్ఠహాకారేహి పురిసో ఇత్థిం బన్ధతి. తే, భిక్ఖవే, సత్తా సుబద్ధా, యే ఫస్సేన బద్ధా’’తి. అట్ఠమం.